UJobe 33 - iBhayibhili Elingcwele 1978

UElihu ukhuza uJobe ngokusola kwakhe uNkulunkulu

¹ Khathesike, Jobe, ake uzwe ukukhuluma kwami, ulalele wonke amazwi ami.

² Sengilungele, ukuba ngikhulume okusengqondweni yami.

³ Inhliziyo yami ithi ngikhulume engikwaziyo, lomlomo wami ukhulume iqiniso.

⁴ Umoya kaNkulunkulu wangenza, lokuphefumula kukaSomandla kwanginika ukuphila.

⁵ Uba ungangiphendula, ungiphendule; lungisa amazwi akho, ume.

⁶ KuNkulunkulu nginjengawe, lami ngabunjwa ngebumba,

⁷ ukungesaba kwakho kungakwethusi, isandla kasiyikuba phezu kwakho.

⁸ Impela ukhulume ngisizwa, ngawezwa amazwi akho.

⁹ Wena uthi: Ngimsulwa, kangilacala, ngimhlophe, kabukho ububi kimi.

¹⁰ Kanti uNkulunkulu uyafumana amathuba okungibeka icala, angitshaye isitha sakhe.

¹¹ Uyazikhina inyawo zami, aqaphele zonke indlela zami.

¹² Khangela, Jobe, kawuqondanga; ngizakukuphendula. UNkulunkulu mkhulu kulomuntu.

¹³ Umphikiselani usithi: Kayikuphendula lelilodwa emazwini ami?

¹⁴ Ngoba uNkulunkulu ukhuluma ngenye indlela, abuye akhulume ngenye, kodwa kakho onanzayo.

¹⁵ Ukhuluma ngamaphupho langemibono yasebusuku, lapho abantu bebanjwe yibuthongo obunzima, belele emacansini abo;

¹⁶ abesevula indlebe zabo, abethuse ngokuxwayisa kwakhe,

¹⁷ ukuze aphambule umuntu ekwenzeni kwakhe, aqede lokuzikhukhumeza kwakhe,

¹⁸ anqande umphefumulo wakhe egodini, lokuphila kwakhe ukuba kungabhujiswa.

¹⁹ Njalo umuntu umtshaya ngobuhlungu ecansini lakhe, langokuqaqamba kwamathambo akhe,

²⁰ aze enyanye ukudla, angazikhwabithi lezibondlo.

²¹ Inyama yakhe iyaphela ingabe isabonakala, lamathambo akhe abekade engabonakali ayavela.

²² Umphefumulo wakhe useduze legodi, lokuphila kwakhe kuseduze lokufa.

²³ Uba kukhona isithunywa ngaye, umlamuli, oyedwa nje phakathi kwezigidi, ukutshela umuntu okufanele akwenze,

²⁴ sibe lomusa kuye sithi: Mkhulule egodini, ngoba sengimzuzele inhlawulo;

²⁵ inyama yakhe kayibe ntsha njengeyomntwana, abuyele ensukwini zobutsha bakhe,

²⁶ akhuleke kuNkulunkulu, amuzwe, eze phambi kwakhe ngokuthokoza. Ulandisa ebantwini ngokusiliswa kwakhe,

²⁷ ehlabela phambi kwabantu esithi: Ngonile, ngahlanekela okulungileyo, kodwa kakubalelwanga kimi.

²⁸ Uhlengile umphefumulo wami egodini, ukuphila kwami kuzabona ukukhanya.

²⁹ Konke lokhu uNkulunkulu uyakwenza emuntwini, ekuphindaphinda,

³⁰ ambuyise egodini, ukuba azithokozise ngokukhanya kokuphila.

³¹ Ake uzwe, Jobe, ungilalele, ake uthule, mina ngikhulume.

³² Uba ulolutho, ungiphendule; khuluma, ngoba ngifisa ukutshengisa ukuthi ulungile.

³³ Uba ungelakho, ungilalele; thula, mina ngizakukufundisa ukuhlakanipha.