UJobe 32 - iBhayibhili Elingcwele 1978

UElihu uyaqhamuka; uqala ukumphendula uJobe

¹ Lawomadoda amathathu aseyekela ukumphendula uJobe, ngoba wayecabanga ukuthi yena ulungile.

² Wasethukuthela uElihu indodana kaBarakeli waseBuzi, owosendo lukaRamu. Wathukuthelela uJobe ngoba ezitshaya olungileyo kuloNkulunkulu.

³ Wabathukuthelela abangane bakaJobe abathathu ngoba bahluleka ukumphendula uJobe, benza ukuba uNkulunkulu abonakale engaqondanga.

⁴ UElihu wayethule ukukhuluma loJobe ngoba babebadala kulaye.

⁵ Kodwa lapho esebonile ukuba lababantu abathathu bayehluleka ukumphendula uJobe wathukuthela.

⁶ Ngakho wasekhulumake uElihu indodana kaBarakeli waseBuzi, esithi: Mina ngisemutsha ngeminyaka, lina libadala. Ngakho bengilenhloni, ngesaba ukulitshela umcabango wami.

⁷ Ngathi: Kakukhulume abadala, abaleminyaka eminengi, bafundise ukuhlakanipha.

⁸ Kodwa umoya kaNkulunkulu ukhona emuntwini, lokuphefumula kukaSomandla kuyamnika umuntu ukuqedisisa.

⁹ Kayisibo bodwa abadala abahlakaniphileyo, labalupheleyo bodwa abaqedisisayo okulungileyo.

¹⁰ Ngakhoke ngithi: Ake lingilalele, lami ngitsho owami umcabango.

¹¹ Khangelani, ngiwalindele amazwi enu, ngalalela ukukhuluma kwenu okuhlakaniphileyo, lisadinga lokho elingakutsho.

¹² Ngalilalela lina, kakho loyedwa omehluleyo uJobe, lowaphenduleyo amazwi akhe phakathi kwenu.

¹³ Qaphelani ukuba lingatsho ukuthi: Sifumene ukuhlakanipha; nguNkulunkulu ozamahlula, hayi umuntu.

¹⁴ Kangiyikuphikisana laye njengani, loba ngimphendule njengokumphendula kwenu.

¹⁵ Behlulekile, kabasaphenduli, kabaselalizwi lelilodwa.

¹⁶ Ngibalindele yini uba bengakhulumi na? Bemi, kabasaphenduli.

¹⁷ Lami sengizakuphendula, ngitsho umcabango wami.

¹⁸ Ngoba ngigcwele amazwi, umoya okimi uyangiqhubezela.

¹⁹ Inhliziyo yami injengokugcwele iwayini okungelambobo, njengemigodla emitsha yewayini esizakudabuka.

²⁰ Kuhle ngikhulume ukuze ngibhodle, ngivule umlomo wami ngiphendule.

²¹ Kangiyikukhetha umuntu, loba ngimkhukhumeze nje.

²² Ngoba kangikwazi ukukhukhumeza, futhi uMenzi wami angangisusa masinyane.