UJobe 31 - iBhayibhili Elingcwele 1978

UJobe ucabanga ukuthi ulungile

¹ Ngazimisela ukuba kangiyikukhangela intombi ngamehlo ami.

² Singaba yini isabelo sami esivela kuNkulunkulu phezulu, lelifa lami elivela kuSomandla phezulu na?

³ Izinhlupheko kazimehleli omubi, lengozi kayibehleli abenza okubi na?

⁴ Kanti uNkulunkulu kaziboni indlela zami, abale zonke izinyathelo zami na?

⁵ Ngiyafunga ukuthi kangizanga ngiqambe amanga, kangizanga ngihambe ngendlela yenkohliso.

⁶ — Kangilinganiswe ngesilinganiso esilungileyo, ukuze uNkulunkulu azi ubuqotho bami —

⁷ Uba izinyathelo zami ziphambukile endleleni, lenhliziyo yami yalandela amehlo ami, uba kunamathele icwatshana ezandleni zami,

⁸ kangihlanyele, kudle omunye, lokuhlanyelelwe mina kusitshulwe.

⁹ Uba inhliziyo yami iyengwe ngowesifazana, ngacathama ngasemnyango kamakhelwana wami,

¹⁰ umkami kacholele omunye, amanye amadoda alale laye.

¹¹ Ngoba lokho kungaba licala elibi, kungaba yibubi bokuthonisiswa ngabathonisisi;

¹² kungaba ngumlilo otshisa uqothule amabele ami.

¹³ Uba ngalile indaba yenceku yami loba eyencekukazi yami, nxa ziletha ukusola kwabo ngami,

¹⁴ ngizakwenza njani lapho uNkulunkulu evuka na? Lalapho engibuza, ngizaphendula ngithini na?

¹⁵ Lowo owangenza esiswini kabenzanga labo na? Kamunye yini owasibumba esiswini na?

¹⁶ Uba ngigodlile lokho okufiswa ngumyanga, ngenza amehlo omfelwakazi ukuba afiphazwe zinyembezi,

¹⁷ ngadla ukudla kwami ngedwa, ngayincitsha intandane,

¹⁸ — kusukela ebutsheni bayo ngayikhulisa njengoyise, ngayiqondisa kusukela ekuzalweni kwayo —

¹⁹ uba ngabona omunye ebhubha ngenxa yokuswela isigqoko, loba umyanga engelazambatho,

²⁰ uba umzimba wakhe ungathokozanga ngami, ngoba engakhudunyezwanga yiboya bezimvu zami,

²¹ uba ngaphakamisela isandla sami phezu kwezintandane, ngoba abantu bezakungisekela enkundleni,

²² kalikhumuke ihlombe lami esiphangeni, lengalo yami ingcomuke endaweni yayo.

²³ Ngoba ngesaba inhlupheko ezivela kuNkulunkulu, ngingelakho ukukhangelana lobukhulu bakhe.

²⁴ Uba ngenzile igolide laba lithemba lami, ngathi igolide elihle lilithemba lami,

²⁵ uba ngithokozile ngoba inotho yami inengi, lesandla sami sizuzile okunengi,

²⁶ uba ngikhangele ilanga lapho likhanya, lenyanga ehamba ekukhazimuleni kwayo,

²⁷ ngayengwa enhliziyweni yami, ngaphakamisa isandla sami ukuzikhonza,

²⁸ lalokho kungaba yibubi bokuthonisiswa ngabathonisisi, ngoba ngizabe ngingathembekanga kuNkulunkulu ophezulu.

²⁹ Uba ngithokozile ngokuchitheka kongizondayo, ngajabula lapho esehlelwa yibubi,

³⁰ — lanxa ngingavumelanga ulimi lwami ukuba lone, ngokucela ukuphila kwakhe ngenhlamba —

³¹ uba abantu bendlu yami bengatshongo ukuthi: ngubani ongasuthanga ukudla kwakhe na?

³² — kakukho owasemzini oke walala phandle; iminyango yami ngiyivulele izihambi —

³³ uba ngifihlile iziphambeko zami ebantwini, ngokufihla isono sami esifubeni sami,

³⁴ ngoba ngisesaba ukunyeya phakathi komuzi, ingabe ukuhlekwa ngabantu bakithi, ngakhoke ngathula, kangizanga ngiphume endlini.

³⁵ Kungathi ngabe uNkulunkulu angangizwa! Kungathi ngabe uSomandla uyangitshela icala lami! Kungathi ngabe isitha sami siyaloba incwadi yecala lami!

³⁶ Ngingayithwala ehlombe lami, ngiyibophele kimi ibe ngumqhele wami;

³⁷ ngimlandisele uNkulunkulu ngazo zonke izinyathelo zami, ngisondele kuye njengesikhulu.

³⁸ Uba umhlaba wami ukhalile ngami, lemifolo yawo ililile,

³⁹ uba ngidlile izithelo zawo ngingazihlawulelanga, ngabulala abanini bawo,

⁴⁰ kakuhlume ameva endaweni yamabele, lokhula olubi endaweni yebhali. Amazwi kaJobe asephelile.