UJobe 30 - iBhayibhili Elingcwele 1978

UJobe ukhala ngokuhlupheka kwakhe okukhulu

¹ Kodwa khathesi abatsha kulami bayangihleka, oyise babo engababona bengafanelanga ukuba ngibafake phakathi kwezinja ezelusa izimvu zami.

² Ingalo zabo ezilamandla zazingangisiza kanjani lokhu ukuqina kwabo kwasekuphelile na?

³ Badla izimpande enkangala, bechakiswe yikuswela lendlala.

⁴ Bakha imibhida emunyu lamahlamvu ezihlahla, badla impande zezihlahla.

⁵ Baxotshwa phakathi kwabantu abamemeza emva kwabo njengemva kwesela.

⁶ Bahlala ezigodini zezifula, lezimbalwini zomhlaba lasemaweni.

⁷ Bakhonya njengezinyamazana phakathi kwezihlahla, bebuthana ndawonye ezixukwini,

⁸ bayiziphukuphuku ezilahliweyo zaxotshwa phakathi kwabantu.

⁹ Khathesi sengihaywa yibo, sengiyisiga sabo.

¹⁰ Ngiyabanenga, bema khatshana lami; kabathikazi ukungikhafulela ngamathe.

¹¹ UNkulunkulu ukhulule intambo zami, wangithobisa, lapho sebengibona kabazithinti.

¹² Ngakwesokunene sami bangihlasela belixuku, balungisela ukungivimbezela.

¹³ Bazivalile indlela zami zokubaleka, kakho ongabavimbela ekungihlaseleni kwabo.

¹⁴ Bafohlela esikhaleni esikhamisileyo; ekuvulekeni kwesikhala batheleke phakathi;

¹⁵ Ukwesaba kuyangehlela, kuphephule ukuzimisela kwami njengomoya, lethemba lami lokunqoba linyamalale njengamayezi.

¹⁶ Ngakhoke khathesi umoya wami udungekile phakathi kwami, losizi lungibamba insuku zonke.

¹⁷ Ebusuku ubuhlungu buyafutha emathanjeni ami, lokuqaqamba kakupheli emithanjeni yami.

¹⁸ UNkulunkulu uyangibamba ngesiphika seyembe yami, atshwabhanise izigqoko zami.

¹⁹ UNkulunkulu ungiphosele odakeni, senginjengothuli lomlotha.

²⁰ Ngiyakhala kuwe, Nkulunkulu, kodwa kawungiphenduli; ngiyasukuma, kodwa kawunginanzi.

²¹ Usuyisihluku kimi, ngamandla esandla sakho uyangizingela.

²² Uyangiphakamisela emoyeni, ungikhweze kuwo, ngiphoseke le lale phakathi kwesiphepha.

²³ Yebo, ngiyazi ukuba uzangifikisa ekufeni, lasendaweni emiselwe bonke abaphilayo.

²⁴ Kodwa, nxa umuntu esiwa, keluli isandla sakhe na? Ekuhluphekeni kwakhe kakhaleli ukusizwa na?

²⁵ Kangimkhalelanga yini owayelensuku ezilukhuni, kangimhawukelanga yini owayengumyanga na?

²⁶ Kodwa kwathi ngilindele okuhle, kwavela okubi; Kwathi ngilindele ukukhanya, kwafika umnyama.

²⁷ Inhliziyo yami idungekile, kayilakuphumula, lensuku zosizi zingifikele.

²⁸ Ngihamba ngidanile, ngingelabangane; ngisukuma ebandleni ngicele ukusizwa kuphela.

²⁹ Ngingumfowabo wamakhanka, lomngane wezintshe.

³⁰ Isigogo sami siphenduke saba mnyama, siyayobuka kimi, lamathambo ami ayatshisa.

³¹ Umhubhe wami usulungiselwe isililo, lomhlanga wami walungiselwa ilizwi labakhalayo.