UJobe 3 - iBhayibhili Elingcwele 1978

UJobe uthuka usuku lokuzalwa kwakhe

¹ Emva kwalokho uJobe wavula umlomo wakhe, wathuka usuku lokuzalwa kwakhe.

² UJobe wathi eNkosini:

³ Kalubhubhe usuku engazalwa ngalo, lobusuku obathi: Kukhulelwe umntwana wesilisa.

⁴ Lolosuku kalube ngumnyama, uNkulunkulu angalunanzi ephezulu, lokukhanya kungalukhanyisi.

⁵ Luphiwe umnyama lethunzi lokufa, lamayezi ehlele phezu kwalo, lomnyama ucitshe ilanga.

⁶ Lobobusuku umnyama omkhulu ubembese, lungabalwa ensukwini zomnyaka, lungabalwa ezinyangeni.

⁷ Yebo, lobobusuku bube yize, kungazwakali ilizwi lokuthokoza kubo.

⁸ Kababuthuke abathuka usuku, abakwaziyo ukuvusa uLeviyathani.

⁹ Zibe mnyama inkanyezi zokusa kwabo, bulindele ukukhanya, kungabi khona, bungakuboni ukudabuka kokusa,

¹⁰ ngoba bungangivalelanga esiswini sikamama. bungafihlanga ukuhlupheka kimi.

¹¹ Kungani ngingafanga ekuzalweni, ngingahlanga ngafa ekuphumeni kwami esiswini na?.

¹² Amadolo angamukelelani, lamabele ukuba ngimunye na?

¹³ Ngoba ngabe ngalala ngathula, ngalala, ngaphumula,

¹⁴ kanye lamakhosi labaluleki bomhlaba abazakhela izigodlo,

¹⁵ lezikhulu ezazilegolide ezagcwalisa izindlu zazo ngesiliva.

¹⁶ Yini ngingafihlwanga njengokwesisu esiphumileyo, njengomntwana ongabonanga ukukhanya na?

¹⁷ Lapho ababi sebakuyekela ukuhlupha, labakhatheleyo sebephumule.

¹⁸ Lapho lezibotshwa zichelesile, zingasalizwa ilizwi lomcindezeli.

¹⁹ Abancinyane labakhulu balapho. lesigqili sikhululekile enkosini yaso.

²⁰ Ohluphekayo unikelwani ukukhanya, lokuphila kunikelwani abalosizi,

²¹ abafisa ukufa, kodwa kungafiki, abakudinga kulenotho efihliweyo,

²² abathabayo kakhulu bathokoze lapho befumana iliba na?

²³ Ukukhanya kunikelwani umuntu olendlela efihlakeleyo, uNkulunkulu ambiyeleyo inxa zonke na?

²⁴ Ukububula kwami kuyikudla kwami, lokugquma kutheleleka kimi njengamanzi.

²⁵ Ngoba engikwesabayo sekungifikele, lengilovalo ngakho sekungehlele.

²⁶ Kangilakuchelesa lokuthula, kangiphumuli, ukuhlupheka kuyangifikela.