UJobe 29 - iBhayibhili Elingcwele 1978

UJobe ukhumbula inhlalo yakhe yakuqala

¹ UJobe wabuya waqhubeka ngokukhuluma kwakhe wathi:

² Kungathi ngabe nginjengensukwini zakudala, njengensukwini uNkulunkulu angigcine kuzo

³ lapho isibane sakhe sasikhanya phezu kwekhanda lami, ngihamba emnyameni ngokukhanya kwakhe!

⁴ Kungathi ngabe nginjengensukwini zokuphumelela kwami, lapho ubuhlobo bukaNkulunkulu babuphakathi komuzi wami,

⁵ lapho uSomandla wayeselami, labantwana bami besangiphahlile;

⁶ lapho izinyathelo zami zazigeziswa ngochago, lamadwala egobhoza amafutha!

⁷ Nxa ngiphumela enkundleni yomuzi, ngilungisa isihlalo sami emdangeni,

⁸ insizwa zangibona, zacatsha, lamaxhegu asukuma ema,

⁹ lezikhulu zathula ukukhuluma, zabamba imilomo yazo ngezandla zazo,

¹⁰ lelizwi labakhulu lithuliswa, lezinlimi zabo zanamathele ezinlwangeni zabo.

¹¹ Abezwa ngami bakhuluma kuhle ngami, lalabo abangibonayo bafakaza ngobuqotho bami,

¹² ngoba ngakhulula ongumyanga ekukhaleni kwakhe, lentandane engelamsizi.

¹³ Umuntu owayesezakuchitheka wangibusisa, ngenza inhliziyo yomfelwakazi ukuba ithokoze.

¹⁴ Ngembatha okufaneleyo kwaba yisambatho sami; ukulunga kwami kwaba njengengubo lengowane.

¹⁵ Ngangingamehlo abo abayiziphofu, lenyawo zabo abayiziqhuli.

¹⁶ Nganginguyise wabayanga, ngavikela umuntu engingamaziyo.

¹⁷ Ngephula imihlathi yomubi, ngamenza alahle impango esemazinyweni akhe.

¹⁸ Ngasengisithi: Ngizafela endaweni yami, ngandise insuku zami zibe ngangetshebetshebe,

¹⁹ impande zami zinabele emanzini, lamazolo alale ubusuku bonke engatsheni zami,

²⁰ udumo lwami luhlala lulutsha kimi, lomtshoko wami uhlala usitsha esandleni sami.

²¹ Abantu bangilalela belindele, bathulela iseluleko sami.

²² Emva kokukhuluma kwami kabakhulumanga futhi, amazwi ami ehlela kuhle kibo.

²³ Bangilindela njengezulu, bakhamisa imilomo yabo njengokukhamisela izulu lentwasa.

²⁴ Lapho ngibobotheka, baba lethemba, lapho ubuso bami buthokoza, kwaphela kibo ukunyukumala.

²⁵ Ngahlala kanye labo ngalungisa indaba zabo, njengenkosi emise kanye lamabutho ayo.