UJobe 28 - iBhayibhili Elingcwele 1978

Mayelana lokuhlakanipha

¹ Impela kukhona umgodi wesiliva, lendawo lapho abantu bancibilikisa igolide khona.

² Insimbi ikhutshwa emhlabathini, lethusi lincibilikiswa emanyeleni.

³ Abantu bawukhanyisa umnyama lapho betshona phansi ukudinga amanyele endaweni ezilomnyama omkhulu.

⁴ Bayatshonisa imigodi ezindaweni ezikhatshana labantu, indawo lapho kungahambi khona abantu, basebenza khona belesizungu, belenga ngamagoda emigodini.

⁵ Umhlaba wona lapho kuvela khona ukudla, ngaphansi kwawo kuyavutha umlilo.

⁶ Phansi le amadwala alamatshe amahle, agcwele igolide.

⁷ Phansi le kukhona indlela engaziwayo lukhozi, engabonwa yilinqe,

⁸ engahanjwa yizilo ezinkulu, engazanga ihanjwe yizilwane.

⁹ Bayelula izandla zabo emadwaleni ayinsengentshe, baphande izisekelo zentaba;

¹⁰ bambe imisele emadwaleni, lamehlo abo abone konke okuligugu.

¹¹ Bayavala izifula ukuze zingagelezi, lokufihlakeleyo bayakukhuphela ekukhanyeni.

¹² Kodwake ukuhlakanipha kungafunyanwa ngaphi? Lomthombo wokuqedisisa ungaphi na?

¹³ Umuntu kayazi indlela yokuya kukho, kakufunyaniswa elizweni labaphilayo.

¹⁴ Ingaphansi komhlaba ithi: Kakukho kimi. Lolwandle luthi: Kakukho kimi.

¹⁵ Kungethengwe ngegolide, lentengo yakho kayiyikulinganiswa yisiliva.

¹⁶ Kungelingane legolide laseOfiri, lamatshe amahle athiwa ionikse lesafire.

¹⁷ Igolide lengilazi kungelingane lakho, futhi kungenaniswe ngezinto ezinhle zegolide elihle.

¹⁸ Angephathwe amatshe athiwa yikorali lekrisitali, Intengo yokuhlakanipha ingaphezu kwamatshe aligugu.

¹⁹ Ilitshe elihle laseEtiyopiya elithiwa itopazi lingelinganiswe lakho, kungelingane legolide elihle.

²⁰ Phoke, ukuhlakanipha kuvelaphi na? Ingaphi indawo yokuqedisisa na?

²¹ Kusithekile emehlweni abo bonke abaphilayo, kwafihlwa ezinyonini zaphezulu.

²² UkuBhujiswa lokuFa kuthi: Sizwile ngendlebe zethu amahungahunga ngakho.

²³ Kodwa uNkulunkulu uyayiqedisisa indlela yakho, uyayazi indawo yakho.

²⁴ Ngoba uyakhangela imikhawulo yomhlaba, abone konke okungaphansi komthunzi welanga.

²⁵ Lapho emisela umoya amandla awo, elinganisa amanzi ngesilinganiso,

²⁶ lapho esenzela izulu isimiso, lombane wokuduma indlela,

²⁷ wakubona, walandisa ngakho, wakumisa, wakuhlola.

²⁸ Wathi emuntwini: Khangela, ukuyesaba iNkosi yikho okuyikuhlakanipha, lokusuka ebubini kuyikuqedisisa.