UJobe 27 - iBhayibhili Elingcwele 1978

UJobe uthi kalacala

¹ UJobe wabuya waqhubeka ngokukhuluma kwakhe esithi:

² Ngifunga uNkulunkulu osusileyo ilungelo lami, loSomandla owenza umoya wami waba buhlungu,

³ nxa kusekhona umphefumulo kimi, lomoya kaNkulunkulu usesemakhaleni ami,

⁴ umlomo wami kawuyikukhuluma amanga, lolimi lwami lukhulume inkohliso.

⁵ Kakube khatshana lami ukuba ngilivumele; kangiyikudela ubuqotho bami ngize ngife.

⁶ Ngiyabambelela ekulungeni kwami ngingakuyekeli; inhliziyo yami kayingisoli langolulodwa lwensuku zami.

⁷ Isitha sami kasibe njengomubi, longivukelayo abe njengongalunganga.

⁸ Ngoba liyini ithemba longamesabiyo uNkulunkulu nxa uNkulunkulu esemqumile, esesusile ukuphila kwakhe na?

⁹ UNkulunkulu uzakuzwa ukukhala kwakhe yini nxa esehlelwa yikuhlupheka na?

¹⁰ Uzathokoza ngoSomandla na? Uzakhuleka kuye izikhathi zonke na?

¹¹ Ngizalifundisa mayelana lesandla sikaNkulunkulu, okukaNkulunkulu kangiyikukufihla kini.

¹² Lina lonke likubonile. Phoke, likhulumelani okuyize na?

Amanye amazwi kaZofari

¹³ Nansi isabelo somuntu omubi kuNkulunkulu, lelifa abacindezeli abalamukela kuSomandla;

¹⁴ uba abantwana bakhe besanda, bandela umkhonto, lenzalo yakhe kayilakho ukudla okwaneleyo.

¹⁵ Abasalayo baqedwa yikufa, labafelwakazi babo kababalileli.

¹⁶ Loba ebuthelela isiliva njengothuli, ebuthelela izigqoko ezinengi,

¹⁷ angazibuthelela, kodwa zizagqokwa ngolungileyo, labangelasici babelane isiliva.

¹⁸ Indlu ayakhayo injengendlu yobulembu, njengedumba elakhiwa ngumlindi.

¹⁹ Ngolunye usuku uyalala enothile, kodwa kayikuphinda futhi; uyaphaphama, inotho yakhe yonke iphelile.

²⁰ Uvalo luyamehlela njengempophoma, lesivunguzane simphephule ebusuku.

²¹ Umoya wasempumalanga uyamthatha ahambe, uyamphephula endaweni yakhe.

²² Uyamtshaya ungamyekeli aze azame ngamandla wonke ukubaleka.

²³ Abantu bazamtshayela izandla, bamncifele endaweni zonke.