UJobe 24 - iBhayibhili Elingcwele 1978

UJobe usola ukuthi uNkulunkulu kananzi ububi

¹ Kungani uSomandla engazimiseli izikhathi zokuthonisisa na? Kungani labo abamaziyo bengazazi lezozikhathi na?

² Abantu bayathuthukisa imingcele, bathumbe imihlambi labelusi.

³ Bayaxotsha ubabhemi wentandane, bathathe inkabi yomfelwakazi ibe yisibambiso.

⁴ Baxotsha abayanga emigwaqweni; bonke abayanga bomhlaba bayacatsha.

⁵ Njengobabhemi beganga enkangala abayanga bayaphumela emisebenzini yabo, badinge impango enkangala ibe yikudla kwabantwana babo.

⁶ Emasimini bazibuthela ukudla kwenkomo, badobhe okuseleyo esivinini somubi.

⁷ Balala beze ubusuku bonke, bengambathanga, bengelalutho lokuvikela umqando.

⁸ Bamanzi ngezihlambo zasezintabeni, babambelela edwaleni ngoba bengelandawo yokucatsha.

⁹ Intandane zihluthunwa ebeleni, lengane yomyanga ithathwa ibe yisibambiso.

¹⁰ Bahamba beze bengagqokanga, bathwala izithungo belambile;

¹¹ bahluza izithelo zezihlahla zeoliva ukuba bazuze amafutha, banyathela isikhamelo sewayini, kodwa bona uqobo babulawa ngumhawu.

¹² Phakathi komuzi kuyezwakala ukukhala kwabafayo, abalimeleyo bayakhalela ukusizwa; kodwa uNkulunkulu kananzi ukukhuleka kwabo.

¹³ Bakhona abangakuthandiyo ukukhanya, abangazijwayelanga indlela zakho, abaxwaya imikhondo yakho.

¹⁴ Umbulali uyavuka emadabukakusa ukuba abulale umyanga loswelayo; ebusuku uyeba.

¹⁵ Isiphingi laso siyalindela ukuhlwa, sisithe ubuso baso; sisithi: Kakho ozangibona.

¹⁶ Abanye bafohlela endlini sekumnyama, bazivalele emini, kabakuthandi ukukhanya.

¹⁷ Ngoba kubo bonke umnyama omkhulu unjengokusa, ngoba bejwayelene lomnyama owesabekayo.

¹⁸ Abantu abanje bayizikhukhula ezimuka lamanzi; amasimu abo alebizo elibi elizweni lonke, kakulasisebenzi esizasondela ezivinini zabo.

¹⁹ Njengoba ukubalela lokutshisa kumqeda ungqoqwane, ngokunjalo amanzi asendaweni yabafileyo ayasiqeda isoni.

²⁰ Unina kasayikumkhumbula, lempethu izakumdla aphele nya, kasayikukhunjulwa kuze kube nininini.

²¹ Bacindezela inyumba engazaliyo, kabamenzeli okuhle umfelwakazi.

²² Kanti uNkulunkulu ngamandla akhe uyabakhukhula abalamandla, bangavuka, kodwa kabalathemba lokuphila.

²³ Uyabanika ukulondolozwa lokusekelwa, kodwa amehlo akhe aphezu kwendlela zabo.

²⁴ Bayaphakanyiswa okwesikhatshana, besebedlula, bayabuna baphele njengeluba, bayaqunywa njengezihloko zamabele.

²⁵ Uba kungenjalo, ngubani ongangenza ngibe ngolamanga na? Ngubani ongatshengisa ukuthi amazwi ami ayize na?