UJobe 23 - iBhayibhili Elingcwele 1978

Impendulo kaJobe: ufisa ukulandisa indaba yakhe phambi kukaNkulunkulu

¹ UJobe wasephendula esithi:

² Imicabango yami lamhla iyalwa, ngoba isandla sikaNkulunkulu sinzima phezu kwami ekuhluphekeni kwami.

³ Kungathi ngabe ngiyazi lapho ngingamfumana khona, ukuba ngiye enkundleni yakhe,

⁴ ngilandise indaba yami phambi kwakhe, ngilandise ngokugcweleyo ukusola kwami,

⁵ ngizwe ukuphendula kwakhe, ngizwe ukuthi uzakuthini kimi!

⁶ UNkulunkulu ubezakuphikisana lami ngamandla akhe amakhulu na? Atshi, ubezakungilalela.

⁷ Lapho oqotho angakhulumisana laye, lami bengizakukhululwa ngokupheleleyo ngumahluleli wami.

⁸ Uba ngisiya phambili, kakho lapho. Uba ngisiya emuva, kangimfumani.

⁹ Nxa ngiphendukela ngakwesokhohlo, kangimboni, ngikhangele ngakwesokunene, kodwa lalapho kangimboni.

¹⁰ Kanti uyayazi indlela yami, nxa esengihlolile, ngizaphuma nginjengegolide.

¹¹ Unyawo lwami lunamathele ezinyathelweni zakhe, ngiyigcinile indlela yakhe, kangiphambukelanga eceleni.

¹² Kangisukanga emlayweni wezindebe zakhe, ngawalondoloza amazwi akhe enhliziyweni yami.

¹³ Yena usekhethile, ngubani ongamsusa na? Lokho akufisayo uyakwenza.

¹⁴ Ngoba uzaphelelisa lokho angimisele khona; lezinto ezinengi ezinjalo zisengqondweni yakhe.

¹⁵ Ngalokho ngitshaywa luvalo ngokuba khona kwakhe; nxa ngicabanga, ngiyamesaba.

¹⁶ UNkulunkulu uyidanisile inhliziyo yami, uSomandla ungethusile.

¹⁷ Ngoba kakusiwo umnyama ongethusayo, lanxa ithunzi lokufa lingigubuzele.