UJobe 22 - iBhayibhili Elingcwele 1978

Inkulumo yesithathu kaElifazi: uthi ububi bukaJobe bukhulu

¹ Wasephendula uElifazi waseTemani esithi:

² Umuntu angaba losizo kuNkulunkulu na? Angithi lohlakaniphileyo uyazisiza yena uqobo na?

³ Kungamthokozisa yini uSomandla uba ulungile na? Kuyinzuzo kuye yini uba usenza indlela zakho ziphelele na?

⁴ Kuyikumesaba kwakho akusola kuwe, akuthonisise wena ngenxa yalokho na?

⁵ Ububi bakho kabubukhulu na? Lezono zakho kazilakuphela.

⁶ Ngoba uthethe isibambiso ngeze kubafowenu, wahlubula abayanga izigqoko, bahambaze.

⁷ Kawumnathisanga amanzi odiniweyo, lolambileyo umncitshile ukudla.

⁸ Phoke, umhlaba ungowabalamandla bodwa yini, indawo yabakhethiweyo abayingcosana na?

⁹ Ubaxotshile abafelwakazi bengelalutho, watshaya izintandane ezingelakuzivikela.

¹⁰ Ngakhoke imijibila ikuhanqile, lovalo luyakhwehlela.

¹¹ Ukukhanya kwakho kufiphele ukuze ungaboni, lesikhukhula samanzi sikusibekele.

¹² Impela uNkulunkulu uyahlala engqongeni yezulu, uzikhangelela phansi zonke inkanyezi lanxa ziphezulu kangaka.

¹³ Kantike uthi: UNkulunkulu wazini na? Angathonisisa yini engale komnyama omkhulu na?

¹⁴ Amayezi amnyama amsibekele ukuze angaboni, uhamba engqongeni yezulu.

¹⁵ Uzabambelela kizo indlela ezindala ezahanjwa ngabantu ababi na?

¹⁶ Bahluthunwa isikhathi singakafiki, lezisekelo zabo zakhukhulwa.

¹⁷ Bathi kuNkulunkulu: Suka kithi; uSomandla angasenzani na?

¹⁸ Kanti wayegcwalise izindlu zabo ngokuhle, lanxa amacebo abo lawakhe ayehlukene kakhulu.

¹⁹ Abalungileyo bayakubona lokho bathokoze, labangelasici babahleka ulunya,

²⁰ besithi: Izitha zethu zichithiwe, lezikutshiyileyo umlilo ukuqedile.

²¹ Buyisana loNkulunkulu ube lokuthula, ngalokho uzazuza okuhle.

²² Yamukela ukufundisa kwakhe, ulondoloze amazwi akho enhliziyweni yakho.

²³ Uba ubuyela kuSomandla, uzithobe, ususa okubi khatshana lethente lakho,

²⁴ igolide lakho ulitshaye uthuli nje, legolide laseOfiri libe njengamatshe omfula nje,

²⁵ uSomandla uqobo lwakhe uzakuba ligolide lakho lesiliva sakho.

²⁶ Ng’khonake uzazithokozisa ngoSomandla, uphakamisele ubuso bakho kuNkulunkulu;

²⁷ uzakhuleka kuye, akuzwe, ugcwalise izithembiso zakho.

²⁸ Uzaquma indaba, uyenzelwe, lokukhanya kukhanye endleleni zakho.

²⁹ Ngoba uNkulunkulu uyabehlisa abazigqajayo, kodwa uyabasiza abazithobileyo.

³⁰ Uzamkhulula umuntu ongelasici; wena uzakhululwa ngobumhlophe bezandla zakho.