UJobe 21 - iBhayibhili Elingcwele 1978

Impendulo kaJobe: ubonile ukuthi ababi bayaphumelela

¹ UJobe wasephendula esithi:

² Ake lizwe kuhle amazwi ami, lokho kube yinduduzo kimi evela kini.

³ Ake lingibekezelele, ngizakhuluma; emva kokukhuluma kwami lingakloloda.

⁴ Minake ukusola kwami kungomuntu yini? Phoke, ngingekhathazeke na?

⁵ Ngikhangelani, limangale, libambe imilomo yenu ngezandla.

⁶ Lapho ngikhumbula nje, ngitshaywa luvalo, lomzimba wami uthuthumele.

⁷ Ababi baphilelani, babe badala, babe lamandla amakhulu na?

⁸ Abantwana babo bahlala kuhle besekhona, lenzalo yabo phambi kwabo.

⁹ Imizi yabo kayiyikwesaba, loswazi lukaNkulunkulu kalubatshayi.

¹⁰ Inkunzi yabo iyakhwela ingaphuthi, lenkomokazi yabo iyazala amakhonyane, ingaphunzi.

¹¹ Abantwana babo bayaphuma njengamawundlu, bayadlala, lengane zabo zigide.

¹² Bayahlabela ngesigubhu langechacho, bathokoze ngelizwi lomhlanga.

¹³ Baqeda insuku zabo ngokuhle, behlele endaweni yabafileyo ngokuthula.

¹⁴ Bathi kuNkulunkulu: Suka kithi; kasifuni ukwazi indlela zakho.

¹⁵ Uyini uSomandla ukuba simkhonze na? Sizazuzani uba sikhuleka kuye na?

¹⁶ Ukuphumelela kwabo kakukho ezandleni zabo na? Amacebo ababi afana lawakhe uNkulunkulu na?

¹⁷ Kukangaki isibane sababi sicima na? Kukangaki ingozi ibehlela na? Kukangaki uNkulunkulu ebanika ubuhlungu olakeni lwakhe na?

¹⁸ Kukangaki lowomuntu enjengezibi phambi komoya, enjengomule ophetshulwa ngumoya na?

¹⁹ Yebo, lithi: Ukuhlupheka kwakhe uNkulunkulu ukudlinzekele abantwana bakhe. Atshi bo, kamphindisele khathesi, atshaywe.

²⁰ Amehlo akhe kawabone ukuchitheka kwakhe, anathe ulaka lukaSomandla.

²¹ Ngoba angazikhathazelani ngabantwana abeza emva kwakhe, lapho inyanga zakhe seziphelile na?

²² Kukhona ongafundisa uNkulunkulu ukwazi, yena owahlulela lalabo abasezulwini phezulu na?

²³ Omunye uyafa esaphile kuhle, ezinzile, elokuthula,

²⁴ umzimba wakhe uzimukile, umnkantsho wamathambo akhe umanzi;

²⁵ lomunye afe umoya wakhe usebuhlungwini, engazanga adle okuhle.

²⁶ Balala phansi emhlabeni bobabili, lempethu zibasibekele.

²⁷ Khangelani, ngiyayazi imicabango yenu, amacebo enu amabi ngami.

²⁸ Ngoba lithi: Ingaphi indlu yesikhulu na? Lingaphi ithente lomubi na?

²⁹ Kalibuzanga kwabahambayo emigwaqweni na? Kalamukelanga ubufakazi babo

³⁰ ukuba omubi uyaphepha osukwini losizi, lokuba uyophulwa osukwini lwentukuthelo na?

³¹ Ngubani omsolayo ngokwenza kwakhe na? Ngubani ophindisela ngalokho akwenzileyo na?

³² Lapho esesiwa elibeni elilindwayo,

³³ abantu abamlandelayo labahamba phambi kwakhe banengi, lomhlabathi umnandi kuye.

³⁴ Phoke lizangiduduza njani ngeze na? Impendulo zenu ziyinkohliso nje.