UJobe 20 - iBhayibhili Elingcwele 1978

Inkulumo yesibili kaZofari: uthi ukuthokoza kwababi kufitshane

¹ Wasephendula uZofari waseNama esithi:

² Ukukhathazeka kwengqondo yami kuyangifuqa ukuba ngiphendule, yikho nje ngiphangisa ukukhuluma.

³ Ngizilwe insolo elihlazo kimi, umoya wami uyangifuqa ukuba ngiphendule.

⁴ Kawazi yini ukuba lokhu kwasukela endulo, selokhu kwaba khona umuntu emhlabeni,

⁵ ukuthi ukuthokoza kwababi kufitshane, lokujabuta kwabangamesabiyo uNkulunkulu kungokwesikhatshana nje?

⁶ Loba ubude bakhe bufinyelela ezulwini, lekhanda lakhe lithinta amayezi,

⁷ uzabhubha kokuphela njengobulongwe bakhe, kuthi labo abambonileyo bathi: Ungaphi na?

⁸ Uzanyamalala njengephupho, angabe esafunyanwa, axotshwe njengombono wasebusuku;

⁹ lelihlo elake lambona lingaphindi limbone futhi, lendawo yakhe ingabe isambona.

¹⁰ Abantwana bakhe bazazidingela kwabangabayanga, izandla zabo zibuyisele inotho yakhe.

¹¹ Amathambo akhe ayegcwele ubutsha, kodwa azalala kanye laye emhlabathini.

¹² Lanxa ububi bumnandi emlonyeni wakhe, ebufihla ngaphansi kolimi lwakhe,

¹³ engavumi ukubuyekela, ebubhodabhodisa emlonyeni wakhe,

¹⁴ ukudla kwakhe kuyaphenduka esiswini sakhe, kuphenduka kube yibuhlungu benyoka phakathi kwakhe.

¹⁵ Uginya inotho, abuye ayihlanze; uNkulunkulu uyayikhupha esiswini sakhe.

¹⁶ Uzamunya ubuhlungu benyoka, lolimi lwebululu luzambulala.

¹⁷ Angeke ayibone imifula yochago, lezifula zoluju lolaza.

¹⁸ Uzabuyisela izithelo zomsebenzi wakhe, angaziginyi; kayikuthokoza ngenzuzo yomsebenzi wakhe.

¹⁹ Ngoba ubacindezele wabalahla abayanga, wathatha indlu abengayakhanga.

²⁰ Lokhu ubuhwaba bakhe babungelamkhawulo, kayikulondoloza ulutho kulokho akufisayo;

²¹ kakusalanga lutho emva kokudla kwakhe; ngakhoke ukuphumelela kwakhe kakuyikuma.

²² Ekupheleni kokuphumelela kwakhe uzakuba sebunzimeni, ukuhlupheka konke kuzamfikela.

²³ UNkulunkulu ehlisele intukuthelo yakhe phezu kwakhe, amtshaye ngobuhlungu.

²⁴ Lapho evika isikhali sensimbi, uzahlatshwa ngomtshoko wethusi,

²⁵ uphutshe emhlana wakhe, umcijo udabule inyongo yakhe;

²⁶ alindelwe ngumnyama omkhulu. Umlilo ongavuthelwayo umqede, lokuseleyo ethenteni lakhe kuzaphela.

²⁷ Izulu lizakwambula ububi bakhe, lomhlaba umvukele.

²⁸ Impahla yendlu yakhe izathathwa, ikhukhulwe osukwini lwentukuthelo kaNkulunkulu.

²⁹ Yiso leso isabelo somuntu omubi esivela kuNkulunkulu, lelifa alimiselwa nguNkulunkulu.