UJobe 2 - iBhayibhili Elingcwele 1978

¹ Kwathi futhi ngelinye ilanga afika amadodana kaNkulunkulu ukuma phambi kweNkosi, uSathane wafika kanye lawo.

² INkosi yathi kuSathane: Wenake, uvela ngaphi na? USathane wayiphendula iNkosi wathi: Ekuzulazuleni lomhlaba lokuhambahamba kuwo.

³ INkosi yasisithi kuSathane: Uyiqaphele yini inceku yami uJobe ukuthi kakho onjengaye emhlabeni, ongelasici loqotho, owesaba uNkulunkulu, loxwaya okubi na? Usabambelele kubo ubuqotho bakhe, lanxa wangivusa ukuba ngimchithe ngeze.

⁴ USathane wayiphendula iNkosi wathi: Isikhumba ngesikhumba! Konke umuntu alakho angakunikela ngokuphila kwakhe.

⁵ Kodwa ake welule isandla sakho, uthinte ithambo lakhe lenyama yakhe; uzakukuthuka ebusweni bakho.

⁶ INkosi yathi kuSathane: Khangela, usemandleni akho; utshiye ukuphila kwakhe kuphela.

⁷ USathane wasephuma phambi kweNkosi, wamehlisela uJobe izilonda ezibhibhidlayo, kusukela enyaweni kwaze kwafika ekhanda.

⁸ Wathatha udengezana, waziphala ngalo, wahlala esilotheni.

⁹ Umkakhe wathi kuye: Lokhu usabambelele kubo ubuqotho bakho na? Mthuke uNkulunkulu, ufe.

¹⁰ Kodwa yena wathi kuye: Ukhulumisa okowesifazana oyisithutha. Sizakwamukela okuhle kuphela esandleni sikaNkulunkulu, singamukeli lokubi na? Kukho konke lokhu uJobe konanga ngomlomo wakhe.

¹¹ Lapho abangane bakhe abathathu uElifazi waseTemani, loBilidadi waseShuhi, loZofari waseNama sebezwile ngakho konke lokhu okubi okumehleleyo, bafika kuye bevela ezindaweni zabo. Bavumelana ukuba bayemkhalela bamduduze.

¹² Lapho bembona bekhatshana, kabamazanga, baphakamisa amazwi abo bakhala, badabula izigqoko zabo, baphosa uthuli phezulu emakhanda abo.

¹³ Bahlala phansi kanye laye insuku eziyisikhombisa lobusuku obuyisikhombisa, bengamkhulumisi ngoba bebona ukuthi uyafuthelwa kakhulu.