UJobe 19 - iBhayibhili Elingcwele 1978

Impendulo kaJobe: uyazi ukuthi uMsizi wakhe uzakumsiza

¹ Wasephendula uJobe esithi:

² Koze kube nini lingihlupha, lingiphahlaze ngamazwi na?

³ Sekukanengi lingithela ngehlazo; kalilanhloni ukuthi lingiphatha kubi na?

⁴ Uba kuliqiniso ukuthi ngiduhile, ukuduha kwami ngokwami ngedwa.

⁵ Uba impela lizikhukhumezela kimi, liphikisane lami ngenxa yehlazo lami,

⁶ yazinike ukuba nguNkulunkulu ongihlanekeleyo, wangibamba ngembule lakhe.

⁷ Uba ngimemeza ngisithi: Nanku okubi! kakho ongiphendulayo. Uba ngicela ukusizwa, kangizuzi ukwahlulelwa.

⁸ Uyivalile indlela yami ukuze ngingadluli, wafaka umnyama emikhondweni yami.

⁹ Ungamukile udumo lwami, wasusa umqhele ekhanda lami.

¹⁰ Uyangibhidliza inxa zonke, sengiphelile, uliquphule ithemba lami njengomuntu equphula isihlahla.

¹¹ Ulaka lwakhe luyavutha kimi, ungitshaya isitha sakhe.

¹² Amabutho akhe ayabuthana, alungisela ukungivimbezela, azingelezele ithente lami.

¹³ Ususile kimi abafowethu, labazana lami sebehlukene impela lami.

¹⁴ Izihlobo zami labangane bami bangihlamukile,

¹⁵ izethekeli ezisendlini yami sezingikhohliwe, lencekukazi zami zingitshaya owasemzini, sengingowezizweni emehlweni azo.

¹⁶ Ngibiza inceku yami, ingasabeli; lanxa ngiyincenge ngamazwi ami.

¹⁷ Ngiyanuka kumkami, ngiyisinengiso kumadodana kamama.

¹⁸ Labantwana abancinyane bayangidelela, lapho bengibona, bayangihleka.

¹⁹ Zonke izihlobo zami ziyanengwa yimi, labo ebengibathanda sebengifulathele.

²⁰ Amathambo ami anamathelana lesigogo sami lenyama yami, ngisile manayinayi.

²¹ Ngihawukelani, ngihawukelani, lina bangane bami! Ngoba isandla sikaNkulunkulu singithintile.

²² Lingizingelelani njengoNkulunkulu na? Kungani linganeliswa yinyama yami na?

²³ Kungathi ngabe amazwi ami alotshiwe! Kungathi ngabe alotshiwe ogwalweni!

²⁴ Kungathi ngabe abhalwe ngensimbi langomnuso, agujwa edwaleni kuze kube nini lanini!

²⁵ Ngoba mina ngiyazi ukuba uMsizi wami ukhona, ekupheleni uzakuma emhlabeni;

²⁶ ngimbone ufakazi wami emi eceleni kwami, ngibone ummeli wami, uNkulunkulu uqobo lwakhe,

²⁷ engizambona ngawami amehlo, mina uqobo lwami kungesuye omunye. Inhliziyo yami iyaphelelwa ngamandla

²⁸ lapho lisithi: Yeka ubunengi bezinhlupheko azehlisele zona! Isisusa senkathazo sikuye.

²⁹ Qaphelisisani umhedla okhombe kini, umhedla oqeda bonke ububi; lizakwazi ukuba ukhona umahluleli.