UJobe 18 - iBhayibhili Elingcwele 1978

Inkulumo yesibili kaBilidadi: uthi ababi bazachithwa

¹ Wasephendula uBilidadi waseShuhi esithi:

² Koze kube nini ukhuluma na? Ake ucabange, andubana sikhulume.

³ Kungani usikhangela njengenkomo na? Kungani usikhangela njengezithutha na?

⁴ Wena ozidabula ngokuthukuthela, umhlaba uzatshiywa ngenxa yakho, loba amadwala asuswe endaweni yawo na?

⁵ Yebo, ukukhanya komubi kuyacima, lelangabi lomlilo wakhe kalikhanyi.

⁶ Ukukhanya kufiphele ethenteni lakhe, lesibane sakhe ngaphezu kwakhe siyacima.

⁷ Izinyathelo zakhe ezilamandla ziyafinyezwa, lamacebo akhe ayamwisela phansi.

⁸ Ezakhe inyawo zimfaka embuleni, ahambe phezu komjibila.

⁹ Umjibila umbamba isithende, abanjwe yizihitshela.

¹⁰ Uthiywe ngegoda emhlabathini, langomjibila endleleni.

¹¹ Ukwesaba kuyamethusa inxa zonke, kuxotshane laye enyaweni zakhe.

¹² Ukuchitheka kumlambele, lokuhlupheka kulindele ukukhubeka kwakhe.

¹³ Isikhumba sakhe sidliwa ngumkhuhlane, ukufa okwesabekayo kudla izitho zakhe.

¹⁴ Uyahluthunwa ethenteni athembe kilo, asiwe enkosini yokuFa.

¹⁵ Ethenteni lakhe kuyahlala okungesikho okwakhe, kuvuvuzelwe isolufa emzini wakhe.

¹⁶ Impande zakhe ziyoma ngaphansi, kubune ingatsha ngaphezulu.

¹⁷ Ukukhunjulwa kwakhe kuyaphela emhlabeni, angabi labizo elizweni.

¹⁸ Ukhutshwa ekukhanyeni axotshelwe emnyameni, axotshwe emhlabeni.

¹⁹ Kalabantwana labazukulu ebantwini bakibo, kakusali loyedwa owakhe lapho abehlala khona.

²⁰ Abentshonalanga bayethuswa lusuku lwakhe lokuchitheka, labempumalanga behlelwe yikwesaba.

²¹ Impela zinjalo izindlu zabangamesabiyo uNkulunkulu, injalo indawo yongamaziyo yena.