UJobe 17 - iBhayibhili Elingcwele 1978

¹ Umoya wami uphelile, lensuku zami ziyancipha, ngilindelwe liliba.

² Impela kukhona abangiklolodelayo, lamehlo ami asekugconeni kwabo.

³ Akube yisibambiso sami kuwe, Nkulunkulu, ngoba ngubani ongangikhuphela isibambiso na?

⁴ Lokhu uvalile ingqondo zabo ekuqedisiseni, ngakho kawuyikubayekela baphumelele.

⁵ Oceba abangane bakhe ukuba azuze isabelo sempahla yabo, amehlo abantwana bakhe azafiphala.

⁶ Ungenze ngaba yisiga ezizweni, ngaba ngokhafulelwayo.

⁷ Amehlo ami afiphele ngosizi, lazo zonke izitho zami sezilithunzi nje.

⁸ Abaqotho kuyabethusa lokhu, longelacala uvukela abangamesabiyo uNkulunkulu.

⁹ Kanti olungileyo ubambelela endleleni yakhe, lolezandla ezimhlophe uyaqina njalo.

¹⁰ Kodwa lina, phindani phela lonke, Kangiyikufumana oyedwa ohlakaniphileyo phakathi kwenu.

¹¹ Insuku zami ziphelile, lamacebo ami achithekile, kanye lezifiso zenhliziyo yami.

¹² Imini iphenduka ubusuku, lokukhanya kokusa kuyafiphala phambi kwami.

¹³ Uba ngisenza indawo yabafileyo ibe yindlu yami, uba ngisandlala icansi lami emnyameni,

¹⁴ uba ngibiza iliba ngokuthi ngubaba, lempethu ngokuthi ngumama kumbe ngudadewethu,

¹⁵ phoke ithemba lami lizabe lingaphi na? Ngubani ozananza ukulunga kwami na?

¹⁶ Lokhu kuzakwehlela lami endaweni yabafileyo, loba kutshone lami emhlabathini na?