UJobe 16 - iBhayibhili Elingcwele 1978

Impendulo kaJobe: usola ngokuphathwa kwakhe nguNkulunkulu

¹ UJobe wasephendula esithi:

² Ngizwile izinto ezinengi ezinje, lingabaduduzi ababi lina lonke.

³ Amazwi okubhuda kawayikuphela na? Liconulwa yini ukuba liphendule na?

⁴ Lami ngingakhuluma njengani uba belisendaweni yami; ngingakhuluma amazwi amanengi ngani, ngilinikinele ikhanda lami.

⁵ Bengingaliqinisa ngomlomo wami, ngiliduduze ngamazwi ami, ngipholise ubuhlungu benu.

⁶ Kodwa uba ngikhuluma, ubuhlungu bami kabuthanjiswa, uba ngiyekela, buphumula kangakanani na?

⁷ UNkulunkulu usengiqede amandla, uchithile bonke abendlu yami.

⁸ Ungicindezele, lokhu kuyibufakazi ngami, lokucaka kwami kungivukele, kuyafakaza ngami phambi kwabantu.

⁹ Ungidlwengule ekuthukutheleni kwakhe, wangizonda. Ungigedlele amazinyo; isitha sami singicijisela amehlo.

¹⁰ Abantu bangikhamisela umlomo wabo, bangimukula esihlathini, bangihlambaza, bangihlanganyela.

¹¹ UNkulunkulu unginikele ebantwini abangamesabiyo, wangiphosela ezandleni zabantu ababi.

¹² Ngangihlala kuhle kodwa, wangichoboza, wangidumela ngentamo, wangiphahlaza. Wangimisa ngaba yinto yakhe yokunenjwa,

¹³ imitshoko yakhe iyavelela inxa zonke, wangihlaba esiswini engelasihawu, wachithela phansi inyongo yami.

¹⁴ Wangivodloza ngokungitshaya njalonjalo, engidumela njengeqhawe.

¹⁵ Ngathunga isambatho sokulila ngesaka ukuba ngembathe, ngakhothamela phansi othulini.

¹⁶ Ubuso bami bubomvu ngokukhala, lemehlweni ami kulethunzi lokufa;

¹⁷ loba kungekho isihluku ezandleni zami, lokukhuleka kwami kulungile.

¹⁸ Mhlaba, ungaligqibeli igazi lami, lokukhala kwami kungabi landawo.

¹⁹ Lakhathesi ufakazi wami usezulwini, lommeli wami uphezulu.

²⁰ Abangane bami bayangiklolodela, lamehlo ami aphophoza inyembezi kuNkulunkulu.

²¹ Kungathi kungaba khona ongalamula phakathi komuntu loNkulunkulu, njengaphakathi komuntu lomngane wakhe.

²² Ngoba kusele iminyaka elutshwana ngingakahambi indlela yalapho ngingayikubuya khona.