UJobe 15 - iBhayibhili Elingcwele 1978

Inkulumo yesibili kaElifazi: uthi uJobe uziphakamisile

¹ Wasephendula uElifazi waseTemani esithi:

² Ohlakaniphileyo angaphendula yini ngamazwi ayize, azigcwalise ngomoya nje na?

³ Angaphikisa ngamazwi angasizi lutho, langenkulumo engelakumsiza na?

⁴ Wena uyachitha ukumesaba uNkulunkulu, unciphise ukucabanga ngoNkulunkulu.

⁵ Ngoba ububi bakho buyakutshela ukuthi uzakuthini, ukhetha ulimi lwabalobuqili.

⁶ Umlomo wakho yiwo okulahlayo, kayisimi; yebo, lendebe zakho ziyafakaza ngawe.

⁷ Ungumuntu wokuqala owazalwayo na? Wavela phambi kwezintaba na?

⁸ Wezwa amacebo kaNkulunkulu na? Nguwe wedwa olokuhlakanipha na?

⁹ Kuyini okwaziyo esingakwaziyo thina? Kuyini okuqondayo esingakuqondiyo lathi?

¹⁰ Kukhona phakathi kwethu izimpunga lamakhehla, amadala kuloyihlo.

¹¹ Zincinyane yini kuwe induduzo zikaNkulunkulu, lelizwi elikhulunywa kuhle kuwe na?

¹² Kungani inhliziyo yakho ilesibindi esingaka, lamehlo akho ayavutha,

¹³ ukuba umoya wakho umelane loNkulunkulu, lomlomo wakho ukhulume amazwi anje na?

¹⁴ Umuntu uyini ukuba abe ngohlambulukileyo na? Lozelwe ngowesifazana ukuba abe ngolungileyo na?

¹⁵ Uba uNkulunkulu engazithembi izithunywa zakhe, lezulu lingahlambulukanga emehlweni akhe,

¹⁶ phoke, umuntu yena onengekayo lowonakeleyo, onatha ububi njengamanzi, uzakuba njani na?

¹⁷ Ngizakukutshengisa, ungilalele, lengikubonileyo ngizakukutshela khona.

¹⁸ — lokho izihlakaniphi ezikubonakalisileyo, laboyise abangakufihlanga,

¹⁹ bona bodwa abanikwa ilizwe, okungadlulanga izihambi phakathi kwazo —

²⁰ Omubi uyazijanqa ebuhlungwini insuku zakhe zonke, leminyaka yonke emiselwe omubi ibaliwe.

²¹ Umsindo owethusayo uzwakala endlebeni zakhe; lalapho esephumelele, umchithi uyamhlasela.

²² Kathembi ukuthi uzaphuma emnyameni, umiselwe umkhonto,

²³ aphoswe abe yikudla kwamanqe; onjalo uyazi ukuba ukuchitheka kwakhe kufikile.

²⁴ Usizi lokuhlupheka kuyamethusa, kumahlule njengenkosi ezilungiselele impi.

²⁵ Ngoba uselulile isandla sakhe ukulwa loNkulunkulu, ezama ukumelana loSomandla,

²⁶ emdumela ngamandla akhe esihlangu sakhe esiqinisiweyo.

²⁷ Ubuso bakhe bugcwele ngokuzimuka, lezitho zakhe zinzima zigcwele;

²⁸ uhlala emizini echithekileyo, lezindlini ezingahlalwa muntu, ezimiselwe ukuchithwa.

²⁹ Kayikunotha, lenotho yakhe kayiyikuma, kayikugxumeka lutho emhlabeni;

³⁰ kayikuphuma emnyameni; ilangabi liyahangula amahlumelo akhe, lomoya uphephule amaluba akhe.

³¹ Angathembi ize, azikhohlise, ngoba ize lizakuba ngumvuzo wakhe.

³² Izihlahla zakhe zizabuna kungakabi yisikhathi sazo, lengatsha zakhe zingabi luhlaza futhi.

³³ Uzawohloza izithelo zakhe ezingavuthwanga njengevini, athintithe impoko zakhe njengesihlahla seoliva.

³⁴ Ngoba ixuku labangamesabiyo uNkulunkulu kalilazithelo, lomlilo uyaqothula amathente abathengwa ngomvuzo.

³⁵ Bamitha ububi, bazale isono, isizalo sabo sibeletha inkohliso.