UJobe 14 - iBhayibhili Elingcwele 1978

UJobe ukhuluma ngokuhlupheka komuntu

¹ Umuntu ozelwe ngowesifazana insuku zakhe zilutshwana, zigcwele inhlupheko.

² Uyavela njengeluba, abune, abaleke njengethunzi, angemi.

³ Kambe onje uyamkhangela yini, uyamletha ekuthonisisweni na?

⁴ Ngubani ongaveza okuhlambulukileyo kokungcolileyo na? Kakho loyedwa.

⁵ Lokhu insuku zakhe zimisiwe, lobunengi benyanga zakhe bukuwe, ummisele imikhawulo ukuba angadluli,

⁶ ungamkhangeli, umyekele, ukuze azithokozise ngensuku zakhe njengesiqatshwa.

⁷ Ngoba kukhona ithemba esihlahleni uba siganyulwa ukuthi sizabuya sihlume, lokuthi amahlumela aso kawayikuphela.

⁸ Lanxa impande yaso iguga emhlabathini, lesiphunzi saso sifele phansi,

⁹ kanti lapho sisizwa amanzi, siyahluma, sikhuphe izingatsha njengesihlahla esitsha.

¹⁰ Kodwa umuntu uyafa aphele, yebo, uyaphela, ungaphike?

¹¹ Njengamanzi atshayo echibini, lanjengomfula otshileyo,

¹² ngokunjalo umuntu uyalala phansi angavuki futhi, lize lingabi khona iphezulu, angavuki sibili, angaphatshanyiswa ebuthongweni bakhe.

¹³ Nkulunkulu, kungathi ungangifihla endaweni yabafileyo, ungithukuze kuze kudlule intukuthelo yakho, umise isikhathi sokungikhumbula.

¹⁴ Uba umuntu esifa, uzabuya aphile na? Bengizalinda zonke insuku zokutshikatshika kwami, kuze kufike usuku lokukhululeka kwami.

¹⁵ Ubuzakungibiza, mina ngikusabele, ubuzakufisa ukungibona mina engingumsebenzi wezandla zakho.

¹⁶ Kanti khathesi uyazibala zonke izinyathelo zami; kodwa ubuzakuyekela ukuqaphelisa izono zami,

¹⁷ uthungele isiphambeko sami esakeni, usibekele isono sami.

¹⁸ Intaba iyawa, ibhidlike, ledwala liyasuswa endaweni yalo,

¹⁹ amanzi ayawagubha amatshe, impophoma ziyakhukhula ubhuqu lomhlaba. Ngokunjaloke wena uyachitha ithemba lomuntu,

²⁰ uyamahlula kokuphela aze adlule, uyaphendula ubuso bakhe, umsuse.

²¹ Amadodana akhe anikwa udumo, yena angaze akwazi, ayeyiswa, kodwa angakuboni.

²² Uzwa nje ubuhlungu bomzimba wakhe, azikhalele yena kuphela.