UJobe 13 - iBhayibhili Elingcwele 1978

UJobe ucabanga ukuthi ulungile

¹ Konke lokhu ngikubonile ngamehlo ami, ngakuzwa ngendlebe zami, ngakuqedisisa.

² Elikwaziyo lami ngiyakwazi; kalingedluli ngalutho.

³ Kodwa ngifisa ukukhuluma loSomandla, ngifuna ukuphikisana loNkulunkulu.

⁴ Linake lingabaqambi bamanga, liyizinyanga ezingelamsebenzi lonke.

⁵ Kungathi ngabe liyathula, lokhu kube yikuhlakanipha kwenu!

⁶ Ake lizwe ukukhuluma kwami, lilalele ukuncenga kwami.

⁷ Lizamkhulumela uNkulunkulu ngokubi, limkhulumele ngenkohliso na?

⁸ Lizamvuna uNkulunkulu yini, ingabe lizammela na?

⁹ Kuzalilungela yini lapho eselihlola na? Lizamkhohlisa yini njengokukhohliswa komuntu na?

¹⁰ Impela uzakulisola, uba livuna abantu ensitha.

¹¹ Ubukhulu bakhe kabulethusi yini, lokwesabeka kwakhe kakuyikulehlela na?

¹² Amazwi enu ayizaga zomlotha, lokuzivikela kwenu kuyizivikelo zebumba.

¹³ Ake lithule, ngikhulume mina, kungehlele loba kuyini.

¹⁴ Ngizadela inyama yami, ngingenise ukuphila kwami engozini.

¹⁵ Uzangibulala; angiselalo ithemba; kanti ngizazivikela indlela zami phambi kwakhe.

¹⁶ Lokhu kuzakuba lusizo lwami, ukuthi ongamesabiyo uNkulunkulu kayikuza phambi kwakhe.

¹⁷ Lalelani kuhle amazwi ami, lizwe engikukhulumayo.

¹⁸ Sengiyilungisile indaba yami, ngiyazi ukuba ngizayekelwa.

¹⁹ Ngubani ozaphikisana lami na? Keze ngoba ngingazithulela ngife.

²⁰ Nkulunkulu, nginika izinto ezimbili nje, ng’khona ngingayikukucatshela.

²¹ Susela khatshana lami isandla sakho, ngingethuswa yikwesabeka kwakho.

²² Ungibize, ngizasabela, ingabe uyekele ngikhulume, uphendule.

²³ Iziphambeko zami zingaki na? Ngitshengisa isiphambeko sami lesono sami.

²⁴ Ucatshelani, ungitshayelani isitha sakho na?

²⁵ Uzakwethusa ihlamvu eliphephethekayo, uxotshane lomule owomileyo na?

²⁶ Ngoba ubale okubuhlungu ngami, wangenza ngadla ilifa lobubi bobutsha bami.

²⁷ Uzikhinile inyawo zami, waqaphela zonke indlela zami, wazibekela umkhawulo inyawo zami.

²⁸ Kanti nginjengento ebolayo, lanjengengubo edliwe zinondo.