UJobe 12 - iBhayibhili Elingcwele 1978

Impendulo kaJobe: ukhuluma ngamandla langokuhlakanipha kukaNkulunkulu

¹ Wasephendula uJobe esithi

² Impela yini elingabantu, lokuhlakanipha kuzakufa lani.

³ Kodwa lami ngilengqondo njengani, kalingedluli ngalutho. Ngubani ongazaziyo izinto ezinje na?

⁴ Ngiyinhlekisa kubangane bami. Mina engangikhuleka kuNkulunkulu, angiphendule, umuntu olungileyo ongelasici, sengiyinhlekisa.

⁵ Emicabangweni yomuntu ohlezi kuhle ingozi iyadeleleka, ilungiselwe abalenyawo ezitshelelayo.

⁶ Kanti amathente abaphangi alokuthula, labamthukuthelisayo uNkulunkulu bahlala kuhle, abenza amandla abo abe ngunkulunkulu wabo.

⁷ Kodwa ake ubuze inyamazana, zizakukufundisa, lenyoni zaphezulu, zizakukutshela,

⁸ lezinto ezihahabayo zikufundise, inhlanzi zolwandle, zikulandisele.

⁹ Nguwuphi ongaziyo phakathi kwakho konke lokhu ukuba isandla sikaNkulunkulu sikwenzile lokhu na?

¹⁰ Ukuphila kwakho konke okuphilayo kusesandleni sakhe, kanye lemimoya yabantu bonke.

¹¹ Indlebe kayiwahloli yini amazwi njengolwanga lunambitha ukudla na?

¹² Ubudala bulokuhlakanipha, lokuphila okude kuletha ukuqedisisa.

¹³ Kodwa kunkulunkulu kukhona ukuhlakanipha lamandla, ulecebo kanye lokuqedisisa.

¹⁴ Uba ediliza, kakho ongakha futhi; uba evalela umuntu, kakho ongamvulela.

¹⁵ Uba evimbela amanzi, ayatsha; uba ewavulela, ayagcwala emhlabeni.

¹⁶ Kuye kukhona amandla lokuhlakanipha; oduhisiweyo lomduhisi bangabakhe.

¹⁷ Uphendula abaluleki babe yiziphukuphuku, aphendule abahluleli babe yizithutha.

¹⁸ Uqeda amandla amakhosi, awabophe enkalweni ngamaketane.

¹⁹ Uphendula abapristi babe yiziphukuphuku, awise abalamandla;

²⁰ abathembekileyo abaphendule babe yizimungulu, asuse ukuhlakanipha kwabadala.

²¹ Uthela izikhulu ngehlazo, aqede amandla ababusayo.

²² Uyambula imfihlakalo esemnyameni, alethe ukukhanya emnyameni omkhulu;

²³ enze izizwe zibe zinkulu, abuye azichithe, andise izizwe, abuye azisuse.

²⁴ Uyasusa ukuhlakanipha ezikhulwini zabantu bomhlaba, aziduhise enkangala engelandlela,

²⁵ ziphumputhe emnyameni ongelakukhanya, ziyende njengomuntu odakiweyo.