UJobe 11 - iBhayibhili Elingcwele 1978

Inkulumo yokuqala kaZofari: uthi uJobe wonile

¹ Wasephendula uZofari waseNama esithi:

² Kambe kawayikuphendulwa amazwi amanengi kangaka na? Umuntu okhulumayo kakhulu wanda ukuba ngoqondileyo na?

³ Ukulawula kwakho kuzathulisa abantu na? Lalapho ukloloda, kakho ongakukhuza na?

⁴ Ngoba uthi: Ukufundisa kwami kulungile, ngihlambulukile emehlweni kaNkulunkulu.

⁵ Kungathi uNkulunkulu angakhuluma, avule umlomo wakhe kuwe,

⁶ ukuba akutshele imfihlakalo yokuhlakanipha! Ngoba ukwazi kwakhe kunenginengi. Yazike ukuba uNkulunkulu ukutshaya ngokungalingananga icala lakho.

⁷ Kambe ungayihlola yini imfihlakalo kaNkulunkulu, ungakuhlola ukuphelela kukaSomandla na?

⁸ Kuphakeme kulezulu, ungenzani na? Kutshonile kulendawo yabafileyo, ungazini na?

⁹ Isilinganiso sakho side kulomhlaba, sibanzi kulolwandle.

¹⁰ Uba ekwedluleni kwakhe ebopha umuntu, amthonisise, ngubani ongamkhalimela na?

¹¹ Ngoba uyabazi abantu ababi; lapho ebona ububi kayikubuqaphelisa na?

¹² Umuntu oyisiphukuphuku angaba lokuqedisisa kuphela nxa ubabhemi weganga engazala umuntu!

¹³ Uba ulungisa inhliziyo yakho, ungelulela izandla zakho kuye.

¹⁴ Uba uphethe ububi, bulahle, ungavumeli buhlale emathenteni akho.

¹⁵ Ng’khona ungaphakamisa ubuso bakho ungelanhloni, uqine, ungesabi.

¹⁶ Uzakhohlwa ukuhlupheka kwakho, ukukhumbule njengamanzi asedlulile.

¹⁷ Lokuphila kwakho kuzakhanya kulemini, lomnyama wakho ube njengasekuseni,

¹⁸ Uzakuba lethemba ngoba ithemba likhona; uzahlala kuhle, uvikelekile.

¹⁹ Uzalala engethuswa muntu, abanengi bazincengele kuwe.

²⁰ Kodwa amehlo ababi azafiphala, baswele indawo yokuphephela, ithemba abalalo libe yikufa kuphela.