UJobe 10 - iBhayibhili Elingcwele 1978

UJobe ukhala ngokuphila kwakhe

¹ Ngiyanengwa yikuphila kwami; ngizakhuluma ngokukhululeka ngokusola kwami, ngikhulume ngokudabuka emoyeni wami;

² ngithi kuNkulunkulu: Ungangilahli; ungazise ukuba kungani uphikisana lami,

³ kambe kuhle yini kuwe ukucindezela, lokudelela umsebenzi wezandla zakho, uvume amacebo ababi na?

⁴ Ulamehlo omuntu na? Ubona njengomuntu na?

⁵ Insuku zakho zinjengensuku zomuntu, leminyaka yakho injengeminyaka yomuntu yini,

⁶ ukuba udinge ububi bami, uhlole isono sami,

⁷ lanxa usazi ukuthi kangilacala, lokuba kakho ongangikhulula esandleni sakho na?

⁸ Izandla zakho zangenza, zangibumba mina, kanti khathesi usuphenduka ungichithe.

⁹ Ake ukhumbule ukuba wangenza ngebumba nje. Phoke, uzangibuyisela othulini na?

¹⁰ Kawungithululanga njengochago, wangijiyisa njengolaza na?

¹¹ Ungembesile ngesigogo langenyama, wangihlanganisa ndawonye ngamathambo langemisipha.

¹² Unginikile ukuphila lothando olungapheliyo, ukunanzelela kwakho kulondolozile umoya wami;

¹³ Kanti lokhu ukufihlile enhliziyweni yakho; ngiyazi ukuba yikho lokho okuqondileyo.

¹⁴ Uba ngisona, wena ungiqaphele, kawuyikuthethelela ukona kwami.

¹⁵ Uba ngimubi, maye mina! Uba ngilungile, ngingeke ngiphakamise ikhanda lami, ngoba ngigcwele ihlazo, ngidakwe yibuhlungu bami.

¹⁶ Loba ngiziphakamisa mina, uzangizingela njengesilwane, ubuye wenze okumangalisayo kimi.

¹⁷ Uyavuselela ukungihlasela kwakho, langokwanda kokuthukuthela kwakho uyaletha amaxuku amatsha ukungihlasela.

¹⁸ Wangikhuphelani esiswini na? Kungathi ngabe ngafa ngingakabonwa,

¹⁹ ngasuka esiswini, ngaya elibeni, njengokungathi kangizalwanga.

²⁰ Kazilutshwana yini insuku zokuphila kwami? Ake ungiyekele ukuba ngithokoze kancinyane,

²¹ ngingakayi lapho ngingasayikubuya khona, elizweni lomnyama lethunzi lokufa,

²² elizweni lomnyama lesivubevube lapho ukukhanya kunjengomnyama.