UJobe 1 - iBhayibhili Elingcwele 1978

Ukulingwa kukaJobe lokubekezela kwakhe

¹ Kwakukhona umuntu othile elizweni laseUzi, ibizo lakhe linguJobe. Lowomuntu wayengelasici, eqotho, emesaba uNkulunkulu, exwaya okubi.

² Wazala amadodana ayisikhombisa lamadodakazi amathathu.

³ Wayelezimvu eziyizinkulungwane eziyisikhombisa, lamakamela ayizinkulungwane ezintathu, lenkabi ezingamakhulu amahlanu, labobabhemi abangamakhulu amahlanu, lenceku ezinengi. Wayemkhulu lowomuntu ukwedlula bonke abantu basempumalanga.

⁴ Amadodana akhe ayejwayele ukwenza idili kube yileyo laleyo endlini yayo ngosuku lwayo; ayemema odadewabo abathathu ukuba badle banathe lawo.

⁵ Kwakuthi lapho seziphelile insuku zedili, uJobe ababize, abahlambulule, avuke ekuseni kakhulu, anikele umnikelo wokutshiswa olingana lobunengi bamadodana akhe, ngoba wathi: Mhlawumbe amadodana ami onile, amthuka uNkulunkulu enhliziyweni zawo. Wenza njalo uJobe insuku ngensuku.

⁶ Kwathi ngolunye usuku kwafika amadodana kaNkulunkulu ukuma phambi kweNkosi, loSathane wafika kanye lawo.

⁷ INkosi yathi kuSathane: Wenake, uvela ngaphi? USathane wayiphendula iNkosi wathi: Ekuzulazuleni lomhlaba lokuhambahamba kuwo.

⁸ INkosi yasisithi kuSathane: Uyiqaphele yini inceku yami uJobe ngoba kakho onjengaye emhlabeni ongelasici loqotho, owesaba uNkulunkulu loxwaya okubi na?

⁹ USathane wayiphendula iNkosi wathi: UJobe umesabela ize uNkulunkulu na?

¹⁰ Kawumvikelanga inxa zonke yena lendlu yakhe kanye lakho konke alakho na? Ubusisile imisebenzi yakhe, lemfuyo yakhe yandile elizweni.

¹¹ Kodwa akewelule isandla sakho, uthinte konke alakho; uzakukuthuka ebusweni bakho.

¹² INkosi yasisithi kuSathane: Khangela konke alakho kusemandleni akho; kodwa ungamthinti yena uqobo. Wasesukake uSathane phambi kweNkosi.

¹³ Kwathi ngolunye usuku lapho amadodana lamadodakazi akhe ayesidla enatha iwayini endlini yomfowabo omdala,

¹⁴ kwafika isithunywa kuJobe sathi: Inkabi bezikade zilima labobabhemi besidla phansi kwazo;

¹⁵ kwatheleka abantu baseSheba, bazithumba, babulala izinceku, yimi ngedwa kuphela engisilileyo ukuba ngikubikele.

¹⁶ Kwathi sisakhuluma, kwafika esinye, sathi: Umlilo kaNkulunkulu wehlile uvela ezulwini, watshisa izimvu lezinceku, waziqeda du; yimi ngedwa kuphela engisilileyo ukuba ngikubikele.

¹⁷ Sisakhuluma, kwafika esinye, sathi: AmaKaladiya angamaxuku amathathu ahlasele amakamela, awathumba, abulala izinceku, yimi ngedwa kuphela engisilileyo ukuba ngikubikele.

¹⁸ Sisakhuluma, kwafika esinye, sathi: Amadodana lamadodakazi akho abekade esidla enatha iwayini endlini yomfowabo omdala;

¹⁹ umoya omkhulu waqhamuka enkangala, watshaya insika zozine zendlu, yawela phezu kwabo, bafa; yimi ngedwa kuphela engisilileyo ukuba ngikubikele.

²⁰ UJobe wasesuka edabula ingubo yakhe, waphuca ikhanda lakhe, wawa phansi, wakhuleka;

²¹ wathi: Ngaphuma ngize esiswini sikamama, ngizabuyela khona ngize; iNkosi yapha, iNkosi ibuye yathatha; kalidunyiswe ibizo leNkosi.

²² Kukho konke lokhu uJobe konanga, kamsolanga ngokubi uNkulunkulu.