UJeremiya 9 - iBhayibhili Elingcwele 1978

¹ Kungathi ngabe ikhanda lami lingamanzi, lamehlo ami angumthombo wenyembezi, ukuba ngikhalele ababuleweyo ebantwini bami emini lebusuku.

² Kungathi ngabe ngilendawo yokuhlala enkangala, ukuba ngisuke ebantwini bami, ngibatshiye; ngoba bonke bayizifebe, balixuku labantu abakhohlisayo.

³ Balungele ukuqamba amanga; amanga akhulile kuleqiniso elizweni; basuka kokubi baye kokubi, minake kabangazi, kutsho iNkosi.

⁴ Ilowo lalowo kaxwaye umakhelwana wakhe, lingabathembi abafowenu, ngoba bonke abafowenu bayaphica, labo bonke omakhelwana benu bathanda ukunyeya.

⁵ Yilowo lalowo ukhohlisa umakhelwana wakhe, kakho okhuluma iqiniso, bazifundisile inlimi zabo ukuqamba amanga, bazidinisa ngokwenza okubi, baze behluleke ukuphenduka.

⁶ Bandisa ububi phezu kokubi, lenkohliso phezu kwenkohliso, bayala ukungazi mina, kutsho iNkosi.

⁷ Ngakhoke, iNkosi yamabandla ithi: Ngizabancibilikisa ngibahlole; ngoba kuyini okunye engingakwenza ngenxa yabantu bami?

⁸ Ulimi lwabo lungumtshoko obulalayo, lukhuluma inkohliso; yilowo lalowo ukhuluma kuhle ngomlomo wakhe lomakhelwana wakhe, kodwa enhliziyweni yakhe wenza amacebo okumcathamela.

⁹ Kangiyikubatshaya ngenxa yalezizinto na? kutsho iNkosi. Kangiyikuphindisela esizweni esinje na?

¹⁰ Ngizakhala ngililele izintaba, lamadlelo asenkangala, ngoba kuchithiwe, kakusekho ohamba khona, kakusezwakali ukukhala kwezinkomo, inyoni zaphezulu lenyamazana zibalekile zahamba.

¹¹ Ngizalenza iJerusalema libe lunxiwa oludilikileyo lendawo yamakhanka, ngenze imizi yakoJuda ibe yinkangala engelamuntu.

Ilizwe liyachitheka labantu bayakhala

¹² Ngubani umuntu ohlakaniphileyo ongaqedisisa lokhu na? INkosi ikhulume lobani ukuba akubike lokhu na? Ilizwe lichithelweni latshiswa laba yinkangala, ukuba kungahambi muntu khona na?

¹³ INkosi yathi: Kungoba belahlile umlayo wami engawubeka phambi kwabo, bengalilalelanga ilizwi lami, bengahambanga ngalo,

¹⁴ belandela inhliziyo zabo ezilenkani bedinga oBali, njengokufundiswa kwabo ngoyise.

¹⁵ Ngakhoke iNkosi yamabandla, uNkulunkulu kaIsrayeli, ithi: Ngizabanika lababantu umhlonyane ukuba bawudle, banathe amanzi abulalayo.

¹⁶ Ngizabachithela ezizweni abangazanga bazazi bona labokhokho babo, ngibalandisele ngempi, ngize ngibaqede.

¹⁷ INkosi yamabandla ithi: Qaphelani, libize abesifazana bokulila ukuba beze, libize abesifazana abangamagabazi ukuba bafike,

¹⁸ baphangise ukusililela, ukuze amehlo ethu ehlise inyembezi, lenkophe zethu zimpompoze amanzi.

¹⁹ Ngoba ilizwi lokukhala liyezwakala liphuma eZiyone lisithi: Yeka ukuchitheka kwethu! Silenhloni kakhulu, ngoba silitshiyile ilizwe, ngoba babhidlizile izindlu zethu.

²⁰ Yebo, zwanini ilizwi leNkosi, lina besifazana, lendlebe zenu zilamukele ilizwi layo; lifundise amadodakazi enu ukukhala, kube yilowo lalowo afundise umakhelwana wakhe ukulila.

²¹ Ngoba ukufa kungenile ngamawindi ethu, kwangena ezigodlweni zamakhosi ethu, kwaqeda abantwana ezindleleni, lamajaha emagumeni.

²² Khuluma uthi: INkosi ithi: Izidumbu zabantu zizagcwala njengamalongwe egangeni, lanjengezithungo ezitshiywe emuva ngumvuni, kungekho ozibuthayo.

Wonke umuntu kazibonge ngokwazi uNkulunkulu

²³ INkosi ithi: Ohlakaniphileyo angazincomi ngokuhlakanipha kwakhe, leqhawe lingazincomi ngobuqhawe balo, lonothileyo angazincomi ngokunotha kwakhe;

²⁴ kodwa ozincomayo kazincome ngalokhu, ukuthi uyangiqedisisa, futhi uyazi ukuba mina ngiyiNkosi elothando olungapheliyo, lokulunga, lobuqotho emhlabeni; ngoba lezizinto ngiyezithanda, kutsho iNkosi.

²⁵ Khangela, insuku ziyeza, kutsho iNkosi, lapho ngizatshaya bonke abasokileyo kodwa bengasokanga enhliziyweni;

²⁶ ngitsho iGibithe loJuda loEdoma loAmoni loMowabi, labo bonke abahlala enkangala abagela inwele zabo emaceleni; ngoba zonke lezizizwe kazisokanga, layo yonke indlu kaIsrayeli kayisokanga enhliziyweni.