UJeremiya 8 - iBhayibhili Elingcwele 1978

¹ Ngalesosikhathi amathambo amakhosi akoJuda, lawezikhulu, lamathambo abapristi labaprofethi, lamathambo abakhileyo eJerusalema, azakhutshwa emangcwabeni, kutsho iNkosi;

² azachaywa elangeni lasenyangeni, lakuzo zonke inkanyezi, abakuthandileyo bakukhonza, abakulandeleyo bakudinga, bakudumisa; kawayikubuthwa angcwatshwe futhi, azakuba njengomquba emhlabathini.

³ Ukufa kuzakuba ngcono kulokuphila kubo bonke abaseleyo balesisizwe esibi, kuzo zonke indawo lapho ngibaxotshele khona, kutsho iNkosi yamabandla.

Izono lokugweba

⁴ Uzakuthi kibo: INkosi ithi: Abantu bayawa, bangavuki na? umuntu uyaphambuka, angabuyi aphenduke na?

⁵ Phoke, baphambukeleni lababantu, bahlamuke kokuphela na? Baqinela enkohlisweni, bayala ukuphenduka.

⁶ Ngiqaphele ngalalela, kodwa kabakhulumanga kuhle, kakho loyedwa ophendukayo ebubini bakhe esithi: Ngenzeni na? Bonke baphendukela endleleni zabo njengebhiza liseqela ekulweni.

⁷ Ingabuzane phezulu liyasazi isikhathi salo sokuthutha; lejuba lenkonjane lehemu kuyasazi isikhathi sokubuya kwakho; kodwa abantu bami kabazazi izimiso zeNkosi.

⁸ Lingatsho kanjani ukuthi: Sihlakaniphile, lomlayo weNkosi ulathi? Kodwa, khangelani, ukuloba okukhohlisayo kwababhali kuwuphendule umlayo waba ngamanga.

⁹ Abahlakaniphileyo bazayangeka, besabe babanjwe; balilahlile ilizwi leNkosi; pho, balokuhlakanipha bani na?

¹⁰ Ngalokhuke omkabo ngizabanika abanye, lamasimu abo ngiwanike abanqobi, ngoba kusukela kwabancinyane kuze kufike kwabakhulu bonke bayizihwaba zenzuzo embi, labaprofethi labapristi bonke bayakhohlisa.

¹¹ Kabawelaphisisi amanxeba abantu bami, bathi: Konke kulungile. Khona kungalunganga.

¹² Babelenhloni yini lapho besenza amanyala? Atshi, kababanga lanhloni lakanye, kabayangekanga. Ngalokhoke bazakuwa phakathi kwabawayo; ngesikhathi sokubatshaya kwami bazachitheka, kutsho iNkosi.

¹³ Bengithanda ukubabutha, kutsho iNkosi, kodwa kazikho izithelo evinini, lomkhiwa kawukho; ngitsho lamahlamvu abunile, lalokho engibanike khona kusukile kibo.

¹⁴ Silindelani na? Wozani, singene emizini ebiyelweyo, sibhubhele khona. Ngoba iNkosi uNkulunkulu wethu isimisele ukubhubha, isinikile amanzi abulalayo ukuze siwanathe, ngoba sonile eNkosini.

¹⁵ Salindela ukuthula, kodwa kakuvelanga, sahlalela isikhathi sokwelatshwa, kodwa kwavela ukwesaba.

¹⁶ Ukuthimula kwamabhiza ezitha kuyezwakala koDani; ekuzwakaleni komsindo wokukhala kwamabhiza amaduna ilizwe lonke liyathuthumela. Ngoba zifikela ukudla ilizwe, lakho konke okukulo, umuzi labahlala kiwo.

¹⁷ Ngiyathumela phakathi kwenu izinyoka, amabululu angelakulunjwa azakuliluma, kutsho iNkosi.

UJeremiya ukhalela ilizwe lakoJuda

¹⁸ Kangilakududuzeka osizini lwami, inhliziyo yami iyagula phakathi kwami.

¹⁹ Lalelani ukukhala kwabantu bami, kuvela kuyo yonke imikhawulo yelizwe, kuthi: INkosi kayikho eZiyone na? INkosi yalo kayikho phakathi kwalo na? Bangicunuleleni ngezithombe zabo ezibaziweyo, langezithombe zezizwe na?

²⁰ Ukuvuna kudlulile, lehlobo liphelile, kodwa thina kasikhululwanga.

²¹ Ngokulimala kwabantu bami inhliziyo yami ilimele, ngiyakhala, lokudabuka kungehlele.

²² Kakulamuthi eGileyadi na? Kayikho yini inyanga khona? Pho, abantu bami kabasili ngani na?