UJeremiya 7 - iBhayibhili Elingcwele 1978

UJeremiya utshumayela ethempelini

¹ Ilizwi lweNkosi lafika kuJeremiya lathi:

² Mana emnyango wethempeli, utshumayele lapho lelilizwi uthi: Zwanini ilizwi leNkosi, lina lonke bantu bakoJuda, abangena kuliminyango ukukhonza iNkosi.

³ INkosi yamabandla, uNkulunkulu wakoIsrayeli, ithi: Lungisani indlela zenu lezenzo zenu, ng’khona ngizaliyekela ukuba lihlale kulindawo.

⁴ Lingathembi amazwi la akhohlisayo okuthi: Leli lithempeli leNkosi, ithempeli leNkosi, ithempeli leNkosi.

⁵ Ngoba uba lilungisa indlela zenu lezenzo zenu isibili, uba lisenza ukulunga impela phakathi kwenu,

⁶ uba lingacindezeli owezizweni, lentandane, lomfelwakazi, lingachithi igazi elingelacala, lingakhonzi abanye onkulunkulu ukuba lizilimaze ngalokho,

⁷ ngizakuliyekela ukuba lihlale kulindawo, elizweni engalinika okhokho benu kusukela endulo kuze kube nininini.

⁸ Khangelani, lithemba amazwi akhohlisayo angelakusiza.

⁹ Lizakweba, libulale, lifebe, lifunge amanga, litshisele uBali impepha, likhonze abanye onkulunkulu elingabaziyo,

¹⁰ beselisiza ukuba lime phambi kwami kulindlu lapho ibizo lami lidunyiselwa khona, lithi: Sikhululwe! Kodwa liqhubeke ukwenza zonke lezizinengiso.

¹¹ Lindlu, lapho ibizo lami lidunyiselwa khona, isiphenduke yaba lubhalu lwabaphangi emehlweni enu na? Khangelani, mina uqobo sengikubonile lokho, kutsho iNkosi.

¹² Yanini endaweni yami yaseShilo, indawo yokuqala lapho ibizo lami ladunyiselwa khona, libone ukuthi ngenzani kiyo ngenxa yobubi babantu bami bakoIsrayeli.

¹³ Ngakhoke, kutsho iNkosi, ngoba lenzile zonke lezizinto, lingalalelanga lapho ngikhuluma lani njalonjalo, lapho ngilibiza kalingiphendulanga,

¹⁴ ngizakwenza kulindlu lapho ibizo lami lidunyiselwa khona, elithemba kiyo, lakulindawo engayinika okhokho benu kanye lani, lokho engakwenza eShilo.

¹⁵ Ngizalixotsha phambi kwami njengalokho ngaxotsha bonke abafowenu, inzalo yonke yakoEfrayimi.

AbakoJuda badumisa onkulunkulu babezizwe

¹⁶ Wenake, Jeremiya, ungabakhulekeli lababantu, ungaphakamisi ilizwi lakho ukuba ubakhulekele, ungangincengi, ngoba kangiyikukuzwa.

¹⁷ Kawukuboni yini lokho abakwenza emizini yakoJuda lasezindleleni zaseJerusalema na?

¹⁸ Abantwana batheza inkuni, oyise baphembe umlilo, abesifazana baxove inhlama, ukuba benzele iNkosikazi yaphezulu amaqebelengwana, bathululele abanye onkulunkulu iminikelo yokuthululwa, ukuba bangicunule.

¹⁹ Kodwa yimi abangicunulayo na? kutsho iNkosi. Kayisibo yini ukuba baziyangise?

²⁰ Ngakhoke iNkosi uNkulunkulu ithi: Ukuthukuthela kwami lolaka lwami kuzakwehlela kulindawo, phezu kwabantu lenyamazana, laphezu kwezihlahla zeganga lezithelo zomhlabathi. Kuzakutsha, kungacimeki.

AbakoJuda bazatshaywa ngenxa yokuhlamuka kwabo

²¹ INkosi yamabandla, uNkulunkulu kaIsrayeli, ithi: Fakani iminikelo yenu yokutshiswa emihlatshelweni yenu, lidle inyama uba kuyisifiso senu.

²² Kodwa kangibalayanga okhokho benu ngendaba zeminikelo yokutshiswa lemihlatshelo mhla ngibakhupha elizweni laseGibithe.

²³ Kodwa ngabalaya lokhu kuphela ngathi: Lalelani ilizwi lami, ngizakuba nguNkulunkulu wenu, lina libe ngabantu bami, lihambe ngezindlela engililaya zona, ukuze kulilungele.

²⁴ Kodwa kabezwanga, kabalalelanga: bahamba ngamacebo abo langenkani yenhliziyo zabo ezimbi, bahlehlela emuva, kabayanga phambili.

²⁵ Kusukela osukwini okhokho benu abaphuma ngalo eGibithe kuze kube lamuhla, ngithumile kibo zonke inceku zami abaprofethi, ngibathuma insuku ngensuku.

²⁶ Kodwa kabangizwanga, kabalalelanga, baba lenkani; benza okubi kulabokhokho babo.

²⁷ Ngakho uzakhuluma wonke lamazwi kibo, kodwa kabayikukulalela; uzababiza, kodwa kabayikukusabela.

²⁸ Uzakuthi kibo: Yiso lesisizwe esingalalelanga ilizwi leNkosi, uNkulunkulu waso, esingavumanga ukulaywa; leqiniso liphelile, lasuswa emlonyeni waso.

²⁹ Gelani inwele zenu, lizilahle, lina bantu baseJerusalema; lilile emadundulwini angelalutho; ngoba iNkosi isalile yasilahla isizukulwana esivuse ulaka lwayo.

³⁰ Abantu bakoJuda benzile okubi phambi kwami; babekile izinengiso zabo endlini lapho ibizo lami lidunyiselwa khona, ukuba bayingcolise, kutsho iNkosi.

³¹ Bakhile indawo ephakemeyo yokukhonzela eTofethi, esesihotsheni seBeni‐Hinomu, ukuba batshise amadodana lamadodakazi abo ngomlilo, into engingabalayanga yona lengingacabanganga ngayo.

³² Ngalokhoke insuku ziyeza lapho indawo ingasayikubizwa ngokuthi yiTofethi, loba isihotsha seBeni‐Hinomu, kodwa izakuthiwa yisihotsha sokubulala; ngoba abafileyo bazangcwatshwa eTofethi, ngoba ingasekho enye indawo.

³³ Kuthi izidumbu zalababantu zibe yikudla kwenyoni zaphezulu, lenyamazana zeganga, kungekho ozazethusa.

³⁴ Ngizaqeda emizini yakoJuda lezindleleni zaseJerusalema umsindo wokujabula lowokuthokoza, lelizwi lomyeni lelomlobokazi, ngoba ilizwe lizakuchitheka.