UJeremiya 6 - iBhayibhili Elingcwele 1978

Ukubhujiswa kweJerusalema

¹ Balekani ukuze liphephe, lina bantu bakoBenjamini, liphume phakathi kweJerusalema. Khalisani uphondo eTekowa, liphakamise uphawu eBeti‐Hakeremi, ngoba ububi bubonakala ngasenyakatho lokuchitheka okukhulu.

² IZiyone elibukekayo lelihle, kuseduze ukuchitheka kwalo.

³ Abelusi bazafika kulo lemihlambi yabo, bamise amathente abo kulo balihanqe, baluse kube yilowo lalowo endaweni yakhe.

⁴ Hlomelani ukulwa lalo; sukani silihlasele emini. Maye babo! ngoba ilanga selithambeme, lamathunzi okuhlwa aselulekile.

⁵ Sukani, silihlasele ebusuku, sidilize izindlu zalo zamakhosi.

⁶ Ngoba iNkosi yamabandla ithi: Gamulani izihlahla zalo, lakhe imiduli yokuvimbezela iJerusalema. Yiwo lo umuzi ofanele ukutshaywa; yikucindezela kuphela phakathi kwawo.

⁷ Njengomthombo ogobhoza amanzi awo, ngokunjalo ugobhoza ububi bawo; isihluku lokubhubhisa kuzwakala phakathi kwawo; ukugula lamanxeba kuhlala kukhona phambi kwami.

⁸ Xwayiseka, wena Jerusalema, funa ngikutshiye, ngikuchithe ube yindawo elunxiwa.

⁹ INkosi yamabandla ithi: Khanini njengevini okuseleyo koIsrayeli; njengomvuni wevini ngenisa futhi isandla sakho phakathi kwengatsha zalo.

¹⁰ Ngizakhuluma lobani ngimxwayise ukuba bezwe na? Indlebe zabo zivalekile, kabalakulalela; ilizwi leNkosi liyinhlekisa kibo, kalibathokozisi.

¹¹ Ngalokhoke ngigcwele ulaka lweNkosi, sengikhathele yikubekezela. Lwehlisele phezu kwabantwana ezindleleni, lasemihlanganweni yamajaha; ngoba indoda izathathwa lomkayo, abadala kanye lamaxhegu.

¹² Izindlu zabo zizanikwa abanye, amasimu abo kanye labomkabo; ngoba ngizaphakamisela isandla sami kwabakhileyo elizweni, kutsho iNkosi.

¹³ Ngoba kusukela kwabancinyane babo kuze kufike kwabakhulu bonke bayizihwaba zenzuzo embi, labaprofethi labapristi bonke bayakhohlisa.

¹⁴ Kabawelaphisisi amanxeba abantu bami, bathi: Konke kulungile. Khona, kungalunganga.

¹⁵ Babelenhloni yini lapho besenza amanyala? Atshi, kababanga lanhloni lakanye, kabayangekanga. Ngalokhoke bazakuwa phakathi kwabawayo; ngesikhathi sokubatshaya kwami bazachitheka, kutsho iNkosi.

¹⁶ INkosi ithi: Manini emaqamulweni ezindlela libone, libuze ngemikhondo yasendulo ukuthi ingaphi indlela enhle, lihambe ngayo, lizuze ukuthula. Kodwa bathi: Kasiyikuhamba ngayo.

¹⁷ Ngilibekele abalindi, ngathi: Lalelani ilizwi eliyisixwayiso lokukhala kophondo. Kodwa bathi: Kasiyikulalela.

¹⁸ Ngalokhoke, zwanini lina zizwe, lazi lokho okuzabehlela.

¹⁹ Zwana, wena mhlaba; ngehlisela okubi phezu kwalababantu, kuyizithelo zemicabango yabo, ngoba kabalalelanga ilizwi lami, lomlayo wami bawalile.

²⁰ Ngilendaba yini lenhlaka evela eSheba, lemfe evela elizweni elikhatshana na? Iminikelo yenu yokutshiswa kayamukeleki, lemihlatshelo yenu kayingithokozisi.

²¹ Ngalokhoke, iNkosi ithi: Ngizabekela lababantu izikhubekiso ukuba bakhubeke; oyise labantwana bazabhubha omakhelwana kanye lomngane.

²² INkosi ithi: Khangela, abantu bayeza bevela elizweni elisenyakatho, isizwe esikhulu siyavuka endaweni ezikhatshana zomhlaba.

²³ Baphethe imitshoko lemikhonto, balesihluku, kabalasihawu, lomdumo wabo unjengokuduma kolwandle; bagade amabhiza, behleliwe njengabantu abayakulwa, behlelelwe ukulwa lawe, Ziyone.

²⁴ Siyizwile imibiko ngalokho, izandla zethu ziphela amandla, losizi lusibambile, lobuhlungu obunjengobowesifazana ohelelwayo.

²⁵ Lingaphumeli egangeni, lingahambi endleleni, ngoba izitha zihlomile, lokwesaba kukhona inxa zonke.

²⁶ Bantu bami, gqokani izambatho zokulila, libhuquze emlotheni, lenze isililo sibe njengesokulilela indodana eyodwa, lokukhala okubuhlungu. Ngoba umchithi uzakufika kithi masinyane.

²⁷ Wena Jeremiya, ngikubekile ukuba ngumhloli phakathi kwabantu bami, ukuba wazi, uhlole indlela zabo.

²⁸ Bonke baphikelela ukuhlamuka, behamba benyeya; banjengethusi lensimbi, bonke benza okubi.

²⁹ Izimvutho ziyavutha, kodwa emlilweni kuphuma umnuso kuphela; bancibilikisela ize nje, ngoba ababi kabakhutshwa.

³⁰ Kuthiwa bayisiliva esilahliweyo, ngoba iNkosi ibalahlile.