UJeremiya 52 - iBhayibhili Elingcwele 1978

Ukuwa kweJerusalema

¹ UZedekiya wayeleminyaka engamatshumi amabili lanye ekuqaleni kwakhe ukubusa; wabusa iminyaka elitshumi lanye eJerusalema. Ibizo likanina lalinguHamutali, indodakazi kaJeremiya waseLibina.

² Wenza okubi emehlweni eNkosi, njengakho konke okwenziwa nguJehoyakimi.

³ Ngenxa yokuthukuthela kweNkosi, izinto zenzeka eJerusalema lakoJuda yaze yabalahla phambi kwayo. UZedekiya wawuvukela umbuso waseBabiloni.

⁴ Ngomnyaka wesificamunwemunye wokubusa kwakhe, ngosuku lwetshumi lwenyanga yetshumi, uNebukadineza inkosi yaseBabiloni wafika layo yonke impi yakhe ukulwa leJerusalema; balivimbezela, balakhela imiduli yokuvimbezela inxa zonke.

⁵ Umuzi wavinjezelwa kwaze kwaba ngumnyaka wetshumi lanye wokubusa kwenkosi uZedekiya.

⁶ Ngosuku lwesificamunwemunye lwenyanga yesine indlala yaba nkulu phakathi komuzi, kwasweleka ukudla kwabantu elizweni.

⁷ Basebewufohlela umuzi; wonke amadoda empi abaleka, aphuma emzini ebusuku, ngendlela yesango eliphakathi kwemiduli emibili, ngasesangweni lensimu yenkosi, lanxa amaKaladiya ayewuzingelezele umuzi. Ahamba aqonda ngaseAraba.

⁸ Impi yamaKaladiya yaxotshana layo inkosi uZedekiya; yamfica emagcekeni aseJeriko; lempi yakhe yonke yahlakazeka.

⁹ Basebeyibamba inkosi, bayiletha enkosini yaseBabiloni eRibila elizweni laseHamathi, yamgweba khona.

¹⁰ Inkosi yaseBabiloni yabulala amadodana kaZedekiya phambi kwakhe, yazibulala lazo zonke izikhulu zakoJuda eRibila.

¹¹ Yamkhupha amehlo uZedekiya, yambopha ngamaketane, yamusa eBabiloni, yamfaka entolongweni, kwaze kwaba lusuku lokufa kwakhe.

¹² Ngosuku lwetshumi lwenyanga yesihlanu, ngomnyaka wetshumi lesificamunwemunye wokubusa kukaNebukadineza inkosi yaseBabiloni, uNebuzaradani induna yabalindi benkosi, owayengaphansi kwenkosi yaseBabiloni, wangena eJerusalema.

¹³ Walitshisa ithempeli, lesigodlo senkosi, lezindlu zonke ezinkulu zaseJerusalema.

¹⁴ Kwathi yonke impi yamaKaladiya, eyayilenduna yabalindi, yabhidliza yonke imiduli ezingelezele iJerusalema.

¹⁵ UNebuzaradani induna yabalindi wathumba bonke abantu ababesele emzini, lalabo ababehlamukele enkosini yaseBabiloni kanye lezingcitshi zemisebenzi.

¹⁶ Kodwa uNebuzaradani induna yabalindi watshiya abanye abantukazana elizweni ukuba balime izivini lamasimu.

¹⁷ Insika zethusi ezazisethempelini, lezinyawo, lolwandle lwethusi, amaKaladiya akuphahlaza, athatha lonke ithusi, alisa eBabiloni.

¹⁸ Athatha izimbiza, lamafotsholo, lezindlawu, lemiganu yokuchela, lezitsha zempepha, lazo zonke izitsha zethusi ezazisetshenziswa enkonzweni yethempeli,

¹⁹ kanye lemiganywana, lezitsha zokuthwala umlilo, lemiganu yokuchela, lezimbiza, lezinti zezibane, lezinkezo zempepha, lemiganu yomnikelo wokuthululwa. Okwakwenziwe ngegolide induna yabalindi yakuthatha, lalokho okwakwenziwe ngesiliva yakuthatha.

²⁰ Insika zombili, lolwandle olwalulunye nje, lenkabi zethusi ezazilitshumi lambili ezazingaphansi kolwandle kanye lezinyawo inkosi uSolomoni ayekwenzele ithempeli, ithusi lazo zonke lezizinto lalingelakulinganiswa.

²¹ Ubude bensika babuzingalo ezilitshumi lesificaminwembili, ububanzi bayo babuzingalo ezilitshumi lambili, lohlonzi lwayo lwaluyiminwe emine, futhi yayilomholo.

²² Kwakukhona isiduku sethusi, ubude baso sisinye babuzingalo ezinhlanu, lesihlengo lamapomegranati, konke kwenziwe ngethusi, kwakuzingelezele isiduku phezulu. Lensika yesibili yayinjalo ilamapomegranati.

²³ Kwakubonakala amapomegranati angamatshumi ayisificamunwemunye lesithupha; wonke amapomegranati ayephezu kwesihlengo inxa zonke ayelikhulu.

²⁴ Induna yabalindi yathatha uSeraya umpristi omkhulu loZefaniya umpristi omlandelayo, labalindi besango abathathu,

²⁵ yathatha emzini induna eyayiphethe amadoda empi, lamadoda ayisikhombisa awenkundla yenkosi ayefunyaniswe emzini, lomabhalane wenduna eyayiphethe impi eyayibuthela abantu emabuthweni, lamadoda angamatshumi ayisithupha elizwe ayefunyaniswe phakathi komuzi.

²⁶ UNebuzaradani induna yabalindi wabathatha, wabasa enkosini yaseBabiloni eRibila.

²⁷ Inkosi yaseBabiloni yabatshaya, yababulalela eRibila elizweni laseHamathi. Wathunjwa ngokunjalo uJuda elizweni lakhe.

²⁸ Nanti inani labantu abathunjwa nguNebukadineza; ngomnyaka wesikhombisa, abaJuda abazinkulungwane ezintathu, lamatshumi amabili, lantathu;

²⁹ ngomnyaka wetshumi lesificaminwembili wokubusa kukaNebukadineza wathumba eJerusalema abantu abangamakhulu aficaminwembili, lamatshumi amathathu, lambili;

³⁰ ngomnyaka wamatshumi amabili lantathu wokubusa kukaNebukadineza, uNebuzaradani induna yabalindi wathumba abaJuda abangamakhulu ayisikhombisa, lamatshumi amane lanhlanu; bonke abantu sebehlangene baba zinkulungwane ezine, lamakhulu ayisithupha.

³¹ Kwathi ngomnyaka wamatshumi amathathu lesikhombisa wokuthunjwa kukaJehoyakini inkosi yakoJuda, ngosuku lwamatshumi amabili lanhlanu lwenyanga yetshumi lambili, uEvili‐Merodaki inkosi yaseBabiloni, ngomnyaka abekwa ngawo abe yinkosi, waba lomusa kuJehoyakini, wamkhupha entolongweni,

³² wakhuluma laye kuhle, wamnika isihlalo esedlula zonke izihlalo zamakhosi ayelaye eBabiloni.

³³ Ngakhoke uJehoyakini wakhumula izigqoko zokubotshwa; insuku zonke zokuphila kwakhe wadla lenkosi;

³⁴ wayelesabelo esimiyo esensuku zonke, asinikwa yinkosi njengokuswela kwakhe insuku zonke zokuhamba kwakhe, waze wafa.