UJeremiya 5 - iBhayibhili Elingcwele 1978

Izono zeJerusalema

¹ Gijimani, lizulazule ezindleleni zeJerusalema, lizibonele; licinge emagumeni ayo, libone ukuba lingafumana umuntu owenza ukulunga, odinga iqiniso, ukuze ngiyithethelele.

² Loba besithi: Ngifunga iNkosi; kanti bafunga amanga nje.

³ Nkosi, amehlo akho kawathandi ukubona iqiniso na? Wena ubatshayile, kodwa kabezwanga ubuhlungu; ubaqothule, kodwa bala ukulaywa. Benza inhliziyo zabo zaba lukhuni kulelitshe, bala ukuphenduka.

⁴ Ngasengisithi: Laba bangabayanga nje, bayiziphukuphuku; ngoba kabayazi indlela yeNkosi lomlayo kaNkulunkulu wabo.

⁵ Sengizakuya kwabakhulu, ngikhulume labo, ngoba bona bayayazi indlela yeNkosi lomlayo kaNkulunkulu wabo. Kodwa labo babelephulile ijogwe, baqamula izibopho.

⁶ Ngakhoke isilwane sasehlathini sizababulala, babhujiswe yimpisi yasenkangala, lengwe iyicathamele imizi yabo, bonke abaphuma kiyo bazakubanjwa; ngoba iziphambeko zabo zinengi, lokuhlehlela kwabo emuva kwandile.

⁷ Ngingakuthethelela kanjani? Abantwana bakho bangihlamukele, bafunga labo abangesibo onkulunkulu. Ngabanika ukudla okunengi, kodwa bafeba, baya ezindlini zezifebe.

⁸ Babenjengamabhiza anonileyo akhwelayo, omunye lomunye ekhalela umfazi kamakhelwana wakhe.

⁹ Kangiyikubatshaya ngenxa yezinto lezi na? kutsho iNkosi; kangiyikuphindisela esizweni esinje na?

¹⁰ Ngenani emavinini alo liwachithe, kodwa lingawaqedi ngokupheleleyo; susani ingatsha zalo, ngoba kazisizo zeNkosi.

¹¹ Indlu kaIsrayeli lendlu kaJuda zingikhohlisile ngokupheleleyo, kutsho iNkosi.

¹² Bayiphikile iNkosi, bathi: Kayilamsebenzi. Kakuyikusehlela okubi, kasiyikubona impi lendlala.

¹³ Abaprofethi bazakuba ngamaya nje, kabalalo ilizwi leNkosi. Kuzakwenziwa njalo kibo!

¹⁴ Ngakhoke iNkosi, uNkulunkulu wamabandla, ithi: Njengoba batsho njalo, ngizakwenza amazwi ami emlonyeni wakho abe ngumlilo, lalabobantu babe zinkuni, umlilo ubaqede.

¹⁵ Ngizakukulethela isizwe esivela khatshana, wena ndlu kaIsrayeli, kutsho iNkosi. Yisizwe esilamandla, yisizwe esidala, yisizwe ongalwaziyo ulimi lwaso, longayikukuzwa lokho esikukhulumayo.

¹⁶ Abatshoki baso bayesabeka, bonke bangamaqhawe.

¹⁷ Bazakudla amabele akho lokudla kwakho, badle amadodana akho lamadodakazi akho, badle izimvu zakho lenkomo zakho, badle amavini akho lemikhiwa yakho; lemizi yakho ebiyelweyo othembela kiyo, bazayichitha.

¹⁸ Kodwa langalezonsuku kangiyikuliqeda ngokupheleleyo, kutsho iNkosi.

¹⁹ Kuzakuthi lapho abakini besithi: INkosi, uNkulunkulu wethu, yenzeleni zonke lezizinto kithi na? uzakuthi kibo: Njengoba lingihlamukele, lakhonza abanye onkulunkulu elizweni lakini, lizakusebenzela abantu bezizwe elizweni elingesilo elenu.

²⁰ Memezani lokhu endlini kaJakobe, likutshumayele lakoJuda ukuthi:

²¹ Zwanini lokhu, lina bantu abayizithutha labayiziphuphuku, elilamehlo kodwa lingaboni, elilendlebe kodwa lingezwa.

²² Kalingesabi na? kutsho iNkosi. Kalithuthumeli phambi kwami na? Ngabeka itshebetshebe laba ngumkhawulo wolwandle, umkhawulo oqinileyo olungelakuwudlula; lanxa amavinqo etshayana angeweqe, lanxa ehlokoma, kawalakudlula phezu kwalo.

²³ Kodwa lababantu balenhliziyo elukhuni ehlamukayo, baphambukile, bangitshiya.

²⁴ Kabatsho enhliziyweni zabo ukuthi: Asiyesabe iNkosi uNkulunkulu wethu, esinika izulu ngesikhathi salo, ehlobo lasentwasa, isimisele amaviki akhethelwe isivuno.

²⁵ Ububi benu buvimbele konke lokhu, lezono zenu zilivalela okuhle.

²⁶ Ngoba phakathi kwabantu bami kukhona abantu ababi, abacathamayo njengabathiyi becathamele inyoni, bathiya abantu ngemijibila yabo.

²⁷ Njengesitsha sigcwele inyoni, izindlu zabo zigcwele inkohliso; ngalokhuke sebebakhulu banothile,

²⁸ bakhuluphele; kabalamkhawulo ekwenzeni kwabo okubi, kabameli ukulunga lezintandane ukuba ziphumelele, kabavikeli amalungelo abaswelayo.

²⁹ Kangiyikubatshaya ngalezizinto na? kutsho iNkosi. Kangiyikuphindisela esizweni esinje na?

³⁰ Okumangalisayo lokwesabekayo kwenzakele elizweni;

³¹ abaprofethi batshumayela amanga, labapristi babusa ngokululeka kwabaprofethi; abantu bami bayakuthanda lokhu. Kodwa lizakwenza njani ekupheleni na?