UJeremiya 49 - iBhayibhili Elingcwele 1978

Ilizwi ngamaAmoni

¹ Mayelana lamaAmoni. INkosi ithi: UIsrayeli kalamadodana na? Kalayo indlalifa na? Abakhonza uMilkomu bathathelani ilizwe lakoGadi, bahlale emizini yalo na?

² Ngakhoke insuku ziyeza, kutsho iNkosi, lapho ngizakwenza ukuba kuhlatshwe umkhosi wempi ngeRaba elamaAmoni. Lizachitheka, lemizi yalo itshiswe ngomlilo; loIsrayeli alithathe futhi ilizwi lakhe kulabo abamamukayo, kutsho iNkosi.

³ Lila, Heshiboni, ngoba iAyi lichithekile. Khalani, lina besifazana baseRaba. Ligqoke izambatho zokulila, lilile, lizisike ngezingqamu; ngoba uMilkomu uzathunjwa kanye labapristi bakhe lezikhulu zakhe.

⁴ Lizincomelani ngenotho yenu, lina elingathembekanga, elilenotho ephelayo, elithemba amandla enu lisithi: Ngubani ongasihlasela na?

⁵ Khangelani, ngizakwehlisela ukwesaba okukhulu phezu kwenu, kutsho iNkosi, uNkulunkulu wamabandla, kuvela kubo bonke abaseduze lani, lizaxotshwa, kube yilowo lalowo ngendlela yakhe, kungabi khona obutha abaphunyukileyo.

⁶ Kodwa emva kwalokho ngizabuyisa abantu baseAmoni, kutsho iNkosi.

Ilizwi ngeEdoma

⁷ Mayelana leEdoma. INkosi yamabandla ithi: Kakusekho yini ukuhlakanipha eTemani? Amacebo aphelile kwabaqondileyo na? Ukuhlakanipha kwabo kuphelile na?

⁸ Balekani, libuyele emuva, licatshe endaweni eziminyeneyo, lina bahlala eDedani. Ngoba ngizakwehlisela inhlupheko phezu kukaEsawu ngesikhathi sokumtshaya kwami.

⁹ Uba abavuna amavini befika kuwe, kabayikutshiya ingcosana na? Uba amasela efika ebusuku, kawayikuphanga aze azikholise na?

¹⁰ Kodwa uEsawu ngimhlubule waze wasalaze, ngizambule indawo zakhe zokucatsha, kaselakho ukucatsha. Abantwana bakhe babulewe, labazalwane bakhe kanye labomakhelwana bakhe; yena kasekho.

¹¹ Tshiya izintandane zakho, ngizazilondoloza, abafelwakazi bakho kabathembe kimi.

¹² Ngoba iNkosi ithi: Uba labo ababengafanele ukuyinatha inkezo yokwahlulelwa bemele ukuyinatha, wena uzayekelwa ungatshaywa na? Kawuyikuyekelwa, kodwa lawe uzakuyinatha.

¹³ Ngoba ngizifungile mina uqobo, kutsho iNkosi, ukuba iBozira lizakuba yinto eyesabekayo, into yokuhlekwa, lenkangala, lento yokuthukwa, lemizi yalo yonke izahlala iyinkangela kokuphela.

¹⁴ Ngizwile imibiko evela eNkosini, lesithunywa sithunyiwe phakathi kwezizwe, ukuthi: Buthanani, lilihlasele, lisuke liyekulwa.

¹⁵ Ngoba ngizakukwenza ube mncinyane phakathi kwezizwe, udeleleke phakathi kwabantu.

¹⁶ Ukwesabeka kwakho kukukhohlisile, kanye lokuziqhenya kwenhliziyo yakho, wena ohlala ezingoxweni zamawa, lobamba ingqonga yentaba. Loba usakha isidleke sakho endaweni ephakemeyo njengokhozi, ngizakukwehlisa khona, kutsho iNkosi.

¹⁷ IEdoma lizakuba yinto eyesabekayo; wonke umuntu odlula kulo uzakwethuka, ancife ngenxa yakho konke ukuhlupheka kwalo.

¹⁸ Njengasekuchithekeni kweSodoma leGomora, kanye lemizi yakhona, kutsho iNkosi, kakuyikwakha muntu khona, ahlale khona.

¹⁹ Njengesilwane esiphuma ehlathini leJordani sisiya emadlelweni, ngizabajuma, ngibaxotshe basuke kulo, ngilibekele lowo engimkhethileyo. Ngoba ngubani ofanana lami na? Ngubani ozangibiza na? Nguwuphi umalusi ongema phambi kwami na?

²⁰ Ngakho, zwanini icebo iNkosi elenzayo ngeEdoma, lemikhumbulo elayo ngabantu abahlala eTemani ukuthi: Abancinyane bomhlambi bazadonswa basuswe; lendawo yabo imangale ngokuphela kwabo.

²¹ Ngomsindo wokuwa kwabo umhlaba uzathuthumela, lelizwi lokukhala kwabo lizakuzwakala oLwandle oluBomvu.

²² Ukhona ozaqonga njengokhozi, ehle ngesiqubu elulele impiko zakhe ngakuBozira; lenhliziyo zamaqhawe eEdoma ngalolosuku zizakuba njengenhliziyo yowesifazana ohelelwayo.

Ilizwi ngeDamaseko

²³ Mayelana leDamaseko. IHamathi leArpadi kudidekile, ngoba kuzwile indaba ezimbi; kuphelelwa ngamandla kukhathazeke njengolwandle olungelakuthula.

²⁴ IDamaseko selibuthakathaka, liphenduke ukuba libaleke, lifikelwe yibugwala, ukudabuka losizi kulehlele njengowesifazana ohelelwayo.

²⁵ Yeka ukutshiywa komuzi olodumo, umuzi olokuthokoza!

²⁶ Ngakhoke insizwa zawo zizawela emagumeni awo, lawo wonke amabutho awo azabhujiswa ngalolosuku, kutsho iNkosi yamabandla.

²⁷ Ngizaphemba umlilo emdulini waseDamaseko, ozaqothula inqaba zikaBenihadadi.

Ilizwi ngeKedari leHazori

²⁸ Mayelana leKedari lemibuso yaseHazori owayinqobayo uNebukadineza inkosi yaseBabiloni. INkosi ithi: Sukani, liqonde eKedari, libachithe abantu basempumalanga.

²⁹ Thathani amathente abo lemihlambi yabo, kanye lamaveli abo lempahla yabo yonke, lisuse amakamela abo kibo; abantu bazamemeza kibo bathi: Ukwesaba kunxa zonke.

³⁰ Balekani, lizulazule khatshana, lihlale endaweni eziminyeneyo, lina bahlala eHazori, kutsho iNkosi. Ngoba uNebukadineza inkosi yaseBabiloni wenze icebo ngani, kukhona lokho athanda ukukwenza kini.

³¹ Sukani, liqonde kuso isizwe esichelesileyo, esihlala ngokuthula, kutsho iNkosi, esingelamasango lemigoqo, esizihlalele sodwa.

³² Amakamela aso azakuba yimpango, lemihlambi yaso yenkomo izaphangwa. Ngizabachithachitha bonke abagela inwele zabo emaceleni, ngibehlisele inkathazo evela inxa zonke, kutsho iNkosi.

³³ IHazori lizakuba yindawo yamakhanka, libe yinkangala kokuphela, kakuyikwakha muntu khona, ahlale khona.

Ilizwi ngeElamu

³⁴ Ilizwi leNkosi elafika kuJeremiya umprofethi mayelana leElamu ekuqaleni kokubusa kukaZedekiya, inkosi yakoJuda, lathi:

³⁵ INkosi yamabandla ithi: Khangela, ngizakwaphula umtshoko weElamu, obanika amandla amakhulu;

³⁶ ngehlisele phezu kweElamu imimoya emine evela engonsini ezine zaphezulu, ngibahlakazele abaseElamu kuyo yonke leyomimoya; kakuyikuba khona isizwe lesisodwa abangeyikuxotshelwa kuso abaseElamu.

³⁷ Ngizakwenza abaseElamu besabe phambi kwezitha zabo laphambi kwalabo ababazingelayo; ngizabehlisela okubi, lolaka lwami oluvuthayo, kutsho iNkosi, ngibalandelisele ngomkhonto, ngize ngibaqede.

³⁸ Ngizamisa isihlalo sami sobukhosi eElamu, ngichithe inkosi yabo lezikhulu zabo, kutsho iNkosi.

³⁹ Kodwa kuzakuthi ensukwini ezizayo ngibabuyise abantu baseElamu, kutsho iNkosi.