UJeremiya 48 - iBhayibhili Elingcwele 1978

Ilizwi ngeMowabi

¹ Mayelana leMowabi. INkosi yamabandla, uNkulunkulu kaIsrayeli, ithi: Maye ngeNebo! ngoba lichithekile. IKiriyathayimi liyangekile, linqotshiwe; inqaba iyangekile, yadilika;

² udumo lweMowabi kalusekho. EHeshiboni baceba okubi ngalo, bathi: Wozani silichithe, lingabe lisaba yisizwe. Lani elihlala eMadimeni lizachitheka, baxotshane lani ngomkhonto.

³ Zwanini, ilizwi lokukhala livela eHoronayimi lisithi: Ukuchithwa, lokutshabalala okukhulu!

⁴ IMowabi lichithekile; ukukhala kuzwakala kuze kufike eZowari.

⁵ Emadundulwini aseLuhithi bakhwela bekhala, lasekwehleni ukuya eHoronayimi bazwile ukukhala kokuchitheka.

⁶ Balekani, lizisilise, libe njengobabhemi weganga enkangala.

⁷ Ngoba ngenxa yokuba lathemba inqaba zenu lenotho yenu lani lizathunjwa; uKemoshi uzathunjwa kanye labapristi bakhe lezikhulu zakhe.

⁸ Umchithi uzafikela yonke imizi, kawukho lowodwa ozakusala; isihotsha sizachitheka, lamagceke aqothulwe, njengokutsho kweNkosi.

⁹ Bekelani iMowabi ilitshe lengcwaba, ngoba iMowabi lizachitheka masinyane, imizi yalo izakuba ngamanxiwa angelamuntu.

¹⁰ Uthukiwe lowo owenza umsebenzi weNkosi ngokungananzeleli; uthukiwe lalowo ogodla umkhonto wakhe ekuchitheni igazi.

¹¹ IMowabi lichelesile kusukela ebutsheni balo, belihlezi lizinzile; kalithululelwanga embizeni ngembiza, kalithunjwanga; ngakho ukunambitheka kwalo kuhlala kunjalo, iphsnga lalo kaliphenduki.

¹² Ngakhoke insuku ziyeza, kutsho iNkosi, lapho ngizathuma kulo abathambeki abazalithambeka, bathulule imbiza zalo, babulale inqayi zalo.

¹³ Ng’khonake iMowabi lizakuba lenhloni ngoKemoshi, njengalokho indlu kaIsrayeli yaba lenhloni ngeBetheli, ithemba lalo.

¹⁴ Lingatsho kanjani ukuthi: Singamaqhawe lamadoda empi alamandla?

¹⁵ Umchithi weMowabi lemizi yalo usefikile. lezinsizwa zalo ezikhethiweyo sezehlele ekubulaweni, kutsho iNkosi eyiNkosi yamabandla.

¹⁶ Ukuhlupheka kweMowabi kusondele, lokutshaywa kwalo kuyaphangisa.

¹⁷ Likhaleleni, lina lonke elilizingelezeyo, lani lonke elazi ibizo lalo; lithi: Yeka ukwaphuka kwenduku elamandla, udondolo oluhle!

¹⁸ Yehla ebukhosini bakho, uhlale emhlabathini owomileyo, wena ohlala eDiboni. Ngoba umchithi weMowabi usekufikele, wachitha inqaba zakho.

¹⁹ Mana endleleni, ulinde, wena ohlala eAroweri. Ubuze obalekayo lalowo ophunyukileyo uthi: Kwenze njani na?

²⁰ IMowabi liyangekile, ngoba lichithekile; lilani likhale; libike ngaseArinoni ukuba iMowabi lichithekile.

²¹ Ukwahlulela kwehlele phezu kwelizwe elilamagceke, eHoloni leJahazi leMefahathi,

²² leDiboni leNebo leBeti‐Dibilathayimi,

²³ leKiriyathayimi, leBeti‐Gamuli, leBeti‐Meyoni,

²⁴ leKeriyothi leBozira, lakuyo yonke imizi yelizwe laseMowabi, eduze lakhatshana.

²⁵ Uphondo lweMowabi luqunyiwe, lengalo yalo yephukile, kutsho iNkosi.

²⁶ Mdakiseni, ngoba ezikhukhumezile eNkosini; iMowabi lizazibhixa emahlanzweni alo, libe yinhlekisa.

²⁷ UIsrayeli kabanga yinhlekisa kuwe na? Wafunyanwa phakathi kwamasela yini ukuba lapho ukhuluma ngaye, unikine ikhanda lakho na?

²⁸ Tshiyani imizi, lihlale phakathi kwamadwala, lina elihlala eMowabi. Libe njengejuba elakha isidleke salo emaweni.

²⁹ Sizwile ngokuzigqaja kweMowabi; liyazigqaja kakhulu. Sizwile ngokuziphakamisa kwalo, lokuziqakisa kwalo, langokuzikhukhumeza kwalo.

³⁰ Ngiyakwazi ukudelela kwalo, kutsho iNkosi; ukuzincoma kwalo kuyinkohliso, lezenzo zalo ziyinkohliso.

³¹ Ngalokhoke ngiyalila ngeMowabi, ngikhale ngabo bonke abaseMowabi, ngililele abantu baseKiri‐Heresi.

³² Ngiyakukhalela wena vini laseSibima ukudlula iJazeri. Ingatsha zakho zedlula phezu kolwandle, zaze zafinyelela eJazeri. Umchithi wehlele phezu kwezithelo zakho zasehlobo lasemavinini akho avuniweyo.

³³ Ukuthaba lokuthokoza kususiwe elizweni laseMowabi elilenala enengi; ngiqedile iwayini ezikhamelweni; kakho osakhama izithelo zevini ngokuthokoza, lomsindo wokuthokoza kawusekho.

³⁴ Ukukhala kweHeshiboni leEleyale kuzwakala kuze kube seJahazi. Ukukhala okukhulu kuzwakala eZowari kuze kufike eJoronayimi leEgilathi‐Shelishiya; ngoba amanzi aseNimrimi lawo asesitsha.

³⁵ Ngizaqeda eMowabi lowo onikela umhlatshelo endaweni ephakemeyo yokukhonzela, atshisele unkulunkulu wakhe impepha, kutsho iNkosi.

³⁶ Ngakhoke inhliziyo yami ikhalela iMowabi njengomhubhe, inhliziyo yami iyakhala njengomhubhe ngabantu baseKiri‐Heresi; inotho ababeyizuzile ichithekile.

³⁷ Ngoba wonke amakhanda aphuciwe, lazo zonke indevu zigeliwe; izandla zonke zilamanxeba, bonke bavunule izambatho zokulila.

³⁸ Phezu kwazo zonke izindlu zamaMowabi kanye lasemagumeni akhona yikukhala kuphela; ngoba ngilibulele iMowabi njengembiza engananzwa muntu, kutsho iNkosi.

³⁹ Yeka ukufa kwayo! Yeka ukukhala kwayo! Yeka ukufulathela kweMowabi lilenhloni! Ngakho iMowabi liphenduke laba yinhlekisa, lento eyesabekayo kibo bonke abaseduze lalo.

⁴⁰ Ngoba iNkosi ithi: Ukhona ozaphapha njengokhozi, elulele impiko zakhe eMowabi.

⁴¹ Imizi izathunjwa, lezinqaba zithathwe, kuthi inhliziyo zamaqhawe aseMowabi ngalolosuku zibe njengenhliziyo yowesifazana ohelelwayo.

⁴² IMowabi lizachithwa, lingabe lisaba yisizwe, ngoba lazikhukhumeza eNkosini.

⁴³ Ukwesabe lomgodi lomjibila kuphambi kwenu, lina elihlala eMowabi, kutsho iNkosi.

⁴⁴ Obalekela ukwesaba uzawela emgodini, lophuma emgodini uzabanjwa ngumjibila. Ngoba lezizinto ngizazehlisela eMowabi ngomnyaka wokutshaywa kwabo, kutsho iNkosi.

⁴⁵ Emthunzini waseHeshiboni ababalekayo bayema bephelelwe ngamandla, ngoba umlilo uphumile eHeshiboni, lelangabi liphumile endlini kaSihoni, umlilo utshisile imikhawulo yaseMowabi, lezingqonga zabantu besiphithiphithi.

⁴⁶ Maye kuwe, wena Mowabi! Abantu bakaKemoshi baphelile, ngoba amadodana akho athunjiwe, lamadodakazi akho asiwe ekuthunjweni.

⁴⁷ Kodwa ngizabuyisa abantu baseMowabi ensukwini ezizayo, kutsho iNkosi. Kuphela lapha ukwahlulelwa kweMowabi.