UJeremiya 44 - iBhayibhili Elingcwele 1978

UJeremiya utshumayeza abaJuda eGibithe

¹ Ilizwi elafika kuJeremiya ngabo bonke abaJuda ababehlala elizweni laseGibithe eMigidoli laseTahafanesi, laseMemfisi, laselizweni lasePatrosi,

² lathi: INkosi yamabandla, uNkulunkulu kaIsrayeli, ithi: Likubonile konke okubi engakwehlisela phezu kweJerusalema laphezu kwayo yonke imizi yakoJuda. Lamhla iyinkangala, kakulamuntu ohlala khona,

³ ngenxa yobubi babo ababenzayo, bangivusa ulaka ngoba batshisa impepha, bakhonza abanye onkulunkulu abangabaziyo bona kanye lani labokhokho benu.

⁴ Kanti ngathuma inceku zami zonke abaprofethi, ngazithuma njalonjalo, ngisithi: Lingayenzi linto enengisayo lengiyizondayo.

⁵ Kodwa kabalalelanga kabezwanga, ukuba baphenduke ebubini babo, bangatshiseli abanye onkulunkulu impepha.

⁶ Ngakho ulaka lwami lokuthukuthela kwami kwavutha emizini yonke yakoJuda lasezindleleni zeJerusalema; zaphenduka zaba yinkangala, zachitheka njengalamhla nje.

⁷ Ngakhoke iNkosi, uNkulunkulu wamabandla, uNkulunkulu kaIsrayeli, ithi: Likwenzelani phezu kwenu lokhu okubi kangaka, ukuba libhubhise indoda lomfazi, usane lomntwana, baphele koJuda, kungasali muntu na?

⁸ Kungani lingithukuthelisa ngezithombe zenu, litshisela abanye onkulunkulu impepha eGibithe lapho selihlala khona, ukuze libhujiswe, liphenduke into yokuthukwa leyokuhlekwa phakathi kwazo zonke izizwe zasemhlabeni na?

⁹ Selakhohlwa yini ububi babokhokho benu, lobubi bamakhosi akoJuda, lobubi babomkabo, lobenu ububi, lobubi babomkenu, elabenza elizweni lakoJuda lasezindleleni zeJerusalema na?

¹⁰ Kalizithobanga kuze kube lamhla, futhi kalesabanga, kalihambanga ngomlayo wami langezimiso zami engazibeka phambi kwenu laphambi kwabokhokho benu.

¹¹ Ngakhoke iNkosi yamabandla, uNkulunkulu kaIsrayeli, ithi: Ngizalenzela okubi ukuba ngiliqede elizweni lonke lakoJuda.

¹² Ngizathatha abaseleyo koJuda abafise ukuzahlala eGibithe, bazabhubha bonke, babulawe yimpi layindlala elizweni laseGibithe, baphele bonke abancinyane labakhulu, babe yinto eyenyanyekayo, into eyesabekayo, leyokuthukwa, leyokuhlekwa.

¹³ Ngizatshaya labo abahlezi eGibithe, njengoba ngatshaya iJerusalema, ngempi langendlala langomkhuhlane,

¹⁴ ukuze kungabi khona loyedwa kwabaseleyo koJuda, abafikileyo ukuhlala eGibithe, ozaphunyuka asile, abuyele elizweni lakoJuda abafisa ukubuyela kulo, bahlale khona; ngoba kabayikubuyela kuphela abaphunyukileyo.

¹⁵ Wonke amadoda ayesazi ukuthi omkabo batshisela abanye onkulunkulu impepha, labo bonke abesifazana ababekhona belixuku elikhulu, labo bonke abantu ababehlala ePatrosi elizweni laseGibithe, bamphendula uJeremiya bathi:

¹⁶ Ilizwi olikhulume kithi ebizweni leNkosi kasiyikulilalela.

¹⁷ Kodwa sizakwenza konke esizimisele ukukwenza; sizatshisela iNkosikazi yaphezulu impepha, siyithululele iminikelo yokuthululwa, njengokuba besisenza thina, labobaba, lamakhosi ethu, lezikhulu zethu, emizini yakoJuda lasezindleleni zeJerusalema; ngoba sasilokudla okunengi, sihlezi kuhle singaboni okubi.

¹⁸ Kodwa lokhu sayekela ukutshisela iNkosikazi yaphezulu impepha lokuyithululela iminikelo yokuthululwa, siswele konke, siqedwe yimpi layindlala.

¹⁹ Abesifazana bona bathi: Lapho sasitshisela iNkosikazi yaphezulu impepha, siyithululela iminikelo yokuthululwa, kumbe siyenzela izinkwa ezilomfanekiso wayo, siyithululela iminikelo yokuthululwa, sakwenza lokho ngaphandle kwemvumo yabomkethu na?

²⁰ UJeremiya wasesithi kubo bonke abantu, amadoda labesifazana, bonke ababemphendule ngalowomazwi:

²¹ Impepha elayitshisa emizini yakoJuda lasezindleleni zeJerusalema, lina laboyihlo, lamakhosi enu, lezikhulu zenu, labantu belizwe, iNkosi kayikukhumbulanga na? Kakungenanga engqondweni yayo na?

²² INkosi yayingaselakukuthwala okubi kwemisebenzi yenu lezinengiso elazenzayo; ngakhoke ilizwe lenu lachitheka, laba yinkangala, laba yinto yokuthukwa, kakusekho okuhlala khona njengoba kunjalo lamhla.

²³ Kungenxa yokuba litshisile impepha, lona eNkosini, lingalilalelanga ilizwi layo, lingahambanga ngomlayo wayo langezimiso zayo langemithetho yayo, ngalokho okubi lokhu kwehlele phezu kwenu njengalamhla nje.

²⁴ UJeremiya wathi kubo bonke abantu lakwabesifazana bonke: Zwanini ilizwi leNkosi, lina lonke bakoJuda eliselizweni laseGibithe.

²⁵ INkosi yamabandla, uNkulunkulu kaIsrayeli, ithi: Lina labomkenu likukhulumile ngemilomo yenu, lakugcwalisa ngezandla zenu, lathi: Sizagcwalisa impela izifungo zethu esizenzileyo zokuba sitshisele iNkosikazi yaphezulu impepha, siyithululele iminikelo yokuthululwa. Ngakho qinisani izifungo zenu, lizenze!

²⁶ Kodwa zwanini ilizwi leNkosi, lina lonke bakoJuda elihlala eGibithe: Khangelani, ngifungile ibizo lami elikhulu, kutsho iNkosi, ukuba ibizo lami kalisayikubizwa futhi ngumlomo womuntu koJuda, kulo lonke ilizwe laseGibithe, ngokuthi: Ngifunga iNkosi uNkulunkulu.

²⁷ Ngilindele ukubenza okubi, kungesikho okuhle; bonke abakoJuda abaseGibithe bazaqedwa yimpi layindlala, baze baphele bonke.

²⁸ Labo abaphepha empini bazabuyela elizweni lakoJuda bevela eGibithe, beyingcosana nje; labo bonke abaseleyo koJuda abeze eGibithe ukuhlala khona, bazakwazi ukuba ilizwi elizakuma ngelikabani, elami kumbe elabo.

²⁹ Lokhu kuzakuba yisibonakaliso kini, kutsho iNkosi, ukuthi ngizalitshaya kulindawo, ukuze lazi ukuthi amazwi ami engiwakhuluma ngani azakuma impela.

³⁰ INkosi ithi: Khangelani, ngizanikela uFaro Hofra inkosi yaseGibithe ezandleni zezitha zakhe, lasezandleni zalabo abamzingelayo, njengoba nganikela uZedekiya inkosi yakoJuda esandleni sikaNebukadineza inkosi yaseBabiloni, owayeyisitha sakhe emzingela.