UJeremiya 43 - iBhayibhili Elingcwele 1978

Abantu baya eGibithe

¹ Kwathi lapho uJeremiya eseqedile ukukhuluma ebantwini wonke lamazwi eNkosi uNkulunkulu wabo eyayimthume wona kibo,

² uAzariya indodana kaHoshaya, loJohanani indodana kaKareya, labo bonke abantu abazikhukhumezayo, bathi kuJeremiya: Uqamba amanga. INkosi uNkulunkulu wethu kayikuthumanga ukuba uthi kithi: Lingayi eGibithe ukuba lihlale khona;

³ kodwa uBaruki indodana kaNeriya uyakuxabanisa lathi ukuba asinikele kumaKaladiya ukuze asibulale, kumbe asithumbe asise eBabiloni.

⁴ Ngakho uJohanani indodana kaKareya, lazo zonke induna zempi, labo bonke abantu kabalilalelanga ilizwi leNkosi ukuba bahlale elizweni lakoJuda.

⁵ UJohanani indodana kaKareya lazo zonke induna zempi bathatha bonke abaseleyo bakoJuda ababebuyele ukuhlala elizweni lakoJuda bevela kuzo zonke izizwe ababexotshelwe kuzo, baya labo eGibithe,

⁶ amadoda, labafazi, labantwana, amadodakazi enkosi, bonke abantu uNebuzaradani induna yabalindi ayebatshiye kuGedaliya indodana kaAhikamu, indodana kaShafani; bathatha loJeremiya umprofethi loBaruki indodana kaNeriya.

⁷ Bayafika eGibithe, ngoba kabalilalelanga ilizwi leNkosi; bafikela eTahafanesi.

⁸ Laselifika ilizwi leNkosi kuJeremiya eseTahafanesi,

⁹ lathi: Thatha amatshe amakhulu, uwabhade endaweni egandelweyo ngasesangweni lesigodlo sikaFaro eTahafanesi, phambi kwabantu bakoJuda,

¹⁰ uthi kibo: INkosi yamabandla, uNkulunkulu kaIsrayeli, ithi: Ngizabiza uNebukadineza inkosi yaseBabiloni inceku yami; uzamisa isihlalo sakhe sobukhosi phezu kwalamatshe engiwabekileyo, amise ithente lakhe phezu kwawo.

¹¹ Uzafika, ahlasele ilizwe laseGibithe, labo abamiselwe umkhuhlane abanikele emkhuhlaneni, abamiselwe ukuthunjwa abanikele ekuthunjweni, labamiselwe umkhonto abanikele emkhontweni;

¹² aphembe umlilo emathempelini abonkulunkulu baseGibithe, abatshise, abathumbe, alicuthe ilizwe laseGibithe njengomalusi ecutha isigqoko sakhe esigcwele izibungu, asuke khona esenqobile.

¹³ Uzakwaphula insika zokukhonzela zaseHeliyopolisi elizweni laseGibithe, atshise ngomlilo amathempeli abonkulunkulu baseGibithe.