UJeremiya 4 - iBhayibhili Elingcwele 1978

¹ Uba uphenduka, wena Israyeli, kutsho iNkosi, phendukela kimi. Uba ususa phambi kwami izinengiso zakho, ungasuki kimi,

² futhi uba ufunga ngeqiniso langokulunga langokuqonda uthi: Ngifunga iNkosi; izizwe zizabusiswa kuyo, zizibonge ngayo.

³ Ngoba iNkosi ithi ebantwini bakoJuda labaseJerusalema: Qhathani ingqatho yenu, lingahlanyeli phakathi kwameva.

⁴ Zisokeleni eNkosini, ukusoka kwenu kube ngokwenhliziyo, lina bantu bakoJuda labaseJerusalema, funa ulaka lwami luphembeke njengomlilo, luthungele, kungabi khona ongalucitsha, ngenxa yezenzo zenu ezimbi.

Ilizwe lakoJuda lizakuhlaselwa

⁵ Khulumani koJuda, limemeze eJerusalema lithi: Khalisani uphondo elizweni, limemeze kakhulu lithi: Buthanani, singene emizini ebiyelweyo.

⁶ Misani uphawu olukhomba iZiyone, libaleke lingemi, ngoba ngiletha okubi okuvela ngasenyakatho, lokuchitheka okukhulu.

⁷ Isilwane siphumile ehlathini laso, umchithi wezizwe uyeza, uphumile endaweni yakhe ukuba achithe ilizwe lakho; lemizi yakho izakuba ngamanxiwa, kungabi khona umuntu kuyo,

⁸ Ngenxa yalokho yambatha izambatho zokulila, ukhale ulile; ngoba ulaka lweNkosi olwesabekayo kaluhlehlanga kithi.

⁹ Kuzakuthi ngalolosuku, kutsho iNkosi, amakhosi aphelelwe yisibindi kanye lezikhulu; abapristi bazamangala, labaprofethi bethuke.

¹⁰ Ngasengisithi: Hawu, Nkosi Nkulunkulu! ubakhohlisile impela lababantu kanye leJerusalema ngokuthi: Lizakuba lokuthula; kanti impi isiphezu kwabo.

¹¹ Ngalesosikhathi kuzakuthiwa kulabobantu lakulo iJerusalema: Umoya otshisayo ovela enkangala emadundulwini angelalutho, uyavunguza phezu kwabantu bami, ungesiwo wokwela lokuhlungula,

¹² kodwa umoya olamandla, uyeza uthunywe yimi. Mina uqobo ngizakubagweba.

¹³ Khangela, umufo uyeza njengamayezi, inqola zakhe zokulwa zinjengesivunguzane, lamabhiza akhe alejubane kulokhozi. Maye babo, ngoba sichithekile!

¹⁴ Wena Jerusalema, hlambulula inhliziyo yakho kuphume ububi, ukuze uphephe. Koze kube nini imicabango yakho emibi ihlala phakathi kwakho na?

¹⁵ Ngoba ilizwi liyamemeza lisuka koDani, libika okubi kuvela ezintabeni zakoEfrayimi.

¹⁶ Xwayisani izizwe ukuthi uyeza, bikani kulo iJerusalema lithi: Kufika abavimbezeli bevela elizweni elikhatshana; bayamemeza kuyo imizi yakoJuda.

¹⁷ Njengabalindi bensimu balihanqa inxa zonke, ngoba lingihlamukele, kutsho iNkosi.

¹⁸ Ukuhamba kwakho lezenzo zakho kukulethele lokho. Lokhu kuyikuphela kwakho, kubuhlungu, sekufinyelele enhliziyweni yakho uqobo.

¹⁹ Ngilobuhlungu obukhulu, ngiyazitshila ngenxa yobuhlungu. Maye inhliziyo yami! Inhliziyo yami iyatshaya, kangilakuthula; ngoba ngizwile ukukhala kophondo, lomkhosi wempi.

²⁰ Ukuchitheka kulandela ukuchitheka, ilizwe lonke lichithekile. Amathente ethu adilikile masinyane, lamaveli awo ngesibangana nje.

²¹ Koze kube nini ngibona uphawu lwempi, ngizwe ukukhala kophondo?

²² Abantu bami bayizithutha, kabangazi; bangabantwana abayiziphukuphuku, kabalakuqedisisa. Bahlakaniphele ukwenza okubi, kodwa ukwenza okuhle kabakwazi.

²³ Ngakhangela umhlaba, wawuze ungelalutho, lephezulu lalingelakukhanya.

²⁴ Ngakhangela izintaba, zazinyikinyeka, lamaqaqa wonke ayenyakazela.

²⁵ Ngakhangela, ngabona ukuthi kakulamuntu, lenyoni zonke zaphezulu zasezibalekile.

²⁶ Ngakhangela, ngabona ukuthi ilizwe elivundileyo liyinkangala, lemizi yalo yonke yayidiliziwe phambi kweNkosi, laphambi kolaka lwayo oluvuthayo.

²⁷ Ngoba iNkosi ithe: Ilizwe lonke lizachitheka, kodwa kangizukuliqeda ngokupheleleyo.

²⁸ Ngenxa yalokho umhlaba uzalila, lephezulu libe mnyama; ngoba sengikukhulumile engikuqondileyo; kangiyikuzisola, ngibuyele emuva.

²⁹ Imizi yonke iyabaleka ngenxa yomsindo wabagadi bamabhiza labaphathi bemitshoko; bangena ezixukwini bakhwele emadwaleni, imizi yonke isele ize, kakho ohlala kiyo.

³⁰ Wenake, uzakwenzani na? Loba ugqoka okubomvu, ufaka izigqizo zegolide, ugcoba amehlo akho ngomuthi, uzicecisela ize, ngoba izithandwa zakho ziyakudelela, zifuna ukukubulala.

³¹ Ngoba ngizwile ilizwi kungathi ngelowesifazana ohelelwayo, ukukhala okubuhlungu okunjengokozibulayo; yikukhala kweZiyone elikhefuzelayo, liselula izandla zalo lisithi: Maye mina! ngiphelelwa ngamandla ngoba nampa ababulali bayeza.