UJeremiya 39 - iBhayibhili Elingcwele 1978

Ukunqotshwa kweJerusalema

¹ Ngomnyaka wesificamunwemunye wokubusa kukaZedekiya inkosi yakoJuda, ngenyanga yetshumi, uNebukadineza inkosi yaseBabiloni lempi yakhe yonke bafika balivimbezela iJerusalema.

² Ngomnyaka wetshumi lanye wokubusa kukaZedekiya, ngosuku lwesificamunwemunye lwenyanga yesine, umuzi wafohlelwa.

³ Kwathi iJerusalema selithunjiwe, zonke izikhulu zenkosi yaseBabiloni zeza zahlala esangweni eliphakathi, uNerigali‐Sharezi, loSamiganebo, loSarisekimi induna yabathenwa, loNerigali‐Sharezi induna yamabutho, lazo zonke ezinye induna zenkosi yaseBabiloni.

⁴ Kwathi lapho uZedekiya inkosi lawo wonke amabutho bebabona, babaleka, baphuma emzini ebusuku ngendlela yensimu yenkosi, ngesango eliphakathi kwemiduli emibili, baqonda eAraba.

⁵ Kodwa impi yamaKaladiya yaxotshana labo, yamfica uZedekiya emagcekeni aseJeriko. Isimbambile yamletha kuNebukadineza inkosi yaseBabiloni eRibila, elizweni laseHamathi, wamgweba khona.

⁶ Inkosi yaseBabiloni yawabulala amadodana kaZedekiya phambi kwakhe eRibila, yabulala zonke izikhulu zakoJuda.

⁷ Yamkhupha amehlo uZedekiya, yambopha ngamaketane ukuba imuse eBabiloni.

⁸ AmaKaladiya atshisa indlu yenkosi lezindlu zabantu, adilizela phansi imiduli yaseJerusalema.

⁹ UNebuzaradani induna yabalindi yabathumba bonke abantu ababesele emzini, yabasa eBabiloni, labo ababebalekele kuye.

¹⁰ UNebuzaradani induna yabalindi watshiya elizweni lakoJuda abantukazana ababengelalutho, ukuba balime izivini lamasimu ngalesosikhathi.

¹¹ UNebukadineza inkosi yaseBabiloni walaya uNebuzaradani induna yabalindi ngoJeremiya wathi:

¹² Mthathe, umlondoloze kuhle, ungamenzeli okubi, kodwa wenze lokho akutshela khona.

¹³ Ngakho uNebuzaradani induna yabalindi loNebushazibani induna yabathenwa, loNerigali‐Sharezi induna yamabutho, lazo zonke induna zenkosi yaseBabiloni,

¹⁴ bamsusa uJeremiya egumeni labalindi, bamnikela kuGedaliya indodana kaAhikamu, indodana kaShafani, ukuba amuse ekhaya. Wasehlala phakathi kwabantu.

UEbedimeleki uzakhululwa yiNkosi

¹⁵ Ilizwi leNkosi lafika kuJeremiya esavalelwe egumeni labalindi, lathi:

¹⁶ Hamba uyekuthi kuEbedimeleki umEtiyopiya: INkosi yamabandla, uNkulunkulu kaIsrayeli, ithi: Ngizagcwalisa amazwi ami ngalumuzi ngokubi kungesikho ngokuhle, azagcwaliseka phambi kwakho ngalolosuku.

¹⁷ Kodwa wena ngizakukukhulula ngalolosuku, kutsho iNkosi, kawuyikunikelwa ezandleni zabantu obesabayo;

¹⁸ ngoba ngizakukhulula impela, kawuyikubulawa, kodwa uzaphunyuka, ngoba ungithembile, kutsho iNkosi.