UJeremiya 32 - iBhayibhili Elingcwele 1978

UJeremiya uthenga insimu

¹ Ilizwi leNkosi lafika kuJeremiya emnyakeni wetshumi wokubusa kukaZedekiya, inkosi yakoJuda, ongumnyaka wetshumi lesificaminwembili kaNebukadineza.

² Ngalesosikhathi impi yenkosi yaseBabiloni yalivimbezela iJerusalema; uJeremiya umprofethi wayevalelwe egumeni labalindi, elalisesigodlweni senkosi yakoJuda.

³ Ngoba uZedekiya inkosi yakoJuda wayemvalele khona esithi: Kungani utshumayela usithi: INkosi ithi: Lumuzi ngiwunikela esandleni senkosi yaseBabiloni, izakuwuthumba;

⁴ loZedekiya inkosi yakoJuda kayiyikuphunyuka esandleni samaKaladiya, kodwa uzanikelwa impela esandleni senkosi yaseBabiloni, akhulume layo bekhangelene;

⁵ izakumthatha uZedekiya, imuse eBabiloni, ahlale khona ngize ngimhambele mina, kutsho iNkosi; lanxa usilwa lamaKaladiya, kawuyikuphumelela?

⁶ UJeremiya wathi: Ilizwi leNkosi lafika kimi lisithi:

⁷ Khangela, uHanameli indodana kaShaluma uyihlo omncinyane, uzakufika kuwe athi: Thenga insimu yami eseAnathothi, ngoba nguwe oyisihlobo sokuqala olelungelo lokuyithenga.

⁸ Wasefika kimi uHanameli umfowethu egumeni labalindi, njengokutsho kweNkosi, wathi kimi: Thenga insimu yami eseAnathothi elizweni lakoBenjamini, ngoba nguwe oyisihlobo sokuqala olelungelo lokuyithenga; zithengele yona. Ngasengisazi ukuba lelilizwi livela eNkosini.

⁹ Ngayithenga insimu eseAnathothi kuHanameli umfowethu, ngamnika imali engamashekeli alitshumi lesikhombisa esiliva.

¹⁰ Ngaloba incwadi, ngayinamathisela, ngadinga labofakazi, ngayilinganisa imali ngezikali.

¹¹ Ngasengithatha incwadi yokuthenga enanyekiweyo elemithetho lezimiso, lenye incwadi evulekileyo,

¹² nganikela incwadi yokuthenga kuBaruki indodana kaNeriya, indodana kaMahaseya, phambi kukaHanameli umfowethu, laphambi kwabofakazi abaloba amabizo abo encwadini yokuthenga, laphambi kwabo bonke abaJuda ababehlezi egumeni labalindi.

¹³ Ngamlaya uBaruki phambi kwabo ngathi:

¹⁴ INkosi yamabandla, uNkulunkulu kaIsrayeli, ithi: Thatha lezizincwadi, incwadi yokuthenga enanyekiweyo lencwadi evulekileyo, uzifake embizeni yebumba ukuba zihlale isikhathi eside.

¹⁵ Ngoba iNkosi yamabandla, uNkulunkulu kaIsrayeli, ithi: Izindlu lamasimu lezivini kuzakubuya kuthengwe futhi kulelilizwe.

¹⁶ Sengimnikile uBaruki indodana kaNeriya incwadi yokuthenga, ngakhuleka eNkosini ngathi:

¹⁷ E Nkosi Nkulunkulu! Kunguwe owenze izulu lomhlaba ngamandla akho amakhulu langengalo yakho elamandla. Kakukho okungakwahlula wena

¹⁸ otshengisa uthando olungapheliyo kwabayizinkulungwane, kodwa uphindisela ububi baboyise kubantwana babo ngemva kwabo. Wena Nkulunkulu omkhulu lolamandla, oyiNkosi yamabandla,

¹⁹ omkhulu ngokucabanga, lolamandla ekwenzeni, omehlo akho abona zonke indlela zabantu ukuba unike wonke umuntu umvuzo wendlela zakhe, lezenzo zakhe,

²⁰ owaveza izibonakaliso lezimangaliso eGibithe, lakhathesi uyazenza koIsrayeli laphakathi kwabo bonke abantu; wazenzela ibizo ukuba ubizwe ngalo lalamhla.

²¹ Wabakhupha abantu bakho uIsrayeli eGibithe ngezibonakaliso langezimangaliso, langesandla esilamandla, langengalo elamandla, langokwesabeka okukhulu;

²² wabanika lelilizwe, owafunga kubokhokho babo ukubanika lona, ilizwe eligcwele uchago lenyosi;

²³ bangena bahlala kilo, kodwa kabalilalelanga ilizwi lakho, kabahambanga ngomlayo wakho, kabakwenzanga lokho owabatshela khona. Ngakhoke ubehlisele bonke lobububi.

²⁴ Amadundulu okuvimbezela umuzi asekhona ukuba umuzi uthathwe, langenxa yempi lendlala lomkhuhlane umuzi unikelwe ezandleni zamaKaladiya awuhlaselayo. Lokho owakutshoyo kwenzakele njengoba ubona.

²⁵ Kanti, wena Nkosi Nkulunkulu, utshilo kimi ukuthi: Thenga insimu ngemali, udinge labofakazi; lanxa umuzi unikelwa ezandleni zamaKaladiya.

²⁶ Ilizwi leNkosi lafika kuJeremiya lathi:

²⁷ Mina ngiyiNkosi, uNkulunkulu wakho konke; kambe kukhona okungahlulayo na?

²⁸ Ngakho ngiyawunikela lumuzi ezandleni zamaKaladiya lezandleni zikaNebukadineza inkosi yaseBabiloni ozakuwunqoba.

²⁹ AmaKaladiya ahlasela lumuzi azafika, awuthungele ngomlilo, awutshise kanye lezindlu obekunikelelwa phezu kwazo impepha kuBali, lobekuthululelwa phezu kwazo iminikelo yokuthululwa kwabanye onkulunkulu ukungicunula.

³⁰ Ngoba amadodana akoIsrayeli lamadodana akoJuda enzile okubi kuphela phambi kwami, kusukela ebutsheni bawo; yebo, amadodana akoIsrayeli angicunule kuphela ngezenzo zabo, kutsho iNkosi.

³¹ Lumuzi uvuse ukuthukuthela kwami lolaka, kusukela mhla wakhiwayo kuze kube lamuhla, ukuze ngiwususe kimi,

³² ngenxa yabo bonke ububi amadodana akoIsrayeli lawakoJuda abenza ukungithukuthelisa, ngitsho amakhosi abo lezikhulu zabo, abapristi babo labaprofethi babo, abantu bakoJuda labakhileyo eJerusalema.

³³ Bangifulathela, kabakhangelanga kimi; lanxa ngibafundise njalonjalo, kabalalelanga ukufundisa kwami.

³⁴ Bamisa izinengiso zabo endlini lapho ibizo lami lidunyiselwa khona, ukuba bayingcolise.

³⁵ Bakha indawo eziphakemeyo zikaBali esihotsheni seBeni‐Hinomu, ukuba banikele amadodana lamadodakazi awo kuNkulunkulu uMoloki, into engingabalayanga yona lengafikanga engqondweni yami, ukuba benze uJuda one.

³⁶ Ngakhoke iNkosi, uNkulunkulu kaIsrayeli, ithi mayelana lomuzi lo othi ngawo: Unikelwe esandleni senkosi yaseBabiloni ngempi langendlala langomkhuhlane:

³⁷ Khangela, ngizabaqoqa emazweni wonke lapho ngibaxotshele khona ekuthukutheleni kwami langokufutheka kwami langolaka olukhulu; ngizababuyisa kulindawo, ngibenze ukuba bahlale bevikelekile.

³⁸ Bazakuba ngabantu bami, lami ngibe nguNkulunkulu wabo.

³⁹ Ngizabanika inhliziyonye lendlelanye, ukuba bangesabe zonke insuku, kube kuhle kubo lakubantwana babo emva kwabo.

⁴⁰ Ngizakwenza labo isivumelwano esingelakuphela, ukuze ngingayekeli ukubenzela okuhle, ngifake ukungesaba enhliziyweni zabo ukuze bangangitshiyi.

⁴¹ Ngizathokoza ngokubenzela okuhle, ngibagxumeke ngobuqotho kulelilizwe ngayo yonke inhliziyo yami langawo wonke umoya wami.

⁴² Ngoba iNkosi ithi: Njengoba ngehlisele phezu kwalababantu bonke lobububi, ngokunjalo ngizabehlisela konke okuhle engikukhulumileyo.

⁴³ Amasimu azathengwa kulelilizwe elilibiza ngokuthi: Liyinkangala engelamuntu lenyamazana, futhi linikelwe ezandleni zamaKaladiya.

⁴⁴ Amasimu azathengwa ngemali, kulungiswe incwadi zokuthenga, kulotshwe kuzo amabizo abofakazi, zinamatheliswe, elizweni lakoBenjamini lasemaphandleni aseJerusalema, lasemizini yakoJuda, lasemizini yasemaqaqeni, lasemizini yaseShefela, lasemizini yaseNegebi; ngoba ngizabuyisa abantu bakhona, kutsho iNkosi.