UJeremiya 30 - iBhayibhili Elingcwele 1978

Ukubuyela kwabathunjiweyo kuyathenjiswa

¹ Ilizwi leNkosi elafika kuJeremiya lathi:

² INkosi, uNkulunkulu kaIsrayeli, ithi: Loba encwadini wonke amazwi engiwakhulume kuwe.

³ Ngoba insuku ziyeza, lapho ngizabuyisa abantu bami uIsrayeli loJuda, kutsho iNkosi. Ngizababuyisela elizweni engalinika okhokho babo, libe ngelabo.

⁴ La ngamazwi iNkosi eyawakhuluma ngoIsrayeli loJuda,

⁵ yathi: Sizwile ilizwi lokwethuka, lelokwesaba, lelokuswela ukuthula.

⁶ Ake libuze lizwe, kumbe indoda ingazala umntwana na? Phoke, kungani ngibona wonke amadoda ebambe inkalo zawo njengowesifazana ohelelwayo na? Kungani ubuso bonke bunyukumele na?

⁷ Maye! lukhulu lolosuku, kalukho olunye olunjengalo. Kuyisikhati sokuhlupheka kukaJakobe, kanti uzakukhululwa kukho.

⁸ Kuzakuthi ngalolosuku, kutsho iNkosi yamabandla, ngilaphule ijogwe entanyeni zabo, ngiqamule izibopho zabo, kabasayikusebenzela abezizwe,

⁹ kodwa bazasebenzela mina Nkosi, uNkulunkulu wabo, loDavida inkosi yabo engizakubavusela yena.

¹⁰ Ngakhoke ungesabi, wena Jakobe, nceku yami; ungatshaywa luvalo, wena Israyeli, kutsho iNkosi; ngoba ngizakukukhulula endaweni ekhatshana, lenzalo yakho elizweni lokuthunjwa kwayo. UJakobe uzakubuya aphumule, ahlale kuhle, angethuswa muntu.

¹¹ Ngoba mina ngilawe ukukukhulula, kutsho iNkosi. Ngoba ngizachitha ngokupheleleyo zonke izizwe engikuhlakazele phakathi kwazo, kodwa wena kangiyikukubhubhisa ngokupheleleyo; ngizakukukhuza ngokufaneleyo, kangiyikukuyekela.

¹² INkosi ithi: Ukulimala kwakho kakwelapheki, lesilonda sakho sibi.

¹³ Kakho onanzelela amanxeba akho, kakulamuthi ozakukwelapha ukuba usile.

¹⁴ Zonke izithandwa zakho zikukhohliwe, kazisakudingi. Ngoba ngikutshayile njengesitha, ngokutshaya okulolunya, ngoba icala lakho likhulu, lezono zakho zandile.

¹⁵ Ukhalelani ngokulimala kwakho na? Ubuhlungu bakho kabelapheki. Ngoba ukona kwakho kukhulu, lezono zakho zandile. Ngikwenzile lokhu kuwe.

¹⁶ Ngalokhoke bonke abakudlayo bazakudliwa, lezitha zakho zonke zizathunjwa, labakuphangayo bazakuphangwa, labo bonke abakwamukayo bazakwamukwa.

¹⁷ Ngoba ngizabuyisa ukusila kwakho, ngelaphe amanxeba akho, kutsho iNkosi. Ngoba bakubize ngokuthi: Ungolahliweyo, leZiyone elingafunwa muntu.

¹⁸ INkosi ithi: Ngizabuyisa abantwana bakaJakobe, ngihawukele wonke amakhaya abo. Yonke imizi izakwakhiwa futhi endaweni yayo, lazo zonke izindlu zakhiwe njengakuqala.

¹⁹ Kuzaphuma kubo ingoma zokubonga, lokumemeza kwabathokozayo. Ngizakubandisa babe banengi, bazahlonitshwa, bangabi balutshwana.

²⁰ Abantwana babo bazakuba njengakuqala, lebandla labo lizakuma phambi kwami; ngizabatshaya bonke ababacindezelayo.

²¹ Isikhulu sabo sizakuba ngomunye wabo, lombusi wabo uzavela phakathi kwabo; ngizamsondeza, asondele kimi, ngoba ngubani ongaba lesibindi sokusondela kimi na? kutsho iNkosi.

²² Lizakuba ngabantu bami, lami ngibe nguNkulunkulu wenu.

²³ Khangelani ulaka lweNkosi lunjengesivunguzane, luphumile, lunjengesiphepha esivunguzayo, luzakwehlela phezu kwababi.

²⁴ Ulaka oluvuthayo lweNkosi kaluyikudeda, ize iphelelise izifiso zenhliziyo yayo. Ensukwini zokuphela lizakukuqedisisa lokhu.