UJeremiya 29 - iBhayibhili Elingcwele 1978

Incwadi kaJeremiya kwabathunjelwe eBabiloni

¹ Nanka amazwi encwadi ayithumelayo uJeremiya umprofethi eseJerusalema kwabadala babathunjiweyo, lakubapristi labaprofethi, labantu bonke ayebathumbile uNebukadineza eJerusalema, wabasa eBabiloni.

² Kwakungemva kokuba sebesukile eJerusalema, inkosi uJekoniya, lonina, labathenwa, lezikhulu zakoJuda lezeJerusalema, lezingcitshi zemisebenzi, kanye labakhandi.

³ Incwadi yasiwa nguElasa indodana kaShafani, loGemariya indodana kaHilikiya, ababethunywe nguZedekiya, inkosi yakoJuda, eBabiloni kuNebukadineza inkosi yaseBabiloni. Yathi:

⁴ INkosi yamabandla, uNkulunkulu kaIsrayeli, ithi kibo bonke abathunjwe eJerusalema basiwa eBabiloni:

⁵ Yakhani izindlu, lihlale kizo, lilime amasimu, lidle izithelo zawo;

⁶ lithathe abafazi, lizale amadodana lamadodakazi, lithathele amadodana enu abafazi, lendise amadodakazi enu, ukuze azale amadodana lamadodakazi, lande lina, linganciphi.

⁷ Sebenzelani ukuthula komuzi lapho ngilithumbele khona, liwukhulekele eNkosini, ngoba ekuthuleni kwawo lizakuba lokuthula lani.

⁸ INkosi yamabandla, uNkulunkulu kaIsrayeli, ithi: Lingavumeli abaprofethi benu labalumbi benu abakhona phakathi kwenu balikhohlise, lingawalaleli amaphupho abawaphuphayo;

⁹ ngoba batshumayela amanga kini ngebizo lami; kangibathumanga, kutsho iNkosi.

¹⁰ INkosi ithi: Lapho iminyaka engamatshumi ayisikhombisa isiphelile eBabiloni, ngizalihambela, ngigcwalise isithembiso sami, ngilibuyise kulindawo.

¹¹ Ngoba ngiyazi mina imicabango engiyicabanga ngani, kutsho iNkosi; yimicabango yokuthula, kayisiyo eyokubi, ukuba ngilinike isikhathi esizayo esilethemba.

¹² Lizakungibiza, lize, likhuleke kimi, ngilizwe.

¹³ Lizakungidinga, lingifumane; lapho lingifunisisa ngayo yonke inhliziyo yenu,

¹⁴ lizangifumana, kutsho iNkosi, ngilibuyise ekuthunjweni kwenu, ngiliqoqe kuzo zonke izizwe lakuzo zonke indawo lapho ngilixotshele khona, ngilibuyise endaweni engalithumba kuyo.

¹⁵ Litshilo ukuthi: INkosi uNkulunkulu isivusele abaprofethi eBabiloni.

¹⁶ INkosi uNkulunkulu ikhuluma mayelana lenkosi ehlezi esihlalweni sobukhosi sikaDavida, langabo bonke abantu abahlala kulumuzi, abafowenu abangathunjwanga kanye lani;

¹⁷ ithi: Khangelani, ngiyathuma kibo impi lendlala lomkhuhlane, ngibenze babe njengomkhiwa omubi kakhulu ongadlekiyo ngenxa yobubi bawo.

¹⁸ Ngizaxotshana labo ngempi langendlala langomkhuhlane, ngibenze babe yinto eyesabekayo kuyo yonke imibuso yomhlaba, babe yisiqalekiso, lesimangaliso, lento yokuncifelwa, lehlazo, phakathi kwazo zonke izizwe lapho ngibaxotshele khona;

¹⁹ ngoba bengawalalelanga amazwi ami engawathuma kibo ngezinceku zami abaprofethi, ngiwathuma njalonjalo, kodwa kabalalelanga, kutsho iNkosi.

²⁰ Zwanini ilizwi leNkosi, lina lonke bathunjiweyo, engabasusa eJerusalema ngabasa eBabiloni.

²¹ INkosi yamabandla uNkulunkulu kaIsrayeli, ithi mayelana loAhabi indodana kaKolaya, loZedekiya indodana kaMahaseya, abatshumayela amanga ngebizo lami: Khangelani, ngizabanikela esandleni sikaNebukadineza inkosi yaseBabiloni, ozababulala phambi kwenu.

²² Ngenxa yabo, lamazwi azasetshenziswa kibo bonke abathunjiweyo koJuda abaseBabiloni, abe yisiqalekiso okuthi: INkosi ikwenze ube njengoZedekiya loAhabi, abosiwa yinkosi yaseBabiloni ngomlilo;

²³ ngoba benze ubuthutha koIsrayeli, bafeba labafazi bomakhelwana babo, baqamba amanga ngebizo lami, into engingabalayanga yona. Yimi engaziyo, ngingufakazi, kutsho iNkosi.

²⁴ Uzakutsho kuShemaya waseNehelamu uthi:

²⁵ INkosi yamabandla, uNkulunkulu kaIsrayeli, ithi: Uthumele izincwadi ngebizo lakho kubo bonke abantu abaseJerusalema, lakuZefaniya indodana kaMahaseya umpristi, lakubo bonke abapristi, usithi:

²⁶ INkosi isikumisile ukuba ube ngumpristi esikhundleni sikaJehoyada umpristi, ukuba ulondoloze ithempeli; uba kukhona umuntu ohlanyayo ozitshaya umprofethi, uzakumfaka esitokisini, umbophe ngeketane.

²⁷ Phoke, uyekeleleni ukumkhuza uJeremiya waseAnathothi olitshumayezayo na?

²⁸ Ngoba usethumile ilizwi kithi eBabiloni esithi: Ukuthunjwa kwenu kuzakuba ngokwesikhathi eside; ngakho yakhani izindlu, lihlale kizo, lilime amasimu, lidle izithelo zawo.

²⁹ UZefaniya umpristi wayifunda lincwadi, uJeremiya umprofethi esizwa.

³⁰ Laselifika ilizwi leNkosi kuJeremiya lisithi:

³¹ Thumela ilizwi kubo bonke abathunjiweyo uthi: INkosi ithi ngoShemaya waseNehelamu: Njengoba uShemaya etshumayele kini ngingamthumanga mina, walenza ukuba lithembe ize,

³² ngakho ngizamtshaya yena kanye lenzalo yakhe; kakuyikuba lamuntu wakwakhe ozasala phakathi kwalababantu abone okuhle engizakukwenzela abantu bami, ngoba ukhulumile ukuhlamuka kimi, kutsho iNkosi.