UJeremiya 27 - iBhayibhili Elingcwele 1978

Umfanekiso wamajogwe

¹ Ekuqaleni kokubusa kukaZedekiya indodana kaJosiya, inkosi yakoJuda, lelilizwi lafika kuJeremiya livela eNkosini lathi:

² INkosi ithi kimi: Zenzele imichilo lamajogwe, ukugaxe entanyeni yakho.

³ Thumela ilizwi enkosini yaseEdoma leyaseMowabi leyaseAmoni leyaseTire leyaseSidoni, ngezithunywa ezifika eJerusalema zisiza kuZedekiya, inkosi yakoJuda,

⁴ uzilaye ukuba zithi emakhosini azo: INkosi yamabandla, uNkulunkulu kaIsrayeli, ithi: Lizawatshela lokhu amakhosi enu,

⁵ lithi: Kuyimi ngamandla ami amakhulu langengalo yami elamandla engenze umhlaba, labantu, lenyamazana ezikhona emhlabeni, ngiwunika lowo engimbona ukuthi ufanele.

⁶ Sengiwanikele wonke lamazwe kuNebukadineza inkosi yaseBabiloni, inceku yami, ngimnikile futhi inyamazana zeganga ukuba zimsebenzele.

⁷ Zonke izizwe zizamsebenzela yena lendodana yakhe, lomzukulu wakhe, kuze kufike isikhathi sokuchithwa kwelizwe lakhe; kuzakuthi izizwe ezinengi lamakhosi amakhulu bamenze isigqili.

⁸ Kodwa uba isizwe ingabe umbuso ungamsebenzeli uNebukadineza inkosi yaseBabiloni, uthobele ijogwe lenkosi yaseBabiloni, ngizatshaya lesosizwe ngempi langendlala langomkhuhlane, ngize ngisinikele esandleni sakhe ngokupheleleyo, kutsho iNkosi.

⁹ Ngakhoke lingabalaleli abaprofethi benu, labavumisayo benu, labaphuphi benu, lezangoma zenu, labathakathi benu abathi kini: Kaliyikuyisebenzela inkosi yaseBabiloni.

¹⁰ Ngoba batshumayela amanga kini, ukuba lisuswe elizweni lakini, ngilixotshe kilo, libhubhe.

¹¹ Kodwa isizwe esizakuthobela inkosi yaseBabiloni, siyisebenzele, ngizasiyekela elizweni laso, ukuba sililime, sakhe kulo, kutsho iNkosi.

¹² Ngakhuluma kuZedekiya inkosi yakoJuda ngalawomazwi ngathi: Thobelani ijogwe lenkosi yaseBabiloni, liyisebenzele labantu bayo, ukuze lisile.

¹³ Lizafelani wena labantu bakho ngempi langendlala langomkhuhlane, njengokutsho kweNkosi mayelana lesizwe esingayikuyisebenzela inkosi yaseBabiloni na?

¹⁴ Ungawalaleli amazwi abaprofethi abathi kuwe: Kaliyikuyisebenzela inkosi yaseBabiloni; ngoba balitshumayeza amanga.

¹⁵ Kangibathumanga mina, kutsho iNkosi, kodwa batshumayela amanga ngebizo lami, ukuze ngilixotshe, libhubhe wena kanye lalabo abaprofethi abalitshumayezayo.

¹⁶ Ngasengikhuluma kubapristi lakubo bonke abantu ngisithi: INkosi ithi: Lingawalaleli amazwi abaprofethi benu abalitshumayeza besithi: Izitsha zethempeli zizabuyiswa masinyane zivela eBabiloni; ngoba lokhu kungamanga abalitshumayezayo.

¹⁷ Lingabalaleli; sebenzelani inkosi yaseBabiloni ukuze lisile. Uzachithelwani lumuzi na?

¹⁸ Uba bengabaprofethi, belalo ilizwi leNkosi, kabayincenge iNkosi yamabandla, ukuba izitsha eziseleyo ethempelini, lesigodlweni senkosi yakoJuda, laseJerusalema, zingasiwa eBabiloni.

¹⁹ Ngoba iNkosi yamabandla ithi ngezinsika, langolwandle, langezinyawo, langezinye izitsha zethempeli eziseleyo kulumuzi,

²⁰ angazithathanga uNebukadineza inkosi yaseBabiloni ekuthumbeni kwakhe eJerusalema uJekoniya indodana kaJehoyakimi, inkosi yakoJuda, lazo zonke izikhulu zakoJuda lezeJerusalema, ebasa eBabiloni;

²¹ iNkosi yamabandla, uNkulunkulu kaIsrayeli, ithi mayelana lezitsha eziseleyo ethempelini, lasesigodlweni senkosi yakoJuda, leJerusalema:

²² Zizasiwa eBabiloni, zihlale khona kuze kufike usuku lokuzikhumbula kwami, kutsho iNkosi. Ng’khona ngizakuzibuyisa kulindawo.