UJeremiya 26 - iBhayibhili Elingcwele 1978

Abantu bathi uJeremiya ufanele ukubulawa

¹ Ekuqaleni kokubusa kukaJehoyakimi indodana kaJosiya, inkosi yakoJuda, kwafika lelilizwi leNkosi lathi:

² INkosi ithi: Mana egumeni lethempeli, ukhulume kuyo yonke imizi yakoJuda efikayo ukuzakhonza ethempelini, utsho wonke amazwi engakulaya wona, ungatshiyi lelilodwa.

³ Mhlawumbe bazakulalela, bonke batshiye indlela zabo ezimbi, ukuba ngiyekele okubi ebengisithi ngizakukwenza kubo ngenxa yezenzo zabo ezimbi.

⁴ Uzakuthi kibo: INkosi ithi: Uba lingayikungilalela, lihambe ngomlayo wami engiwubeka phambi kwenu,

⁵ lingawalaleli amazwi ezinceku zami abaprofethi engibathume kini, ngibathuma njalonjalo, kodwa lingabalaleli,

⁶ ngizakwenza lindlu ibe njengeShilo, ngenze lumuzi ube yisiqalekiso kuzo zonke izizwe zomhlaba.

⁷ Abapristi labaprofethi labo bonke abantu bamuzwa uJeremiya ekhuluma lamazwi ethempelini;

⁸ lapho eseqedile ukukhuluma konke iNkosi eyayimlayile ukukukhuluma ebantwini, abapristi labaprofethi labo bonke abantu bamdumela bathi: Sizakukubulala!

⁹ Kungani utshumayela ngebizo leNkosi usithi: Lindlu izakuba njengeShilo, lomuzi lo uzakuba yinkangala, kungabi lamuntu na? Bonke abantu bambuthanela uJeremiya ethempelini.

¹⁰ Kwathi izikhulu zakoJuda sezizwile lezizinto zafika ethempelini, zivela esigodlweni senkosi, zahlala ngaseSangweni elitsha.

¹¹ Abapristi labaprofethi basebesithi kuzo izikhulu lakubo bonke abantu: Umuntu lo ufanele ukubulawa, ngoba utshumayele ngalumuzi njengoba lizizwele lani.

¹² Wasekhuluma uJeremiya kuzo zonke izikhulu lakubo bonke abantu esithi: INkosi yangithuma ukutshumayela ngalindlu langalumuzi wonke amazwi eliwezwileyo.

¹³ Ngakho lungisani indlela zenu lezenzo zenu, lilalele ilizwi leNkosi uNkulunkulu wenu, izayekela ukwenza okubi konke ekukhulume ngani.

¹⁴ Kodwa mina ngisezandleni zenu. Yenzani kimi njengokuthanda kwenu lanjengokufanele kini.

¹⁵ Kodwa lazi isibili ukuthi uba lingibulala, lizakwehlisela igazi elingelacala phezu kwenu laphezu kwalumuzi labakhileyo kiwo, ngoba impela iNkosi yangithuma ukukhuluma lamazwi kini.

¹⁶ Izikhulu labo bonke abantu basebesithi kubapristi labaprofethi: Lumuntu kafanelanga ukubulawa, ngoba ukhulumile kithi ebizweni leNkosi, uNkulunkulu wethu.

¹⁷ Kwasekusukuma abanye abadala belizwe, bakhuluma kubo bonke abantu ababutheneyo besithi:

¹⁸ UMika waseMoreshethi watshumayela ensukwini zikaHezekiya, inkosi yakoJuda, wathi kibo bonke abantu bakoJuda: INkosi yamabandla ithi: IZiyone lizalinywa njengensimu; iJerusalema libe lunxiwa oludilikileyo, lentaba okwakhiwe kuyo ithempeli ibe lisandle.

¹⁹ Kambe inkosi yakoJuda uHezekiya labo bonke abakoJuda bambulala yena yini? Angithi bayesaba iNkosi, bayincenga, kayiyekelanga yini iNkosi ukukwenza okubi eyayikukhulume ngabo na? Sizakwehlisela phezu kwethu ububi obukhulu na?

²⁰ Kwakukhona lomunye umuntu owatshumayela ebizweni leNkosi, uUriya indodana kaShemaya owaseKiriyathi‐Jeyarimi. Laye watshumayela ngalumuzi langalelilizwe ngamazwi afanana lamazwi kaJeremiya.

²¹ Kwathi lapho inkosi uJehoyakimi, lawo wonke amaqhawe akhe, lezikhulu zakhe, besizwa amazwi akhe, inkosi yafuna ukumbulala; kodwa kwathi uUriya esekuzwile lokhu, wesaba, wabalekela eGibithe.

²² Inkosi uJehoyakimi yasithuma eGibithe amadoda athile, uElinathani indodana kaAkibori, kanye labanye,

²³ bamthatha uUriya eGibithe, bamletha enkosini uJehoyakimi, owambulalayo, lesidumbu sakhe wasiphosela endaweni yokungcwabela abantukazana.

²⁴ Kodwa uAhikamu indodana kaShafani wamvikela uJeremiya ukuba anganikelwa ebantwini ukubulawa.