UJeremiya 25 - iBhayibhili Elingcwele 1978

Ilizwe lakoJuda lizakuba yinkangala okweminyaka engamatshumi ayisikhombisa

¹ Ilizwi leNkosi elafika kuJeremiya ngabantu bonke bakoJuda, emnyakeni wesine kaJehoyakimi indodana kaJosiya, inkosi yakoJuda — ngomnyaka wokuqala kaNebukadineza, inkosi yaseBabiloni —

² ilizwi alikhulumayo uJeremiya umprofethi kubo bonke abantu bakoJuda labo bonke abakhileyo eJerusalema esithi:

³ Sekuyiminyaka engamatshumi amabili lantathu, kusukela emnyakeni wetshumi lantathu wokubusa kukaJosiya indodana kaAmoni, inkosi yakoJuda, kuze kube lamuhla, ilizwi leNkosi lifikile kimi, ngalikhuluma kini njalonjalo, kodwa kalilalelanga.

⁴ Kalilalelanga, kalizwanga lanxa iNkosi iphikelela ukuthumela kini zonke inceku zayo abaprofethi,

⁵ lapho kuthiwa: Phendukani, lina lonke, ezindleleni zenu ezimbi lasekwenzeni kwenu okubi, lihlale elizweni iNkosi elinike lona lina lokhokho benu kusukela endulo kuze kube nininini,

⁶ lingalandeli abanye onkulunkulu ukubasebenzela lokubakhonza, ukuba lingivuse ulaka ngezithombe elizenzileyo. Kangiyikulenzela okubi.

⁷ Kodwa kalingilalelanga, kutsho iNkosi, ukuba lingivuse ulaka ngezithombe zenu, ukuba lehlelwe ngokubi.

⁸ Ngakho iNkosi yamabandla ithi: Ngenxa yokuba lingawalalelanga amazwi ami,

⁹ ngizabiza izizwe zasenyakatho, kutsho iNkosi, loNebukadineza inkosi yaseBabiloni inceku yami, ngizilethe kulelilizwe lakwabakhileyo kulo, lakuzo zonke izizwe eziseduze lalo, ngibabhubhise, ngibenze babe yinto eyesabekayo, into yokuncifelwa, lehlazo elingapheliyo.

¹⁰ Ngizaqeda phakathi kwabo umsindo wokuthokoza lowokujabula, lelizwi lomyeni lelomlobokazi, lomsindo wokuchola kwelitshe, lokukhanya kwesibane.

¹¹ Ilizwe lonke leli lizakuba ngamanxiwa lenkangala; lezizizwe zizasebenzela inkosi yaseBabiloni iminyaka engamatshumi ayisikhombisa.

¹² Ngemva kweminyaka engamatshumi ayisikhombisa ngizatshaya inkosi yaseBabiloni lesizwe sayo, ngenxa yobubi babo, kutsho iNkosi, ngilenze ilizwe lamaKaladiya libe yinkangala kokuphela,

¹³ ngehlisele phezu kwalelolizwe amazwi wonke engawakhuluma ngalo, lakho konke okulotshiweyo kulolugwalo okwatshunyayelwa nguJeremiya ngazo zonke izizwe.

¹⁴ Ngoba izizwe ezinengi lamakhosi amakhulu zizakubenza babe yizigqili; ngizaphindisela kibo njengokufanele izenzo zabo lemisebenzi yabo.

Inkezo yewayini egcwele ulaka lweNkosi

¹⁵ INkosi, uNkulunkulu kaIsrayeli, yathi kimi: Yamukela esandleni sami linkezo yewayini egcwele ulaka lwami, unathise ngayo zonke izizwe engi kuthuma kuzo.

¹⁶ Zizakunatha zidakwe, zihlanye ngenxa yempi engiyithumela phakathi kwazo.

¹⁷ Ngasengiyamukela inkezo esandleni seNkosi, nganathisa ngayo zonke izizwe iNkosi engithume kizo,

¹⁸ ngitsho iJerusalema lemizi yakoJuda, amakhosi alo lezikhulu zalo, ukuba kuchitheke, kube yinkangala, lento yokuncifelwa leyokuthukwa, njengoba kunjalo lalamhla;

¹⁹ loFaro inkosi yaseGibithe, lenceku zakhe, lezikhulu zakhe, labantu bakhe bonke,

²⁰ kanye labo bonke abezizwe abaphakathi kwabo, lamakhosi wonke aselizweni leUzi, lawelizwe leFilistiya — eAshikeloni leGaza leEkroni lengcosana eAshidodi —

²¹ iEdoma leMowabi, lamaAmoni,

²² wonke amakhosi aseTire lawaseSidoni, lamakhosi asemazweni angasolwandle,

²³ eDedani leTema leBuzi, labo bonke abagela inwele zabo emaceleni,

²⁴ lamakhosi wonke aseArabiya, lamakhosi ezizwe ezixubeneyo ezihlala enkangala,

²⁵ lamakhosi wonke aseZimri, lawaseElamu lawaseMede,

²⁶ lawo wonke amakhosi asenyakatho akhatshana laseduze ngokulandelana, lemibuso yonke yomhlaba ekhona emhlabeni. Ngemva kwabo inkosi yaseBabiloni izakunatha.

²⁷ Ubususithi kibo: INkosi yamabandla, uNkulunkulu kaIsrayeli, ithi: Nathani lidakwe, lihlanze, liwe, lingaphindi livuke futhi, ngenxa yempi engiyithumela phakathi kwenu.

²⁸ Kuzakuthi lapho besala ukuyamukela inkezo esandleni sakho, ukuba banathe, uthi kibo: INkosi yamabandla ithi: Limele ukunatha impela.

²⁹ Ngoba sengiqalile ukwenza okubi emzini lapho ibizo lami lidunyiselwa khona; lizayekelwa ukutshaywa na? Atshi, kaliyikuyekelwa, ngoba ngibiza impi ezabehlela bonke abakhileyo emhlabeni, kutsho iNkosi.

³⁰ Ngakhoke wena uzatshumayela kibo wonke lamazwi engikutshela wona, uthi: INkosi izakuduma iphezulu, iliphumise ilizwi layo endlini yayo engcwele; izakuduma kakhulu phezu kwesibaya sayo, imemeze njengalabo abakhama izithelo zevini, kubo bonke abakhileyo emhlabeni.

³¹ Umsindo uzafinyelela emikhawulweni yomhlaba, ngoba iNkosi iyamelana lezizwe, iyabagweba bonke abantu, ababi izakubanikela ekubulaweni, kutsho iNkosi.

³² INkosi yamabandla ithi: Khangelani, ububi buphuma kwesinye isizwe busiya kwesinye, isiphepha esikhulu siyavunguza, sisuka endaweni ezikhatshana zomhlaba.

³³ Ngalolosuku ababulewe yiNkosi bazasukela komunye umkhawulo womhlaba baze bafike komunye; kabayikukhalelwa, kabayikubuthwa bangcwatshwe, bazakuba ngamalongwe emhlabathini.

³⁴ Lilani, lina belusi, likhale, zibhuqeni emlotheni, lina zikhulu zomhlambi, ngoba insuku zokuhlatshwa kwenu lezokuhlakazeka sezifikile, lizakuwa njengenqama ezinhle.

³⁵ Abelusi kabayikuba lesiphephelo, lezikhulu zomhlambi kaziyikuphunyuka.

³⁶ Zwanini ukukhala kwabelusi lokulila kwezikhulu zomhlambi: ngoba iNkosi izachitha idlelo labo,

³⁷ lezibaya ezilokuthula zidilikile, ngenxa yokuvutha kolaka lweNkosi.

³⁸ Iphumile esikhundleni sayo njengesilwane, ngoba ilizwe labo seliyikangala ngenxa yabachithi, langenxa yolaka lwayo oluvuthayo.