UJeremiya 24 - iBhayibhili Elingcwele 1978

Umfanekiso womkhiwa omuhle lomkhiwa omubi

¹ Ngemva kokuba uNebukadineza inkosi yaseBabiloni esethumbile eJerusalema uJekoniya indodana kaJehoyakimi, inkosi yakoJuda, kanye lezikhulu zakoJuda, lezingcitshi zemisebenzi, labakhandi, wabasa eBabiloni, iNkosi yangitshengisa lumbono, izitsha ezimbili zilomkhiwa zibekwe phambi kwethempeli leNkosi.

² Esinye isitsha sasilomkhiwa omuhle kakhulu ovuthwe kuqala; kodwa esinye sasilomkhiwa omubi kakhulu ongadlekiyo ngenxa yobubi bawo.

³ INkosi yathi kimi: Jeremiya, ubonani? Ngathi: Umkhiwa, omuhle muhle kakhulu, lomubi mubi kakhulu, kawudleki ngenxa yobubi bawo.

⁴ Laselifika kimi ilizwi leNkosi lisithi:

⁵ INkosi, uNkulunkulu kaIsrayeli, ithi: Njengalumkhiwa omuhle bazakuba njalo kimi abathunjiweyo bakoJuda, engibase elizweni lamaKaladiya elikhatshana lalindawo.

⁶ Ngizabaphatha kuhle, ngibabuyise kulelilizwe. Ngizakubakha, ngingabadilizi, ngibagxumeke, ngingabasiphuni,

⁷ ngibanike inhliziyo yokwazi ukuba mina ngiyiNkosi; bazakuba ngabantu bami, ngibe nguNkulunkulu wabo, ngoba bazabuyela kimi ngenhliziyo yabo yonke.

⁸ Kodwa iNkosi ithi: Njengalumkhiwa omubi ongadlekiyo ngenxa yobubi bawo, ngizaphatha ngokunjalo uZedekiya, inkosi yakoJuda, lezikhulu zakhe, lengcosana yeJerusalema eseleyo kulelilizwe, lalabo abakhileyo eGibithe.

⁹ Ngizakubenza babe yinto eyesabekayo kuyo yonke imibuso yomhlaba, babe lihlazo, lesiga, lenhlekisa, lesiqalekiso kuzo zonke indawo engibaxotshele kuzo.

¹⁰ Ngizabehlisela impi lendlala lomkhuhlane, baze babhubhe baphele elizweni engibanika lona lokhokho babo.