UJeremiya 21 - iBhayibhili Elingcwele 1978

IJerusalema lizakuchithwa

¹ Yileli ilizwi leNkosi elafika kuJeremiya mhla inkosi uZedekiya ethumela kuye uPashuri indodana kaMalikiya, loZefaniya umpristi, indodana kaMahaseya isithi:

² Ake usibuzele eNkosini, ngoba uNebukadineza inkosi yaseBabiloni uyasihlasela; mhlawumbe iNkosi ingasenzela njengazo zonke izimangaliso zayo, imenze asuke kithi.

³ UJeremiya wathi kubo:

⁴ Lizakuthi kuZedekiya: INkosi, uNkulunkulu kaIsrayeli, ithi: Ngizabuyisa izikhali zokulwa oziphetheyo, olwa ngazo lenkosi yaseBabiloni lamaKaladiya abakuvimbezeleyo ngaphandle kwemiduli, ngizilethe phakathi kwalumuzi.

⁵ Mina uqobo ngizakulwa lawe ngesandla esilamandla langengalo elamandla, ngilokuthukuthela lokufutheka lolaka oluvuthayo.

⁶ Ngizatshaya abakhileyo balumuzi, abantu lezifuyo; bazabulawa ngumkhuhlane onzima.

⁷ Kuthi emva kwalokho, kutsho iNkosi, nginikele uZedekiya inkosi yakoJuda, lenceku zakhe, labantu balumuzi abasilileyo emkhuhlaneni, lempini, lendlaleni, esandleni sikaNebukadineza inkosi yaseBabiloni, lasezandleni zezitha zabo, ezandleni zalabo ababazingelayo. Uzakubabulala; kayikuba lasihawu, kayikubahawukela, kayikuba lamusa kibo.

⁸ Kulababantu lizakuthi: INkosi ithi: Khangelani, ngibeka phambi kwenu indlela yokusila lendlela yokufa.

⁹ Osala kulumuzi uzabulawa empini layindlala langumkhuhlane; kodwa ophumayo azinikele kumaKaladiya alivimbezeleyo uzakusila, aphunyuke lokuphila kwakhe.

¹⁰ Ngoba ngiwukhangele lumuzi ukuba ngiwenzele okubi, ngingawenzeli okuhle, kutsho iNkosi; uzanikelwa esandleni senkosi yaseBabiloni ezakuwutshisa ngomlilo.

Amazwi amayelana lamakhosi akoJuda

¹¹ Kuyo indlu yenkosi yakoJuda lithi: Zwana ilizwi leNkosi,

¹² lina ndlu kaDavida. INkosi ithi: Yenzani okulungileyo ekuseni, likhulule esandleni socindezelayo lowo ophangiweyo, funa ulaka lwami luvuthe njengomlilo, lutshise, kungabi khona olucimayo, ngenxa yezenzo zenu ezimbi.

¹³ Ngilwa lani, lina abakhileyo esigodini abanjengedwala emagcekeni, kutsho iNkosi, lina elithi: Ngubani ozasehlela, angene emizini yethu na?

¹⁴ Ngizalitshaya ngokufanele izenzo zenu, kutsho iNkosi; ngizaphemba umlilo ehlathini ozatshisa konke okuseduze lalo.