UJeremiya 20 - iBhayibhili Elingcwele 1978

UPashuri uyaqalekiswa

¹ Kwathi uPashuri umpristi, indodana kaImeri, owayeyinduna enkulu ethempelini, wamuzwa uJeremiya etshumayela lezizinto.

² UPashuri wamtshaya uJeremiya umprofethi, wamfaka esitokisini esiseSangweni lakoBenjamini elingaphezulu, ekungeneni kwethempeli.

³ Kwathi kusasa, lapho uPashuri esemkhuphe esitokisini uJeremiya, uJeremiya wathi kuye: INkosi kayisakubizi ngokuthi unguPashuri, kodwa ngokuthi uyiKwesabeka okunxa zonke.

⁴ Ngoba iNkosi ithi: Ngizakukwenza ukuba ube yinto eyesabekayo kuwe uqobo lakubo bonke abangane bakho. Bazabulawa ngomkhonto wezitha zabo, ukhona wena ukhangele. Ngizanikela bonke abakoJuda esandleni senkosi yaseBabiloni, ibathumbe, ibase eBabiloni, ibabulale.

⁵ Futhi ngizanikela yonke imfuyo yalumuzi, layo yonke inzuzo yawo, lakho konke okwawo okuligugu, kanye lenotho yonke yamakhosi akoJuda, ezandleni zezitha zabo ezizakubaphanga, zibathumbe zibase eBabiloni.

⁶ Wenake Pashuri, labo bonke abahlala endlini yakho, lizakuthunjwa, liye eBabiloni; lizakufela khona, lingcwatshelwe khona, wena labangane bakho bonke, otshumayele kibo amanga.

Ukusola kukaJeremiya

⁷ Nkosi, wangiyenga, ngayengeka. Ulamandla kulami, ungahlulile, sengiyinhlekisa insuku zonke, bonke bayangihleka.

⁸ Ngoba lapho ngikhuluma, ngiyakhala, ngimemeze ngithi: Okubi lokuchitheka! Ilizwi leNkosi selingilethele ihlazo lokuhlekwa usuku lonke.

⁹ Uba ngisithi: Kangisayikuyiphatha, kangisayikukhuluma ngebizo layo; kuba khona enhliziyweni yami lokho okungathi ngumlilo ovuthayo, ovalelwe emathanjeni ami; sengikhathele ukubekezela, sengehlulekile.

¹⁰ Ngiyezwa abanengi benyeyeza besithi: Kukhona ukwesabeka inxa zonke! Bathi: Mmangalele! Asimmangaleleni! kutsho bonke abangane bami engibejwayeleyo, beqaphele ukuwa kwami. Bathi: Mhlawumbe angakhohliseka; ng’khona sizakumahlula, siphindisele kuye.

¹¹ Kodwa iNkosi ilami njengeqhawe elesabekayo; ngakhoke abangizingelayo bazakhubeka, kabayikungahlula; bazayangeka kakhulu, ngoba kabayikuphumelela. Lehlazo labo elingelakuphela kaliyikukhohlakala.

¹² Wena Nkosi yamabandla, ohlolayo olungileyo, obona inhliziyo lengqondo, ake ngibone ukuphindisela kwakho kibo, ngoba kuwe nginikele indaba yami.

¹³ Hlabelani eNkosini, liyidumise. Ngoba ikhulule oswelayo ezandleni zababi.

¹⁴ Kaluthukwe usuku engazalwa ngalo. Usuku umama angizala ngalo kalungabusiswa.

¹⁵ Kathukwe lowomuntu owatshela ubaba ukuthi: Uzalelwe umfana; wamenza wathokoza.

¹⁶ Lowomuntu kabe njengemizi iNkosi eyayichitha ingelasihawu; kezwe ukukhala ekuseni, lomkhosi wempi emini,

¹⁷ ngoba engangibulalelanga esiswini, lomama waba liliba lami, wakhulelwa kokuphela.

¹⁸ Ngaphumelani esiswini ukuba ngibone uhlupho losizi, ngiqede insuku zami ngisehlazweni?