UJeremiya 2 - iBhayibhili Elingcwele 1978

Ukuhlamuka kukaIsrayeli

¹ Laselifika kimi ilizwi leNkosi lisithi:

² Hamba uyememezela eJerusalema uthi: INkosi ithi: Ngiyakhumbula ukuthembeka kwakho usemutsha, lothando lwakho usengumlobokazi, lokungilandela kwakho enkangala, elizweni elingahlanyelwanga.

³ UIsrayeli wayengcwele eNkosini, eyizithelo zokuqala zesivuno sayo. Bonke abazidlayo baba lecala, behlelwa ngokubi, kutsho iNkosi.

⁴ Zwanini ilizwi leNkosi, lina ndlu kaJakobe, lani lonke sendo lwendlu yakoIsrayeli.

⁵ INkosi ithi: Yibubi bani okhokho benu ababufumana kimi ukuze basuke baye khatshana lami, balandele lokho okuyize, babe yize na?

⁶ Kabatshongo ukuthi: Ingaphi iNkosi eyasikhupha elizweni laseGibithe, yasikhokhela enkangala, elizweni elilugwadule lelilemigodi, elizweni elomileyo elimnyama kakhulu, elizweni elingahanjwa muntu, lalapho kungahlali muntu khona na?

⁷ Ngalingenisa elizweni elivundileyo ukuba lidle izithelo zalo lokuhle kwalo. Kodwa lapho selingenile lalingcolisa ilizwe lami, lenza ilizwe engalinika lona laba ngamanyala.

⁸ Abapristi kabatshongo ukuthi: Ingaphi iNkosi na? Lalabo abaphatha umlayo kabangazanga. Ababusi baphambuka kimi, labaprofethi batshumayela ngoBali, balandela izithombe ezingasizi lutho.

⁹ Ngakhoke ngilibeka icala, kutsho iNkosi, ngizabeka icala labantwana babantwana benu.

¹⁰ Hambani liye ezihlengeni zaseKuprosi libone, lithumele abantu eKedari lihlolisise, libone ukuthi yake yaba khona into enjengale na?

¹¹ Isizwe sake santshintsha onkulunkulu baso, loba bengesibo onkulunkulu balutho na? Kodwa abantu bami bangintshintshile mina enginguNkulunkulu wabo obalethela udumo ngonkulunkulu ongasizi lutho.

¹² Mangalani ngalokho, lina mazulu, lithuthumele, lidane kakhulu, kutsho iNkosi.

¹³ Ngoba abantu bami benzile izinto ezimbi ezimbili; bangihlamukele, mina mthombo wamanzi okuphila, bazigebhela imithombo etshayo, engabambi manzi.

¹⁴ UIsrayeli uyisigqili yini, wazalwa eyisigqili na? Pho, waba yimpango kanjani na?

¹⁵ Izilwane sezimbhongele, zakhonya kakhulu. Zenza ilizwe lakhe laba yinkangala, lemizi yakhe ingamanxiwa, kayiselamuntu.

¹⁶ Futhi labantu baseMemfisi leTahafanesi baphucile ikhanda lakho.

¹⁷ Wena Israyeli, kawuzehliseli lokhu ngokuhlamuka iNkosi uNkulunkulu wakho lapho ikukhokhela endleleni na?

¹⁸ Ngakho uzuzani ngokuya eGibithe, ukuba unathe amanzi eNile na? Futhi uzuzani ngokuya eAsiriya, ukuba unathe amanzi eYufrathi na?

¹⁹ Ububi bakho buzakukutshaya, lokuhlehlela kwakho emuva kuzakukukhuza. Yazi, ubone ukuthi kuyinto embi ukuyihlamukela iNkosi uNkulunkulu wakho, lokuthi ukungesaba kakukho kuwe, kutsho iNkosi uNkulunkulu wamabandla.

²⁰ Wephula ijogwe lakho endulo, waziqamula izibopho zakho, wathi wena: Kangizukukukhonza. Kodwa phezu kwazo zonke intaba, langaphansi kwezihlahla zonke eziluhlaza, walala njengesifebe.

²¹ Kukanti mina ngakuhlanyela ulivini elihle, uyinhlanyelo elungileyo kuphela. Phoke, usuphenduke kanjani waba mubi, waba livini elibi na?

²² Lanxa ugeza ngesoda, usebenzise isepha enengi, ububi bakho busekhona phambi kwami, kutsho iNkosi uNkulunkulu.

²³ Ungatsho kanjani ukuthi: Kangingcolanga, kangilandelanga oBali na? Khangela ukuziphatha kwakho esigodini, wazi ukuba wenzeni. Unjengekamela elisikazi elizulazulayo emizileni yalo,

²⁴ lanjengobabhemi weganga owejwayele inkangala, ophembela umoya ekukhanukeni kwakhe. Ngubani ongavimbela inkanuko yakhe na? Bonke abamdingayo kabangazikhathazi, bazamfumana ngesikhathi sokukhwelwa.

²⁵ Ungazidinisi ngokuhambahamba ulandela abanye onkulunkulu, loba uzibulale ngomhawu. Kodwa wena wathi: Atshi, kangiyekeli, ngoba ngithandile abezizweni, ngizakubalandela.

²⁶ Njengoba isela lilenhloni lapho selibanjiwe, kunjalo abakoIsrayeli bazakuba lenhloni, bona kanye lamakhosi abo, lezikhulu zabo, labapristi babo, labaprofethi babo,

²⁷ abathi esihlahleni: Wena ungubaba; abathi lelitsheni: Wena wasizala. Ngoba bangifulathela, kabangikhangelanga. Kodwa ngesikhathi sokuhlupheka kwabo bathi: Vuka, usikhulule!

²⁸ Kanti bangaphi onkulunkulu bakho ozenzele bona na? Kabavuke bona uba bengakukhulula ngesikhathi sokuhlupheka kwakho; ngoba onkulunkulu bakho banengi njengemizi yakho, wena Juda.

²⁹ Lingisolelani na? Lingihlamukele lonke, kutsho iNkosi.

³⁰ Kwaba yize ukubatshaya kwami abantwana benu, kabakwamukelanga ukulaywa. Umkhonto wenu ubadlile abaprofethi bakho njengesilwane esichithayo.

³¹ Wena sizukulwana, lalela ilizwi leNkosi. Benginjengenkangala kuIsrayeli, lelizwe elilomnyama omkhulu na? Phoke, batsholoni abantu bami ukuthi: Sesikhululekile, kasisayikuza kuwe futhi?

³² Intombi ingazikhohlwa yini iziceco zayo lomlobokazi izambatho zakhe na? Kanti abantu bami bangikhohliwe insuku ezingelakubalwa.

³³ Uyazi kuhle indlela yokudinga amakhwa, uze wafundisa abesifazana ababi indlela zakho.

³⁴ Lasezigqokweni zakho kufunyanwa igazi labayanga abangelacala; kawubafumananga befohlela. Kanti kukho konke lokho uthi:

³⁵ Kangilacala; ngakho intukuthelo yakhe isukile kimi. Kodwake ngizakukugweba ngoba uthi: Kangonanga.

³⁶ Kulula kuwe kangaka ukuntshintsha indlela yakho. Uzakuyangiswa yiGibithe, njengoba wayangiswa yiAsiriya.

³⁷ Uzaphuma lalapho uthwele imikhono yakho ekhanda, ngoba iNkosi ibalahlile labo obathembayo, kawuyikuphumelela ngabo.