UJeremiya 18 - iBhayibhili Elingcwele 1978

UJeremiya uya endlini yombumbi

¹ Ilizwi leNkosi elafika kuJeremiya lathi:

² Suka, wehlele endlini yombumbi wembiza, ngizakukutshela amazwi ami khona.

³ Ngasengisehlela endlini yombumbi wembiza, ngamfica esebenza umsebenzi wakhe ngevili lokubumba.

⁴ Imbiza ayeyibumba ngebumba yonakala ezandleni zakhe; waseyidiliza, wenza enye imbiza njengokubona kwakhe.

⁵ Laselifika ilizwi leNkosi kimi lisithi:

⁶ Wena ndlu kaIsrayeli, ngingeze ngenza kini lokho okwenziweyo ngumbumbi wembiza na? kutsho iNkosi. Njengebumba esandleni sombumbi wembiza, lani linjalo esandleni sami, lina ndlu kaIsrayeli.

⁷ Langasiphi isikhathi uba ngikhuluma ngesizwe langombuso ukuthi ngizakukusiphuna, ngikudilize, ngikuchithe,

⁸ uba lesosizwe engakhulume ngaso sitshiya ububi baso, ngizazisola ngokubi ebengisithi ngizakubenza kiso.

⁹ Langasiphi isikhathi engikhuluma ngesizwe langombuso ukuthi ngizakukwakha ngikumise,

¹⁰ uba lesosizwe sisenza okubi phambi kwami, singalaleli ilizwi lami, ngizazisola ngokuhle ebengisithi ngizakukwenza kiso.

¹¹ Ngakhoke tshono ebantwini bakoJuda lakwabakhileyo eJerusalema ukuthi: INkosi ithi: Khangelani, ngilibumbela okubi, ngenza amacebo ngani. Tshiyani ububi benu bonke, lilungise indlela zenu lezenzo zenu.

¹² Kodwa bona bathi: Lokho kakusizi lutho. Sizalandela awethu amacebo, sonke senze ngenkani yenhliziyo zethu ezimbi.

¹³ Ngakhoke iNkosi ithi: Buzani phakathi kwezizwe, ukuthi ngubani owake wezwa okunjengalokhu na? Intombi uIsrayeli yenzile into eyesabekayo.

¹⁴ Ungqoqwane angazitshiya yini ingqonga zaseLebanoni, lamanzi aqandayo ageleza ezintabeni azakutsha na?

¹⁵ Kodwa abantu bami bangikhohliwe, batshisela onkulunkulu bamanga impepha; bakhubeka endleleni zabo, emigwaqweni yasendulo, baphambukela ezindledlaneni, kabahambanga ngemigwaqo;

¹⁶ benza ilizwe labo laba ngelesabekayo lento yokuncifelwa kuze kube nininini; bonke abedlula khona bayethuka, banikina amakhanda abo.

¹⁷ Njengomoya wasempumalanga ngizabachitha phambi kwezitha zabo, ngizabafulathela, bangaboni ubuso bami, ngosuku lokuchitheka kwabo.

Abantu benzela uJeremiya amacebo amabi

¹⁸ Basebesithi: Wozani simenzele amacebo amabi uJeremiya; ngoba kuzabe kulokhu kukhona abapristi ukusifundisa, labahlakaniphileyo ukuseluleka, labaprofethi ukutshumayela ilizwi. Wozani simenzele amacebo, singananzi wonke amazwi akhe.

¹⁹ Ngizwa, wena Nkosi, ulalele lokho izitha zami ezikukhulumayo ngami.

²⁰ Okuhle kuyaphindiselwa ngokubi na? Ngoba bangimbele umgodi. Khumbula ukuthi ngema phambi kwakho ukubakhulumela okuhle ukuthinta ulaka lwakho kibo.

²¹ Ngalokhoke nikela abantwana babo endlaleni, ubanikele ekubulaweni empini; abafazi babo balahlekelwe ngabantwana, babe ngabafelwakazi, lamadoda abo abulawe ngumkhuhlane, lamajaha abo abulawe empini.

²² Kakuzwakale ukukhala endlini zabo, lapho bejunywa yimpi. Ngoba bengimbele umgodi ukungibamba, bazithiya ngomjibila inyawo zami.

²³ Kanti, wena Nkosi, uyawazi amacebo abo okungibulala. Ungathetheleli ububi babo, lezono zabo ungazicimi phambi kwakho. Kodwa kabawe phambi kwakho, ubavukele wena ngesikhathi sokuthukuthela kwakho.