UJeremiya 17 - iBhayibhili Elingcwele 1978

Isono sakoJuda

¹ Isono sakoJuda silotshiwe ngepheni yensimbi; ngomcijo wendayimana sibhaliwe enhliziyweni yabo lasezimpondweni zama‐altare abo,

² abantwana babo besakhumbula ama‐altare abo, lensika zabo ezimiselwe unkulunkulukazi uAshera eziphansi kwazo zonke izihlahla eziluhlaza, lasemaqaqeni aphakemeyo,

³ laphezu kwezintaba eziselizweni. Imfuyo yenu layo yonke inotho yenu ngizayinikela ibe yimpango yokuhlawulela izono zenu kulo lonke ilizwe lakini.

⁴ Uzaliyekela ngokwakho ilizwe lakho engakunika lona, ngikwenze ukuba usebenzele izitha zakho elizweni ongalaziyo, ngoba ekuthukutheleni kwami kuphembeke umlilo ozavutha kuze kube nininini.

⁵ INkosi ithi: Uqalekisiwe umuntu othemba abantu, othemba emandleni abantu, olenhliziyo edela iNkosi.

⁶ Unjengesihlahlana enkangala, kayikubona okuhle lokukodwa. Uzahlala endaweni ezomileyo enkangala, elizweni eligcwele itshwayi, elingahlalwa muntu.

⁷ Ubusisiwe umuntu othemba iNkosi, othemba lakhe liseNkosini.

⁸ Unjengesihlahla esihlanyelwe ngasemanzini, esinabisela impande zaso ngasemfuleni, esingesabi lapho kufika ukutshisa, lemahlamvu aso ahlala eluhlaza; kasethuki lasemnyakeni wokubalela kwelanga, ngoba kasiyekeli ukuthela izithelo.

⁹ Inhliziyo iyakhohlisa ukwedlula izinto zonke, futhi imbi kakhulu. Ngubani ongayazi na?

¹⁰ Mina Nkosi ngiyahlola ingqondo, ngiyilinge inhliziyo, ukuba nginike wonke umuntu okufanele indlela zakhe, lokufanele izenzo zakhe.

¹¹ Njengenkwali efukamela amatsiyane engawazalanga, kunjaloke lowomuntu ozuze inotho ngokungalungi; phakathi kwensuku zakhe izamtshiya, abe yisithutha ekucineni.

¹² Indlu yethu engcwele injengesihlalo sobukhosi esilenkazimulo, esabekwa phezulu kusukela ekuqaleni.

¹³ Wena Nkosi, olithemba likaIsrayeli, bonke abakudelayo bazakuyangeka, labakutshiyayo bazaqedwa emhlabeni, ngoba bayidelile iNkosi engumthombo wamanzi okuphila.

¹⁴ Ngisilisa, wena Nkosi, ngisile; ungikhulule ukuba ngikhululwe; ngoba nguwe engikudumisayo.

¹⁵ Khangela, bathi kimi: Lingaphi ilizwi leNkosi na? Kalize phela!

¹⁶ Kodwa mina kangikukhuthazanga ukuba wenze okubi, futhi kangilufisanga usuku lokuhlupheka, lokhu uyakwazi; okwaphuma emlonyeni wami kwakuphambi kwakho.

¹⁷ Ungabi ngokwesabekayo kimi, ngoba wena uyisiphephelo sami osukwini olubi.

¹⁸ Kabayangeke labo abangizingelayo, kodwa mina kangingayangeki, kabadideke, kodwa mina kangingadideki; behlisele usuku olubi, ubabhubhise ngokupheleleyo.

ISabatha limele ukugcinwa

¹⁹ INkosi yathi kimi: Hamba uyekuma eSangweni lakoBenjamini, angena ngalo amakhosi akoJuda, aphuma ngalo futhi, lakuwo wonke amasango aseJerusalema,

²⁰ uthi: Zwanini ilizwi leNkosi, lina makhosi akoJuda, lani lonke bakoJuda, labo bonke abakhileyo eJerusalema abangena ngawo lamasango.

²¹ INkosi ithi: Xwayani ngenxa yokusila kwenu: lingathwali umthwalo ngeSabatha, lingawungenisi ngamasango eJerusalema.

²² Futhi lingakhuphi umthwalo ezindlini zenu ngeSabatha, lingasebenzi lutho; kodwa lwenzeni usuku lweSabatha lube ngcwele, njengokubalaya kwami okhokho benu.

²³ Kanti kabezwanga, kabalalelanga; baba lenkani kabaze bezwa, belaywa.

²⁴ Kodwa uba lina lingilalela, kutsho iNkosi, lingangenisi umthwalo ngamasango alumuzi ngosuku lweSabatha, kodwa lilenze iSabatha libe ngcwele, lingasebenzi ngalo,

²⁵ kuzangena ngamasango alumuzi amakhosi ahlala esihlalweni sobukhosi sikaDavida, ekhwele inqola zokulwa, egade amabhiza, wona lezikhulu zawo, labantu bakoJuda, labakhileyo eJerusalema; bahlale kulumuzi kuze kube nininini.

²⁶ Abantu bazavela emizini yakoJuda lakuzo zonke indawo ezizingelezele eJerusalema, bavele elizweni lakoBenjamini, laseShefela, laselizweni lamaqaqa, laseNegebi, beletha iminikelo yokutshiswa lemihlatshelo, leminikelo yempuphu lenhlaka, leminikelo yokubonga endlini yeNkosi.

²⁷ Kodwa uba lingangilaleli, lingenzi iSabatha libe ngcwele, lingena ngamasango eJerusalema ngosuku lweSabatha, lithwele imithwalo, ngizaphemba umlilo emasangweni alo, ozakutshisa uqothule izindlu zamakhosi zaseJerusalema, ungacimeki.