UJeremiya 16 - iBhayibhili Elingcwele 1978

INkosi izakutshaya abakoJuda

¹ Ilizwi leNkosi lafika kimi lisithi:

² Ungathathi umfazi, ungabi lamadodana lamadodakazi kulindawo.

³ Ngoba iNkosi ithi mayelana lamadodana lamadodakazi azalelwe kulindawo, langabonina laboyise ababazalele kulelilizwe:

⁴ Bazabulawa yikufa okwesabekayo; kabayikulilelwa, futhi kabayikungcwatshwa; bazakuba njengamalongwe emhlabathini. Bazabhujiswa yimpi layindlala, lezidumbu zabo zibe yikudla kwenyoni zaphezulu lenyamazana zeganga.

⁵ INkosi ithi: Ungangeni endlini yesililo, ungayi esililweni ukubakhalela; ngoba ngikususile ukuthula kwami kulababantu, lothando lwami olungapheliyo kanye lesihawu, kutsho iNkosi.

⁶ Bazakufa bonke abakhulu labancinyane kulindawo; kabayikungcwatshwa, futhi kakulamuntu ozakubalilela kumbe azisike, loba agele ikhanda lakhe ngenxa yabo.

⁷ Kakho ozakubanika abalilayo isinkwa ukubaduduza ngenxa yabafileyo; futhi kakho ozamnathisa inkezo yokududuza ngoyise langonina.

⁸ Kawuyikungena endlini yedili ukuba uhlale labo, udle unathe.

⁹ Ngoba iNkosi yamabandla, uNkulunkulu kaIsrayeli, ithi: Ensukwini zenu, phambi kwenu, ngizakwenza ukuba umsindo wokuthokoza uphele kulindawo, lowokujabula, lelizwi lomyeni lelomlobokazi.

¹⁰ Kuzakuthi lapho ubatshela lababantu wonke lamazwi, bathi kuwe: INkosi ikhulumelani konke lokhu okubi okukhulu ngathi na? Ububi bethu buyini? Yisiphi isono esisenze eNkosini uNkulunkulu wethu na?

¹¹ Wena uthi kibo: Kungoba okhokho benu bangitshiyile, kutsho iNkosi; baye kwabanye onkulunkulu, babasebenzela, babakhonza, bangitshiya mina, kabawugcinanga umlayo wami;

¹² langoba lina lenze okubi ukwedlula okhokho benu; ngoba lonke lilandela inkani yenhliziyo zenu ezimbi, liyala ukungilalela.

¹³ Ngalokhoke ngizaliphosela ngaphandle kwalelilizwe, liye elizweni elingalazanga lina lokhokho benu; kulapho lizasebenzela abanye onkulunkulu emini lebusuku, ngoba mina kangiyikulihawukela.

¹⁴ Ngakhoke insuku zizakufika, kutsho iNkosi, lapho kungasayikuthiwa: Ngifunga iNkosi eyabakhupha abakoIsrayeli elizweni laseGibithe;

¹⁵ kodwa kuzakuthiwa: Ngifunga iNkosi eyabakhupha abakoIsrayeli elizweni lasenyakatho lasemazweni ababexotshelwe kiwo. Ngoba ngizababuyisa elizweni lakibo engalinika okhokho babo.

¹⁶ Khangelani, ngiyathumela abagoli benhlanzi abanengi, bababambe, kutsho iNkosi; emva kwalokho ngizathumela abazingeli abanengi, babazingele entabeni zonke, lasemaqaqeni wonke, babakhuphe ezimbalwini zamatshe zonke.

¹⁷ Ngoba ngiyazibona zonke indlela zabo; kazifihlakalanga kimi, lobubi babo kabucatshanga emehlweni ami.

¹⁸ Ngizaphindisela ngokuphindiweyo ububi babo lezono zabo, ngoba balingcolisile ilizwe lami ngezidumbu zezithombe zabo ezinengekayo, bagcwalisa ilizwe lami ngamanyala abo.

¹⁹ Nkosi, wena ongamandla ami lenqaba yami, isiphephelo sami ngosuku lokuhlupheka, izizwe zizakufika kuwe zivela emikhawulweni yomhlaba, zithi: Okhokho bethu badlile ilifa lamanga kuphela, izinto ezingelamsebenzi ezingasizi lutho.

²⁰ Kambe umuntu angazenzela onkulunkulu na? Labo kabayisibo onkulunkulu.

²¹ Ngakhoke ngizabatshengisa lokhu, ngalesisikhathi ngizabazisa amandla ami lobukhulu bami, bazakwazi ukuthi ngiyiNkosi.